ಬೆಳಗಾವಿ: ಕಳೆದ ಶುಕ್ರವಾರ ರಾತ್ರಿಯಿಂದ ನಾಪತ್ತೆಯಾಗಿದ್ದ ಗೋಕಾಕ ನಗರದ ಉದ್ಯಮಿ (Businessman found dead) ರಾಜು ಜವಾರ್ (53) ಶವವಾಗಿ ಪತ್ತೆಯಾಗಿದ್ದಾರೆ.
ಗೋಕಾಕ ನಗರದ ಬ್ಯಾಳಿಕಾಟಾ ಬಳಿ ಇರುವ ಖಾಸಗಿ ಆಸ್ಪತ್ರೆ ಬಳಿಯಿಂದ ಮುಂದೆ ಅವರು ಎಲ್ಲಿ ಹೋದರು ಎನ್ನುವ ಬಗ್ಗೆ ಮಾಹಿತಿ ಇರಲಿಲ್ಲ. ಈಗ ಕೊಳವಿ ಕಾಲುವೆಯಲ್ಲಿ ಅವರ ಶವ ಪತ್ತೆಯಾಗಿದೆ.
ಖಾಸಗಿ ಆಸ್ಪತ್ರೆ ಎದುರು ಕಾರು ಪಾರ್ಕಿಂಗ್ ಆಗಿದ್ದು, ಬಳಿಕ ಮೊಬೈಲ್‌ ಸ್ವಿಚ್ ಆಫ್ ಆಗಿದೆ. ಈ ಬಗ್ಗೆ ಕುಟುಂಬಿಕರು ಗೋಕಾಕ ಶಹರ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಿಸಿದ್ದರು. ಉದ್ಯಮಿಯನ್ನು ಅಪಹರಿಸಿ ಕೊಲೆಗೈದು ಕಾಲುವೆಯಲ್ಲಿ ಶವ ಎಸೆದಿರುವ ಶಂಕೆ ಉಂಟಾಗಿದೆ. ಗೋಕಾಕ ಡಿವೈಎಸ್‌ಪಿ ನೇತೃತ್ವದಲ್ಲಿ ತನಿಖೆ ತೀವ್ರಗೊಂಡಿದೆ.
ಹೆಂಡತಿ ಶೀಲದ ಬಗ್ಗೆ ಸಂಶಯ: ಹಲ್ಲೆ ತಡೆಯಲು ಬಂದ ಪುಟ್ಟ ಮಕ್ಕಳನ್ನೇ ಕೊಂದ ಧೂರ್ತ
ರಾಯಚೂರು: ಹೆಂಡತಿಗೆ ಅನೈತಿಕ ಸಂಬಂಧ ಇದೆ ಎಂದು ಶಂಕಿಸಿ ಗಲಾಟೆ ಮಾಡಿದ ಗಂಡನೊಬ್ಬ, ಮಧ್ಯೆ ಪ್ರಶ್ನಿಸಲು ಬಂದ ಮಕ್ಕಳನ್ನು ಕತ್ತು ಹಿಸುಕಿ ಕೊಲೆ ಮಾಡಿದ ಬರ್ಬರ ಘಟನೆ ನಡೆದಿದೆ.
ರಾಯಚೂರು ಜಿಲ್ಲೆಯ ದೇವದುರ್ಗ ತಾಲೂಕಿನ ಜಕ್ಕಲದೊಡ್ಡಿ ಗ್ರಾಮದಲ್ಲಿ ಘಟನೆ ನಡೆದಿದ್ದು, ನಿಂಗಪ್ಪ ಎಂಬಾತನೇ ಈ ಕ್ರೂರಿ. ಈತನ ಮಕ್ಕಳಾದ ಶಿವರಾಜ್ (5) ಮತ್ತು ರಾಘವೇಂದ್ರ (3) ಮೃತ ಬಾಲಕರು. ಹೆಂಡತಿ ಅನೈತಿಕ ಸಂಬಂಧ ಇಟ್ಟುಕೊಂಡಿದ್ದಾಳೆ ಎಂದು ಶಂಕಿಸಿ ನಿಂಗಪ್ಪ ಗಲಾಟೆ ಎಬ್ಬಿಸಿದ್ದ. ಜಗಳದಲ್ಲಿ ಮಕ್ಕಳು ಮಧ್ಯೆ ಪ್ರವೇಶಿಸಿದ್ದರು. ಇದರಿಂದ ಸಿಟ್ಟಿಗೆದ್ದ ನಿಂಗಪ್ಪ, ಈ ಮಕ್ಕಳಿಬ್ಬರು ನನಗೆ ಜನಿಸಿಲ್ಲ ಎಂದು ಅವರನ್ನು ಕತ್ತು ಹಿಸುಕಿ ಕೊಂದು ಹಾಕಿದ್ದಾನೆ. ದೇವದುರ್ಗ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ : Fraud case: ಮದುವೆಯಾಗುವುದಾಗಿ ನಂಬಿಸಿ ಲೈವ್‌ ಬ್ಯಾಂಡ್‌ ಯುವತಿಗೆ ವಂಚನೆ, ಜೆಡಿಎಸ್ ಜಿಲ್ಲಾಧ್ಯಕ್ಷನಿಗೆ ಧರ್ಮದೇಟು