ಹೊನ್ನಾವರ: ತಾಲೂಕಿನ ಕರ್ಕಿ ತೊಪ್ಪಲಕೇರಿಯಲ್ಲಿ ಯುವಕನೊಬ್ಬ ತನ್ನ ತಂದೆಯನ್ನೇ ಬರ್ಬರವಾಗಿ ಕೊಲೆ ಮಾಡಿದ (Man kills his father) ಘಟನೆ ಶುಕ್ರವಾರ ನಡೆದಿದೆ. ತೊಪ್ಪಲ ಕೇರಿಯ ನಿವಾಸಿ, ವೃತ್ತಿಯಲ್ಲಿ ಕಾರ್ಪೆಂಟರ್ ಆಗಿದ್ದ ಪಾಂಡುರಂಗ ಶೇಷಯ್ಯ ಮೇಸ್ತಾ (62) ಎಂಬವರನ್ನು ಅವರ ಮಗ ಭರತ್‌ ಮೇಸ್ತಾ (26) ಕೊಲೆ ಮಾಡಿದ್ದಾನೆ.
ಅವರಿಬ್ಬರ ಮಧ್ಯೆ ಹಿಂದಿನಿಂದಲೂ ಉತ್ತಮ ಸಂಬಂಧವೇನೂ ಇದ್ದಂತಿಲ್ಲ. ಇದಕ್ಕಾಗಿ ಕೊಲೆಗೆ ಸಮಯ ಸಾಧಿಸುತ್ತಿದ್ದವನಂತೆ ಇದ್ದ ಭರತ್‌ ಶುಕ್ರವಾರ ಮಧ್ಯಾಹ್ನ 3 ಗಂಟೆಗೆ ಅದಕ್ಕಾಗಿ ಸರ್ವ ರೀತಿಯಲ್ಲೂ ಸಜ್ಜಾಗಿದ್ದ.
ಕೊಲೆ ಮಾಡುವ ಉದ್ದೇಶದಿಂದಲೇ ಮನೆಯಲ್ಲಿದ್ದ ಗ್ರೈಂಡರ್‌ನ ಕಬ್ಬಿಣದ ಸ್ಟ್ಯಾಂಡ್‌ನಿಂದ ತನ್ನ ತಂದೆಯ ತಲೆಗೆ ಬಲವಾಗಿ ಹೊಡೆದು, ಕೈಗೆ ಸಿಕ್ಕ ಚಾಕುವಿನಿಂದ ಇರಿದು ಗಾಯಗೊಳಿಸಿ ಕೊಲೆ ಮಾಡಿದ್ದಾನೆ ಎನ್ನಲಾಗಿದೆ.
ಈ ಕುರಿತು ಆರೋಪಿಯ ಸಹೋದರ ವಿಶಾಲ್ ಪಾಂಡುರಂಗ ಮೇಸ್ತ ತನ್ನ ತಮ್ಮನ ವಿರುದ್ಧ ಹೊನ್ನಾವರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲು ವಿನಂತಿಸಿದ್ದಾರೆ. ಘಟನೆ ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಕಲಬುರಗಿಯಲ್ಲಿ ಭೀಕರ ಅಪಘಾತ: ದಂಪತಿ ಸ್ಥಳದಲ್ಲೇ ಮೃತ್ಯು
ಕಲಬುರಗಿ: ಕಲಬುರಗಿಯಲ್ಲಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.
ಕಲಬುರಗಿಯ ರಾಮಮಂದಿರದ ಬಳಿಯ ಸರ್ವಜ್ಞ ಸ್ಕೂಲ್ ಹತ್ತಿರ ಟಿಪ್ಪರ್ ಹಾಗೂ ದ್ವಿಚಕ್ರ ವಾಹನ ನಡುವೆ ಅಪಘಾತ ಸಂಭವಿಸಿದೆ. ದ್ವಿಚಕ್ರ ವಾಹನದಲ್ಲಿದ್ದ ದಂಪತಿ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ. ಜತೆಗಿದ್ದ ಮೂರು ವರ್ಷದ ಮಗು ಪ್ರಾಣಾಪಾಯದಿಂದ ಪಾರಾಗಿದೆ.
ಮೃತರನ್ನು ರಾಣೋಜಿ(42) ಹಾಗೂ ಸುಜಾತ(35) ಎಂದು ಗುರುತಿಸಲಾಗಿದೆ. ರಾಮಮಂದಿರ ಕಡೆಯಿಂದ ಉದನೂರು ಕಡೆ ಹೊರಟಿದ್ದ ಮರಳು ತುಂಬಿದ್ದ ಟಿಪ್ಪರ್ ಟಿಪ್ಪರ್ ಬೈಕ್ ಸವಾರರು ರಸ್ತೆ ಕ್ರಾಸ್ ಮಾಡುವಾಗ ಡಿಕ್ಕಿ ಹೊಡೆದಿದೆ. ಘಟನೆ ಬಳಿಕ ಚಾಲಕ ಟಿಪ್ಪರ್ ಸ್ಥಳದಲ್ಲೇ ಬಿಟ್ಟು ಪರಾರಿಯಾಗಿದ್ದಾನೆ. ದಂಪತಿ ಕೂಲಿ ಕೆಲಸ ಮುಗಿಸಿಕೊಂಡು ಮನೆಗೆ ಹೊರಟಿದ್ದರು. ಸ್ಥಳಕ್ಕೆ ಕಲಬುರಗಿ ಸಂಚಾರಿ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದ್ದಾರೆ.
ಅದಿರು ವಾಹನ ಪಲ್ಟಿಯಾಗಿ ಚಾಲಕ ಸಾವು
ಕೊಪ್ಪಳ: ಅದಿರು ತುಂಬುವ ವಾಹನ ಪಲ್ಟಿಯಾಗಿ ಚಾಲಕ ಸ್ಥಳದಲ್ಲೇ ಸಾವಿಗೀಡಾದ ಘಟನೆ ನಡೆದಿದೆ. ಕೊಪ್ಪಳ ತಾಲೂಕಿನ ಹಿರೇಬಗನಾಳ ಬಳಿ ಇರುವ ವನ್ಯ ಸ್ಟೀಲ್ ಕಾರ್ಖಾನೆಯಲ್ಲಿ ಈ ದುರ್ಘಟನೆ ನಡೆದಿದೆ. ಯಮನೂರಪ್ಪ ಬಿಳೇಬಾವಿ ಮೃತ ಚಾಲಕ. ಅದಿರು ತುಂಬುವಾಗ ವಾಹನ ಪಲ್ಟಿಯಾಗಿತ್ತು. ವಾಹನದ ಬುಡದಲ್ಲಿ ಸಿಲುಕಿಕೊಂಡು ಚಾಲಕ ಸಾವಿಗೀಡಾಗಿದ್ದಾನೆ. ಮುನಿರಾಬಾದ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ : Fraud Case: ಕಾಲೇಜು ಸೀಟು ಕೊಡಿಸುವುದಾಗಿ 100ಕ್ಕೂ ಹೆಚ್ಚು ವಿದೇಶಿ ವಿದ್ಯಾರ್ಥಿಗಳಿಗೆ ವಂಚನೆ