ತುಮಕೂರು: ಕಾಂಗ್ರೆಸ್ ಮಾಜಿ ಶಾಸಕ ಕೆ.ಎನ್.ರಾಜಣ್ಣಗೆ ಮತ ನೀಡುವಂತೆ ಬಿಜೆಪಿ ಸಂಸದ ಜಿ.ಎಸ್ ಬಸವರಾಜು ಬಹಿರಂಗವಾಗಿ ಜನರಿಗೆ ಮನವಿ ಮಾಡಿರುವುದು ಗಮನ ಸೆಳೆದಿದೆ. ಲೋಕಸಭಾ ಚುನಾವಣೆಯಲ್ಲಿ ಬೆಂಬಲ ನೀಡಿದ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ನಾಯಕ ರಾಜಣ್ಣ ಅವರ ಋಣ ತೀರಿಸಲೇಬೇಕಿದೆ ಎಂದು ಸಂಸದ (G S Basavaraj) ಹೇಳಿದ್ದಾರೆ.
ಮಧುಗಿರಿ ತಾಲೂಕು ಸುದ್ದೇಕುಂಟೆಯ ವೇಣುಗೋಪಾಲ ಸ್ವಾಮಿ ದೇವಸ್ಥಾನದ ವಿಶೇಷ ಪೂಜಾ ಕಾರ್ಯಕ್ರಮದಲ್ಲಿ ತುಮಕೂರು ಲೋಕಸಭಾ ಕ್ಷೇತ್ರದ ಸಂಸದ ಬಸವರಾಜು ಹಾಗೂ ಮಧುಗಿರಿ ಮಾಜಿ ಶಾಸಕ ಕೆ.ಎನ್.ರಾಜಣ್ಣ ಭಾನುವಾರ ಭಾಗಿಯಾಗಿದ್ದರು.
ಈ ಸಂದರ್ಭದಲ್ಲಿ ಮಾತನಾಡಿರುವ ಜಿ.ಎಸ್.ಬಸವರಾಜು, ಸಂಸದ ಆದ ಮೇಲೆ ಮಧುಗಿರಿಯ ಗಡಿಭಾಗದ ಊರಿಗೆ ಮೊದಲ ಬಾರಿಗೆ ಆಗಮಿಸಿದ್ದೇನೆ. ನನ್ನ ಸ್ನೇಹಿತನ ಸಹಕಾರದಿಂದ ನಾನು ಪಾರ್ಲಿಮೆಂಟ್ ಸದಸ್ಯನಾಗಿದ್ದೇನೆ ಹೊರತು, ನನ್ನ ವೈಯಕ್ತಿಕ ಶಕ್ತಿಯಿಂದ ಅಲ್ಲ. ಮಧುಗಿರಿ ಜನರ ಆಶೀರ್ವಾದದಿಂದ ಗೆದ್ದಿದ್ದೇನೆ. ಈ ಹಿಂದೆ ನಾನು ಲೋಕಸಭಾ ಚುನಾವಣೆಯಲ್ಲಿ ಸೋತಾಗ ಮಧುಗಿರಿಯಿಂದ 28,000 ಮತ ಬಂದಿತ್ತು. ಈ ಬಾರಿ 79,000 ಮತ ಬಂದಿದೆ. ಇದಕ್ಕೆಲ್ಲಾ ನನ್ನ ಸ್ನೇಹಿತ ಕೆ.ಎನ್.ರಾಜಣ್ಣ ಹಾಗೂ ಈ ಭಾಗದ ಜನರು ಪ್ರೀತಿ, ವಿಶ್ವಾಸ ಕಾರಣ ಎಂದು ಹೇಳಿದ್ದಾರೆ.
ಇದನ್ನೂ ಓದಿ | JP Nadda : ಶೂ ಧರಿಸಿ ಗೋಪೂಜೆ ಮಾಡಿದ್ದ ಜೆ.ಪಿ. ನಡ್ಡಾ; ಹಿಂದು ಅನ್ನೋದು ಬಿಜೆಪಿಗೆ ಚುನಾವಣೆ ವಿಷಯ ಎಂದ ಕಾಂಗ್ರೆಸ್
ರಾಜಣ್ಣ ಮೇಲಿನ ಋಣ ತೀರಿಸುವ ಕೆಲಸ ನಾನು ಮಾಡಲೇ ಬೇಕಿದೆ. ಯಾವುದೇ ಹಣ ಆಮಿಷಗಳಿಗೆ ಒಳಗಾಗಬೇಡಿ. ರಾಜಣ್ಣ ಒಳ್ಳೆಯ ಕೆಲಸಗಾರ, ಕೆಲಸ ಮಾಡುವ ವ್ಯಕ್ತಿಯನ್ನು ಜನರು ಗೆಲ್ಲಿಸಬೇಕು. ಈ ಭಾಗವನ್ನು ಇಬ್ಬರೂ ಸೇರಿ ಮತ್ತಷ್ಟು ಅಭಿವೃದ್ಧಿಪಡಿಸುತ್ತೇವೆ. ಈ ಬಾರಿ ರಾಜಣ್ಣನಿಗೆ ಮತ ಹಾಕಿ ಎಂದು ಸಂಸದ ಬಸವರಾಜು ಹೇಳಿದ್ದಾರೆ.
ಕಳೆದ ಲೋಕಸಭೆ ಚುನಾವಣೆ ವೇಳೆ ಜಿ.ಎಸ್. ಬಸವರಾಜು ಗೆಲುವಿಗೆ ಕೆ.ಎನ್ ರಾಜಣ್ಣ ಸಹಕಾರ ನೀಡಿದ್ದರು. ಮಾಜಿ ಪ್ರಧಾನಿ ದೇವೇಗೌರ ವಿರುದ್ಧ ಜಿ.ಎಸ್ ಬಸವರಾಜು ಗೆಲುವು ಸಾಧಿಸಿದ್ದರು.
ಇದನ್ನೂ ಓದಿ | Santro Ravi Case : ಗೃಹ ಸಚಿವರ ಮನೆಯಲ್ಲಿ 15 ಲಕ್ಷ ರೂ. ಎಣಿಸಿದ ಸ್ಯಾಂಟ್ರೋ ರವಿ; ವಿಡಿಯೊ ಮಾಡಿದವರ ಬಗ್ಗೆ ತನಿಖೆಯಾಗಲಿ: ಎಚ್‌ಡಿಕೆ