ಬೆಂಗಳೂರು: ಸೂಪರ್ ಮಾರ್ಕೆಟ್‌ನಲ್ಲಿ ಬಿಲ್ಲಿಂಗ್ ವಿಚಾರಕ್ಕೆ ಸಂಬಂಧಿಸಿ ಯುವಕನೊಬ್ಬ ಕಿರಿಕ್ ತೆಗೆದು ಮಹಿಳಾ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದಾನೆ. ಸೂಪರ್ ಮಾರ್ಕೆಟ್‌ನ ಮಹಿಳಾ ಸಿಬ್ಬಂದಿ ಆತನಿಗೆ ಸ್ವಲ್ಪ ಹೊತ್ತು ಕಾಯಲು ಹೇಳಿದ್ದಾರೆ. ಆದರೆ, ಆತ ಸಿಟ್ಟಿಗೆದ್ದು ಮಹಿಳೆ ಸಿಬ್ಬಂದಿಯ ಕೆನ್ನೆಗೆ (Woman Slapped) ಬಾರಿಸಿದ್ದಾನೆ.
ಜೆಪಿ ನಗರದ 4ನೇ ಹಂತದಲ್ಲಿರುವ ಸೂಪರ್ ಮಾರ್ಕೆಟ್‌ನಲ್ಲಿ ನವೆಂಬರ್‌ 14ರಂದು ಘಟನೆ ನಡೆದಿದೆ. ಬಿಲ್ಲಿಂಗ್ ಕೌಂಟರ್‌ನಲ್ಲಿ ವಯಸ್ಸಾದ ವ್ಯಕ್ತಿಯೊಬ್ಬರು ಸಾಮಗ್ರಿಗಳನ್ನು ಇಟ್ಟು ಬಿಲ್‌ ಮಾಡಿಸುತ್ತಿದ್ದರು. ಈ ವೇಳೆ ಅವರ ಹಿಂದೆ ಬಂದ ಯುವಕ ಹಿಂದೆ ನಿಲ್ಲುವ ಬದಲು ತಾನೇ ಮುಂದೆ ಹೋಗಿ ಬಿಲ್‌ ಮಾಡಿಸಲು ಪ್ರಯತ್ನಿಸಿದ. ಆಗ ಬಿಲ್‌ ಮಾಡುತ್ತಿದ್ದ ಸಿಬ್ಬಂದಿ ಎದುರುಗಡೆ ಹಿರಿಯರಿದ್ದಾರೆ. ಸ್ವಲ್ಪ ಹೊತ್ತು ಕಾಯಿರಿ ಎಂದಿದ್ದಾರೆ. ಇದರಿಂದ ಸಿಟ್ಟಿಗೆದ್ದ ಆತ I’m not Respecting old People (ನಾನು ವೃದ್ಧರಿಗೆ ಗೌರವ ಕೊಡುವುದಿಲ್ಲ) ಎಂದವನೇ ಸಿಬ್ಬಂದಿ ಸುಜಾತ ಎಂಬುವವರ ಮೇಲೆ ಹಲ್ಲೆ ನಡೆಸಿದ್ದಾನೆ.
ಯಲಹಂಕ ನಿವಾಸಿಯಾಗಿರುವ ಸುಜಾತರವರ ಮೇಲೆ ಹಲ್ಲೆ ನಡೆಸಿರುವ ವಿಡಿಯೊ ಮಾರ್ಕೆಟ್‌ನ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಯುವಕ ಹಲ್ಲೆ ನಡೆಸಿದಾಗ ಕೂಡಲೇ ಮಹಿಳೆ ರಕ್ಷಣೆಗೆ ಮಾರ್ಕೆಟ್ ಸಿಬ್ಬಂದಿ ಧಾವಿಸಿದ್ದಾರೆ. ಯುವಕನೊಂದಿಗೆ ಬಂದಿದ್ದ ಮಹಿಳೆ ಆತನನ್ನು ಕರೆದೊಯ್ದಲು ಮುಂದಾಗಿದ್ದಾರೆ, ಹೊರಗೆ ಬರುವಾಗ ಅಲ್ಲೆ ಇದ್ದ ವೃದ್ಧರ ಮೇಲೂ ಹಲ್ಲೆ ನಡೆಸಿದ್ದಾನೆ. ಘಟನೆ ಸಂಬಂಧ ಪೊಲೀಸರಿಗೆ ಮಾಹಿತಿ ನೀಡಲಾಗಿದ್ದು, ಪುಟ್ಟೇನಹಳ್ಳಿ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ.
ಇದನ್ನೂ ಓದಿ | Love jihad | 7 ವರ್ಷದ ಮಗುವನ್ನೂ ತೊರೆದು ನಾಪತ್ತೆ ಆಗಿದ್ದ ಶಿಕ್ಷಕಿ ಮಂತ್ರಾಲಯದಲ್ಲಿ ಪತ್ತೆ, ಆಕೆ ಹೇಳಿದ್ದೇನು?