ಬೆಂಗಳೂರು: ಸಿಎಂ ಸಿದ್ದರಾಮಯ್ಯ ಅವರು ಬಜೆಟ್ನಲ್ಲಿ ಘೋಷಿಸಿರುವ ಯೋಜನೆಗಳು ಅನುಷ್ಠಾನಗೊಂಡರೆ ಕರ್ನಾಟಕದ ಕರಾವಳಿ ಪ್ರದೇಶದ ನದಿ ನೀರಿನಲ್ಲಿ ವಾಟರ್ ಮೆಟ್ರೊ ಓಡಲಿದೆ. ಇದರಿಂದ ಪ್ರವಾಸೋದ್ಯಮಕ್ಕೆ ಉತ್ತೇಜನ ಸಿಗುವ ಜತೆಗೆ ಜನರ ಓಡಾಟಕ್ಕೂ ಅನುಕೂಲವಾಗಲಿದೆ.
ಬಜೆಟ್ ಮಂಡಿಸಿದ ಸಿದ್ದರಾಮಯ್ಯ ಅವರು ಮಂಗಳೂರಿನ ಗುರುಪುರ ಹಾಗೂ ನೇತ್ರಾವತಿ ನದಿಗಳಲ್ಲಿ ಜಲಮೆಟ್ರೋ ಸೇವೆಗಳನ್ನು ಪರಿಚಯಿಸಲು ಕಾರ್ಯಸಾಧ್ಯತಾ ವರದಿಯನ್ನು ತಯಾರಿಸಲಾಗುವುದು ಎಂದು ಹೇಳಿದರು. ಹೀಗಾಗಿ ಏನಿದು ಮೆಟ್ರೊ ಎಂಬ ಕುತೂಹಲ ಮೂಡಿದೆ. ಅದರ ವಿವರ ಇಲ್ಲಿದೆ.
ವಾಟರ್ ಮೆಟ್ರೋ ಎಂಬುದು ಬ್ಯಾಟರಿ ಚಾಲಿತ ಎಲೆಕ್ಟ್ರಿಕ್‌ ಬೋಟ್ಗಳಾಗಿವೆ. ನಗರ ಸಮೂಹ ಸಾರಿಗೆ ವ್ಯವಸ್ಥೆಯ ಮಾದರಿಯಲ್ಲೇ ಇದು ಕೂಡ ಕಾರ್ಯಾಚರಿಸುತ್ತದೆ. ಮೊದಲ ವಾಟರ್ ಮೆಟ್ರೋ ಸೇವೆ ಆರಂಭಗೊಂಡಿದ್ದು ಕೇರಳದ ಕೊಚ್ಚಿನ್ನಲ್ಲಿ . ಈ ಹೈಬ್ರಿಡ್ ಬೋಟ್‌ಗಳು ಕೊಚ್ಚಿನ್ ಸುತ್ತಮುತ್ತ ಇರುವ 10 ದ್ವೀಪಗಳಿಗೆ ಸಂಪರ್ಕ ಕಲ್ಪಿಸುತ್ತವೆ.
ಬ್ಯಾಟರಿ ಮತ್ತು ಡೀಸೆಲ್ ಚಾಲಿತ ಮೋಟಾರ್ ಇದರಲ್ಲಿದೆ. ಅಗತ್ಯಕ್ಕೆ ಅನುಗುಣವಾಗಿ ಇದು ಬೇಕಾದ ಇಂಧನ ಬಳಸಿಕೊಂಡು ಸಂಚರಿಸುತ್ತದೆ. ರಾತ್ರಿ ಪ್ರಯಾಣಕ್ಕೆ ಅನುಕೂಲವಾಗುವಂತೆ ಕ್ಯಾಪ್ಟನ್ಗೆ ಥರ್ಮಲ್ ವ್ಯವಸ್ಥೆ ಕಲ್ಪಿಸಲಾಗುತ್ತದೆ. ಅಪಘಾತ ತಪ್ಪಿಸಲು ರಾಡಾರ್ ವ್ಯವಸ್ಥೆ ಕೂಡ ಇದೆ. ಕೇವಲ 15 ನಿಮಿಷದಲ್ಲೇ ಇದು ರಿಚಾರ್ಜ್ ಆಗುವ ಸಾಮರ್ಥ್ಯ ಹೊಂದಿದೆ. ಇದು ಒಂದು ಗಂಟೆಗೆ 10 ನಾಟಿಕಲ್ ಮೈಲು ವೇಗದಲ್ಲಿ ಸಂಚರಿಸುತ್ತದೆ.
ಇದನ್ನೂ ಓದಿ : Karnataka Budget 2024: ತೀರ್ಥ ಯಾತ್ರಿಕರಿಗೆ ವಸತಿ, ಅರ್ಚಕರ ಖಾತೆಗೆ ನೇರ ಹಣ; ಸಿದ್ದು ಘೋಷಣೆ
ಕರ್ನಾಟಕದಲ್ಲಿ ದಕ್ಷಿಣ ಕನ್ನಡದ ಮಂಗಳೂರಿನ ಗುರುಪುರ ಹಾಗೂ ನೇತ್ರಾವತಿ ನದಿಗಳಲ್ಲಿ ಜಲಮೆಟ್ರೋ ಸೇವೆ ಪರಿಚಯಿಸಲು ಸರ್ಕಾರ ಚಿಂತನೆ ನಡೆಸಿದೆ. ನದಿ ಸಮುದ್ರಕ್ಕೆ ಸೇರುವ ಅಳಿವೆ ಪ್ರದೇಶದಲ್ಲಿರುವ ಜನರ ಸಂಚಾರಕ್ಕೆ ಇದನ್ನು ಬಳಸಬಹುದು ಎಂದು ಹೇಳಲಾಗಿದೆ.
ಕೇರಳದ ಜಲ ಮೆಟ್ರೊದ ವಿಶೇಷತೆ ಏನು?
- ಕೇರಳದ ಕರಾವಳಿಯಲ್ಲಿರುವ ಈ ವಾಟರ್ ಮೆಟ್ರೋ ನಗರ ಸಮೂಹ ಸಾರಿಗೆ ವ್ಯವಸ್ಥೆಯ ಮಾದರಿಯಲ್ಲೇ ಕಾರ್ಯನಿರ್ವಹಿಸುತ್ತಿದೆ.
- ಕೊಚ್ಚಿ ವಾಟರ್ ಮೆಟ್ರೊ ಬ್ಯಾಟರಿಯಿಂದ ಕಾರ್ಯನಿರ್ವಹಿಸುತ್ತಿದ್ದು, ಪರಿಸರ ಸ್ನೇಹಿ/
- ಕೊಚ್ಚಿಯ ಜಲ ಮೆಟ್ರೋ 747 ಕೋಟಿ ರೂಪಾಯಿ ಗಾತ್ರದ ಯೋಜನೆಯಾಗಿದೆ.
- ಕೊಚ್ಚಿ ನಗರ ಮೆಟ್ರೋ ರೈಲು ಹಾಗೂ ಜಲ ಮೆಟ್ರೊ ಹೊಂದಿರುವ ಭಾರತದ ಏಕೈಕ ಮೆಟ್ರೊ ನಗರ.
- ಕೊಚ್ಚಿನ್ ವಾಟರ್ ಮೆಟ್ರೋ ಏಷ್ಯಾದ ಬಲಿಷ್ಠ ಜಲ ಸಾರಿಗೆ ವ್ಯವಸ್ಥೆಯಾಗಿದೆ. 76 ಕಿ.ಮೀ. ಉದ್ದ ಜಲ ಮಾರ್ಗದಲ್ಲಿ 38 ಸ್ಟೇಷನ್ಗಳನ್ನು ಹೊಂದಿದೆ.
- ಕೊಚ್ಚಿನ್ನಲ್ಲಿ 80ಕ್ಕೂ ಅಧಿಕ ಮೆಟ್ರೋ ಬೋಟ್‌ಗಳಿವೆ. ಇದರಲ್ಲಿ 50 ರಿಂದ 100 ಆಸನಗಳಿವೆ. ಪ್ರಾಥಮಿಕ ಹಂತದಲ್ಲಿ ಕೊಚ್ಚಿನ್ ಶಿಪ್ಯಾರ್ಡ್ಗಳು ಆರು ಬೋಟ್ಗಳನ್ನು ನಿರ್ಮಾಣ ಮಾಡಿದೆ.
- ಜಲ ಮೆಟ್ರೋ ಟಿಕೆಟ್‌ಗಳನ್ನು ಆನ್‌ಲೈನ್‌ನಲ್ಲಿ ಬುಕ್ ಮಾಡಬಹುದು. ಕೊಚ್ಚಿ ವಾಟರ್ ಮೆಟ್ರೋದಲ್ಲಿ ಪ್ರಯಾಣಿಸಲು ‘ಕೊಚ್ಚಿ 1’ ಕಾರ್ಡ್ ಕೂಡ ಲಭ್ಯವಿದೆ.
- ಜಲ ಮೆಟ್ರೋ ಪ್ರಯಾಣ ದರ ಕನಿಷ್ಠ 20 ರೂಪಾಯಿ, ಗರಿಷ್ಠ 40 ರೂಪಾಯಿ. ನಿತ್ಯ ಪ್ರಯಾಣಿಸುವವರು 180 ರೂಪಾಯಿಯ ದಿನದ ಹಾಗೂ 1,500 ರೂಪಾಯಿವರೆಗಿನ ಮಾಸಿಕ ಪಾಸ್ ಪಡೆಯಲು ಸಾಧ್ಯ.