ಚಿಕ್ಕಮಗಳೂರು: ಎತ್ತಿನ ಗಾಡಿಗೆ ಬೈಕ್ ಡಿಕ್ಕಿಯಾಗಿ (Bullock cart accident) ಬೈಕ್ ಸವಾರ ಮತ್ತು ಎತ್ತು ಸ್ಥಳದಲ್ಲೇ ಪ್ರಾಣ ಕಳೆದುಕೊಂಡ ದಾರುಣ ಘಟನೆಯೊಂದು ಅಜ್ಜಂಪುರ ತಾಲೂಕಿನ ಅಮೃತ್ ಮಹಲ್ ಕಾವಲು ಬಳಿ ನಡೆದಿದೆ.
ಮೃತಪಟ್ಟ ಬೈಕ್ ಸವಾರನನ್ನು ಶಿವಮೊಗ್ಗ ಮೂಲದ ಸುರೇಶ್ (50) ಎಂದು ಗುರುತಿಸಲಾಗಿದೆ. ಬೈಕಿನಲ್ಲಿದ್ದ ಮತ್ತೊಬ್ಬ ಸವಾರ ರವಿಗೆ ಗಂಭೀರ ಗಾಯಗಳಾಗಿದ್ದು ಅಜ್ಜಂಪುರ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಬೈಕ್ ಡಿಕ್ಕಿ ಹೊಡೆದ ರಭಸಕ್ಕೆ ಎತ್ತು ಕೂಡಾ ಸ್ಥಳದಲ್ಲೇ ಸಾವನ್ನಪ್ಪಿದೆ.
ಸುರೇಶ್ ಮತ್ತು ರವಿ ಅಂತರಘಟ್ಟೆ ಜಾತ್ರೆ ಮುಗಿಸಿ ತೆರಳುತ್ತಿದ್ದಾಗ ಎದುರಿನಿಂದ ಬಂದ ಎತ್ತಿನಗಾಡಿಗೆ ಡಿಕ್ಕಿ ಹೊಡೆದಿದೆ. ಎತ್ತಿನ ಗಾಡಿ ತರೀಕೆರೆ ತಾಲೂಕಿನ ಆದಿಕೆರೆ ಮೂಲದ್ದಾಗಿದೆ.
ಬೈಕ್ ತುಂಬ ವೇಗವಾಗಿ ಸಾಗಿದ್ದು, ಅದರ ಹೊಡೆತಕ್ಕೆ ಎತ್ತೇ ಪ್ರಾಣ ಕಳೆದುಕೊಂಡಿದೆ. ಸುರೇಶ್ ಅವರು ರಸ್ತೆಗೆ ಬಿದ್ದಿದ್ದು, ಅಲ್ಲೇ ಪ್ರಾಣ ಹೋಗಿದೆ. ಅಜ್ಜಂಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ : Road accident : ಆಂಬ್ಯುಲೆನ್ಸ್‌-ಟ್ರ್ಯಾಕ್ಟರ್‌ ಮಧ್ಯೆ ಅಪಘಾತ; ಸ್ಟ್ರೆಚರ್‌ನಲ್ಲಿದ್ದ ಗಾಯಾಳು ಕೆಳಗೆ ಬಿದ್ದು ಮೃತ್ಯು