ಬೆಂಗಳೂರಿನ ಹೊಯ್ಸಳ ಸರ್ಕಲ್ ಬಳಿ ಜೂ.1ರಂದು ರಾತ್ರಿ ಕೊಲೆಯೊಂದು (Murder Case) ನಡೆದಿದೆ. ಆಟೋ ಚಾಲಕ ನವೀನ್ ಎಂಬಾತನನ್ನು ಆತನ ಚಿಕ್ಕಪ್ಪನೇ ಹತ್ಯೆ ಮಾಡಿದ್ದಾನೆ. ನವೀನ್ ಮತ್ತು ಚಿಕ್ಕಪ್ಪ ಕುಮಾರ್ ಅನ್ಯೋನ್ಯವಾಗಿಯೇ ಇದ್ದರು. ಆದರೆ ಚಿಕ್ಕಪ್ಪ ಕುಮಾರ್ನ ಮನಸಲಲ್ಲಿ, ನವೀನ್ ವರಸೆಯಲ್ಲಿ ತನಗೆ ಮಗನೇ ಆಗಬೇಕು, ಆತ ನನಗಿಂತ ಚಿಕ್ಕವನಾದರೂ ಸರಿಯಾಗಿ ಮರ್ಯಾದಿ/ಗೌರವ ಕೊಡುವುದಿಲ್ಲ ಎಂಬ ಅಸಮಾಧಾನ ಇತ್ತು. ಸಲುಗೆ ಜಾಸ್ತಿಯಿದ್ದ ಕಾರಣ ನವೀನ್ ತನ್ನ ಚಿಕ್ಕಪ್ಪನಿಗೆ ಮರ್ಯಾದೆ ಕೊಡದೆ ವರ್ತನೆ ಮಾಡುತ್ತಿದ್ದ. ಇದೇ ಸಿಟ್ಟಿಗೆ ಕುಮಾರ್ ತನ್ನ ಅಣ್ಣನ ಮಗನನ್ನು ಹತ್ಯೆ (Bangalore Crime News) ಮಾಡಿದ್ದಾನೆ.
ನವೀನ್ಗೆ ಹದಿನೈದು ದಿನಗಳ ಹಿಂದೆ ಅಪಘಾತವಾಗಿತ್ತು. ಹೀಗಾಗಿ ಸ್ವಲ್ಪ ದಿನಗಳ ಮಟ್ಟಿಗೆ ಆಟೋ ಓಡಿಸುವುದನ್ನು ಬಿಟ್ಟು ಮನೆಯಲ್ಲೇ ಇದ್ದ. ನಿನ್ನೆ ಸಂಜೆ ಆತನ ಚಿಕ್ಕಪ್ಪ ಕುಮಾರ್ ಎಣ್ಣೆ ಹೊಡೆಯೋಕೆ ಅಂತ ನವೀನ್ನನ್ನು ಕೆಂಗೇರಿ ಉಪನಗರದ ಹೊಯ್ಸಳ ಸರ್ಕಲ್ ಬಳಿ ಇರುವ ಹ್ಯಾಪಿ ಡೇ ಬಾರ್ಗೆ ಕರೆದಿದ್ದ. ನವೀನ್ ಖುಷಿಯಿಂದ ಹೋಗಿದ್ದ. ಮದ್ಯ ಹೊಟ್ಟೆಗೆ ಹೋಗ್ತಿದ್ದಂತೆ ಚಿಕ್ಕಪ್ಪ ಕುಮಾರ್ ಗಲಾಟೆ ಶುರು ಮಾಡಿದ್ದ. ನೀನು ನನಗೆ ಮರ್ಯಾದೆ ಕೊಡ್ತಿಲ್ಲ ಎಂದು ಜಗಳ ತೆಗೆದ. ಅದಾಗಲೇ ವಿಪರೀತವಾಗಿ ಮದ್ಯ ಸೇವಿಸಿದ್ದರಿಂದ ಮಿತಿಮೀರಿ ಗಲಾಟೆ ಶುರುವಾಗಿತ್ತು. ಅಲ್ಲಿ ಕುಮಾರನ ಸ್ನೇಹಿತರಾದ ರಮೇಶ್, ಗುರುಪ್ರಸಾದ್ ಎಂಬುವರೂ ಇದ್ದರು. ಬಾರ್ನಿಂದ ಹೊರಗೆ ಬಂದು, ಈ ಮೂವರೂ ಸೇರಿ ನವೀನ್ ಹತ್ಯೆ ಮಾಡಿದ್ದಾರೆ. ಆತನ ಮೈಯಿಗೆ ಸಿಕ್ಕಸಿಕ್ಕಲ್ಲಿ ಚಾಕುವಿನಿಂದ ಇರಿದಿದ್ದಾರೆ.
ಇದನ್ನೂ ಓದಿ: Delhi Murder: ಸಾಹಿಲ್‌ನಿಂದ ಹತಳಾದ ಸಾಕ್ಷಿ ನನ್ನ ಗರ್ಲ್‌ಫ್ರೆಂಡ್‌ ಎಂದ ಮತ್ತೊಬ್ಬ ಯುವಕ; ಕೊಲೆಗೆ ಮತ್ತೊಂದು ಟ್ವಿಸ್ಟ್
ರಕ್ತದ ಕಲೆಯೇ ದಾರಿ ತೋರಿಸಿತು!
ಜಗಳದ ವೇಳೆ ಕುಮಾರ್ ಚಾಕುವಿನಿಂದ ಗಾಯವಾಗಿತ್ತು. ರಕ್ತಸ್ರಾವ ಆಗ್ತಿದ್ರೂ ತಪ್ಪಿಸಿಕೊಳ್ಳಲು ಒಂದು ಕಿಲೋ ಮೀಟರ್ ದೂರ ಹೋಗಿ ಸುಸ್ತಾಗಿ ಕುಳಿತಿದ್ದ. ಇತ್ತ ಹತ್ಯೆ ನಡೆದ ಸ್ಥಳಕ್ಕೆ ಬಂದ ಪೊಲೀಸರು ಪರಿಶೀಲನೆ ನಡೆಸಿದ್ದರು. ಕುಮಾರ್ನನ್ನು ಕೆಲವೆ ಹೊತ್ತಲ್ಲಿ ಪತ್ತೆ ಮಾಡಿದರು. ಅವನ ಕಾಲಿನಿಂದ ಬಸಿದ ರಕ್ತವೇ ದಾರಿ ತೋರಿತ್ತು. ಆತ ಸಾಗಿದ್ದ ಮಾರ್ಗ ರಕ್ತಮಯವಾಗಿದ್ದರಿಂದ, ಅದೇ ಗುರುತಿನ ಆಧಾರದ ಮೇಲೆ ಹೋಗಿ ಕುಮಾರ್ನನ್ನು ಹಿಡಿದಿದ್ದಾರೆ. ಆದರೆ ತೀವ್ರ ರಕ್ತಸ್ರಾವದಿಂದ ಕುಮಾರ್ ಕೂಡ ಅಸ್ವಸ್ಥನಾಗಿ ಬಿದ್ದಿದ್ದ. ಅವನನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಿದ್ದಾರೆ. ಇನ್ನುಳಿದ ಆರೋಪಿಗಳ ಪತ್ತೆ ಕಾರ್ಯಾಚರಣೆ ನಡೆಸಲಾಗುತ್ತಿದೆ. ಬಾರ್ ಹೊರಗಿನ ಸಿಸಿಟಿವಿ ಕ್ಯಾಮರಾಗಳನ್ನು ಪೊಲೀಸರು ಪರಿಶೀಲನೆ ನಡೆಸಿದ್ದಾರೆ.