ಬೆಂಗಳೂರು: 2023ರ G20 ಶೃಂಗಸಭೆಯ ಸಾರಥ್ಯವನ್ನು ಭಾರತ ವಹಿಸಿದ್ದು, ಇಂದಿನಿಂದ ಮೊದಲ ಸಭೆ ಬೆಂಗಳೂರಿನಲ್ಲಿ ನಡೆಯುತ್ತಿದೆ. ಮೂರು ದಿನಗಳ ಕಾಲ ಆಯೋಜಿಸಲಾದ ಶೃಂಗಸಭೆ ದೇವನಹಳ್ಳಿ ಬಳಿಯ ಪ್ರೆಸ್ಟೀಜ್ ಗಾಲ್ಫ್‌ ಶೈರ್ ಹೋಟೆಲ್‌ನಲ್ಲಿ ನಡೆಯಲಿದೆ.
ಕೇಂದ್ರ ಹಣಕಾಸು ಸಚಿವಾಲಯ ಮತ್ತು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಆಯೋಜಿಸಿರುವ ಈ ಸಭೆಯಲ್ಲಿ ಕೇಂದ್ರೀಯ ಬ್ಯಾಂಕ್ಗಳ ನಿಯೋಗಿಗಳು (FCBD), ಹಣಕಾಸು ನಿಯೋಗಿಗಳು ಭಾಗಿಯಾಗಲಿದ್ದಾರೆ. ಆರ್ಥಿಕ ವ್ಯವಹಾರಗಳ ಕಾರ್ಯದರ್ಶಿ ಅಜಯ್ ಸೇಠ್ ಹಾಗೂ ಆರ್ಬಿಐ ಡೆಪ್ಯುಟಿ ಗವರ್ನರ್ ಡಾ. ಮೈಕೆಲ್ ಡಿ. ಸಭೆಯ ಅಧ್ಯಕ್ಷತೆ ವಹಿಸಲಿದ್ದಾರೆ. ಜಿ20 ರಾಷ್ಟ್ರಗಳ ಆರ್ಥಿಕ ವ್ಯವಹಾರಗಳ ಕಾರ್ಯದರ್ಶಿಗಳು, ಕೇಂದ್ರೀಯ ಬ್ಯಾಂಕ್ಗಳ ಡೆಪ್ಯುಟಿ ಗವರ್ನರ್ಗಳು ಸಭೆಯಲ್ಲಿ ಭಾಗಿಯಾಗಲಿದ್ದಾರೆ.
ಚರ್ಚೆಯಾಗಲಿರುವ ಪ್ರಮುಖ ವಿಷಯಗಳು :
- ಭಾರತದ ಅಧ್ಯಕ್ಷತೆಯಲ್ಲಿ ನಡೆಯಲಿರುವ G20 ಫೈನಾನ್ಸ್ ಟ್ರ್ಯಾಕ್‌ನ ಕಾರ್ಯಸೂಚಿಯ ಬಗ್ಗೆ
- ಭಾರತ ಸೇರಿದಂತೆ G20 ರಾಷ್ಟ್ರಗಳ ಆರ್ಥಿಕ ನೀತಿಯ ಬಗ್ಗೆ
- ಕೋವಿಡ್ ನಂತರದ ಆರ್ಥಿಕ ಚೇತರಿಕೆ, ಆರ್ಥಿಕ ಶಿಸ್ತು ಸಾಧಿಸುವ ಕುರಿತು
- ಉಕ್ರೇನ್ ಮತ್ತು ರಷ್ಯಾ ಯುದ್ಧದ ಪರಿಣಾಮ ವಿಶ್ವದ ಆರ್ಥಿಕ ಬಿಕ್ಕಟ್ಟು ಸುಧಾರಣೆಗಳ ಬಗ್ಗೆ
- ಜಾಗತಿಕ ಆರ್ಥಿಕ ಸವಾಲುಗಳನ್ನು ಎದುರಿಸುವುದು
- ವಿಶ್ವದ ಹಣಕಾಸು ಬ್ಯಾಂಕ್ಗಳ ಪುನರ್‌ ಸ್ಥಾಪನೆ ಅಥವಾ ಶಕ್ತಿ ತುಂಬುವುದು
- ಬೆಳೆಯುತ್ತಿರುವ ಭವಿಷ್ಯದ ನಗರಗಳಿಗೆ ಆರ್ಥಿಕ ಸಹಕಾರ ನೀಡುವ ಕುರಿತು
- ಕ್ರಿಪ್ಟೋ ಕರೆನ್ಸಿಯ ಅಭಿವೃದ್ಧಿ, ಬಳಕೆಯ ಮಾರ್ಗಗಳ ಕುರಿತು