ರಾಯಚೂರು: ಕೌಟುಂಬಿಕ ಕಲಹದಿಂದ (Family Dispute) ಮನನೊಂದು ಮಹಿಳೆಯೊಬ್ಬರು ಕೆರೆಗೆ ಹಾರಿ ಆತ್ಮಹತ್ಯೆಗೆ (Woman suicide) ಪ್ರಯತ್ನಿಸಿದ್ದಾರೆ. ಆದರೆ, ಅವರು ಬಚಾವಾಗಿದ್ದಾರೆ. ದುರಂತವೆಂದರೆ ರಕ್ಷಣೆಗಾಗಿ ಕೆರೆಗೆ ಜಿಗಿದ ಆಕೆಯ ಪತಿ ಮತ್ತು ಇಬ್ಬರು ಮಕ್ಕಳು ಪ್ರಾಣ ಕಳೆದುಕೊಂಡಿದ್ದಾರೆ!
ಸಿರವಾರ ಪಟ್ಟಣದ ಸೀಮಾಂತರ ವ್ಯಾಪ್ತಿಯ ಸರ್ವೇ ನಂ.68ರಲ್ಲಿ ಘಟನೆ ನಡೆದಿದೆ. ಮೃತರನ್ನು ಸಿರವಾರ ತಾಲೂಕಿನ ಲಕ್ಕಂದಿನ್ನಿ ಗ್ರಾಮದ ಮುದುಕಪ್ಪ (60), ಶಿವು (23), ಬಸವರಾಜ (20) ಎಂದು ಗುರುತಿಸಲಾಗಿದೆ.
ಇವರೆಲ್ಲರೂ ಶಿವಕುಮಾರ್ ಸೂಗಪ್ಪ ಎಂಬುವವರ ತೋಟದಲ್ಲಿ ಕಾರ್ಮಿಕರಾಗಿ ಕೆಲಸ ಮಾಡುತ್ತಿದ್ದರು ಎಂದು ತಿಳಿದು ಬಂದಿದೆ. ಆತ್ಮಹತ್ಯೆ ಯತ್ನಿಸಿದ ಮಹಿಳೆಯನ್ನು ರಕ್ಷಣೆ ಮಾಡಲಾಗಿದೆ. ಈ ಕುರಿತು ಸಿರವಾರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇವರ ಮನೆಯಲ್ಲಿ ನಿತ್ಯವೂ ನಾನಾ ಕಾರಣಕ್ಕೆ ಜಗಳ ನಡೆಯುತ್ತಿತ್ತು. ಸೋಮವಾರ ಮಧ್ಯಾಹ್ನ 2.30ರ ಹೊತ್ತಿಗೆ ಮುದುಕಪ್ಪ, ಅವರ ಪತ್ನಿ ಮಾಯಮ್ಮ, ಮಕ್ಕಳಾದ ಶಿವು ಮತ್ತು ಬಸವರಾಜ್‌ ಅವರು ಶಿವಕುಮಾರ್ ಎಂಬವರಿಗೆ ಸೇರಿದ ಕೆರೆಯ ಬಳಿ ಹೋಗಿದ್ದರು. ಅಲ್ಲಿ ಜಗಳ ತಾರಕಕ್ಕೇರಿತ್ತು ಎನ್ನಲಾಗಿದೆ. ಇದರಿಂದ ಮನನೊಂದ ತಾಯಮ್ಮ ಅವರು ಕೆರೆಗೆ ಹಾರಿದ್ದಾರೆ. ಇದನ್ನು ನೋಡಿದ ಆಕೆಯ ಪತಿ ಮತ್ತು ಮಕ್ಕಳು ನೀರಿಗೆ ಜಿಗಿದಿದ್ದಾರೆ. ದುರಂತವೆಂದರೆ ಅವರು ಮೂವರೂ ಪ್ರಾಣ ಕಳೆದುಕೊಂಡಿದ್ದಾರೆ. ಸಾರ್ವಜನಿಕರು ಸೇರಿ ಮಾಯಮ್ಮ ಅವರನ್ನು ಮಾತ್ರ ರಕ್ಷಿಸಲು ಸಾಧ್ಯವಾಯಿತು.
ಘಟನಾ ಅರಿತು ಸ್ಥಳಕ್ಕೆ ಧಾವಿಸಿದ ಅಗ್ನಿಶಾಮಕ ಸಿಬ್ಬಂದಿ, ಪೊಲೀಸರು ಮೂವರ ಶವವನ್ನು ಹೊರಗೆ ತೆಗೆದಿದ್ದಾರೆ. ಸ್ಥಳದಲ್ಲಿ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ಸಿರವಾರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕಾಲುವೆಯಲ್ಲಿ ಮುಳುಗಿ ಮೂವರು ನೀರುಪಾಲು
ಶಿವಮೊಗ್ಗ: ಶಿವಮೊಗ್ಗ – ಚಿಕ್ಕಮಗಳೂರು ಗಡಿ ಭಾಗದಲ್ಲಿರುವ ಭದ್ರಾ ಡ್ಯಾಂ ಕಾಲುವೆಯ ನೀರಿನಲ್ಲಿ ಮುಳುಗಿ ಮೂವರು ಪ್ರಾಣ ಕಳೆದುಕೊಂಡಿದ್ದಾರೆ. ಅನನ್ಯಾ (19), ಶಾಮವೇಣಿ (ಐಶಾ) (17), ಹಾಗೂ ರವಿ (28) ಎಂಬುವವರು ಸಾವು ಕಂಡ ದುರ್ದೈವಿಗಳಾಗಿದ್ದಾರೆ.
ಲಕ್ಕವಳ್ಳಿಯ ನಿವಾಸಿ ರವಿ ಎಂಬುವವರ ಮನೆಗೆ ಬೇಸಿಗೆ ರಜೆಗೆಂದು ನಂಜನಗೂಡಿನಿಂದ ಸಂಬಂಧಿಗಳು ಆಗಮಿಸಿದ್ದರಂತೆ. ಇವರೆಲ್ಲಾ ಅಣೆಕಟ್ಟು ನೋಡಲು ತೆರಳಿದ್ದರು. ಈ ವೇಳೆ ಕಾಲುವೆ ಬಳಿ ಆಟವಾಡುವ ವೇಳೆ, ಆಯತಪ್ಪಿ ಅನನ್ಯಾ ಎಂಬ ಬಾಲಕಿ ಕಾಲುವೆಯಲ್ಲಿ ಬಿದ್ದಿದ್ದಾಳೆ. ಈ ವೇಳೆ ಬಾಲಕಿ ಅನನ್ಯಾಳನ್ನು ರಕ್ಷಿಸಲು ಶಾಮವೇಣಿ (ಐಶಾ) (17) ಮುಂದಾಗಿದ್ದರಂತೆ. ಈ ವೇಳೆ ಇವರು ಕೂಡ ನೀರಿನ ಸೆಳೆತಕ್ಕೆ ಸಿಲುಕಿದ್ದಾರೆ. ಇವರನ್ನು ರಕ್ಷಿಸುವ ಸಲುವಾಗಿ ರವಿ ಎಂಬುವವರೂ ಕೂಡ ಮುಂದಾಗಿದ್ದು, ಇವರೂ ಕೂಡ ನೀರಿನ ಸೆಳೆತಕ್ಕೆ ಸಿಲುಕಿ, ಪ್ರಾಣ ಕಳೆದುಕೊಂಡಿದ್ದಾರೆ. ಘಟನೆಯಲ್ಲಿ ಮೂವರೂ ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದಾರೆ.
ಇದನ್ನೂ ಓದಿ: Murder Case: ಅಡ್ಡಾದಿಡ್ಡಿ ಇಂಡಿಕೇಟರ್‌ ಹಾಕಿಕೊಂಡು ಸಾಗುತ್ತಿದ್ದ ಕಾರು; ಪ್ರಶ್ನಿಸಿದ ಯುವಕನ ಮರ್ಡರ್‌