ಬೆಂಗಳೂರು: ಮತದಾರರ ಪಟ್ಟಿ ಹಗರಣ ಎನ್ನುವುದೇನಾದರೂ ಆಗಿದ್ದರೆ ಅದಕ್ಕೆ ಮೂಲಕಾರಣ ಕಾಂಗ್ರೆಸ್ ನಾಯಕ ಸಿದ್ದರಾಮಯ್ಯ. ಕಾಂಗ್ರೆಸ್ ಅಧಿಕಾರ‌ದ ಅವಧಿಯಲ್ಲಿ ಚುನಾವಣೆಗೆ ಒಂದು ವರ್ಷವಿದ್ದಾಗ ಅಂದರೆ 201೭ರಲ್ಲಿ ಚಿಲುಮೆ ಸಂಸ್ಥೆಗೆ ಕಾನೂನು ಬಾಹಿರವಾಗಿ ಮತದಾರರ ಪಟ್ಟಿ ಪರಿಷ್ಕರಣೆಗೆ ಅನುಮತಿ ಕೊಡಲಾಗಿತ್ತು ಎಂದು ಕಾಂಗ್ರೆಸ್ ನಾಯಕರ ವಿರುದ್ಧ ಬಿಜೆಪಿ ರಾಜ್ಯ ಪ್ರಧಾನ ಕಾರ್ಯದರ್ಶಿ ಎನ್‌.ರವಿಕುಮಾರ್ ಆರೋಪಿಸಿದ್ದಾರೆ.
ಕೇಂದ್ರ ಚುನಾವಣಾ ಆಯೋಗಕ್ಕೆ ಕಾಂಗ್ರೆಸ್ ದೂರು ನೀಡಿರುವ ಹಿನ್ನೆಲೆಯಲ್ಲಿ ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಕಾಂಗ್ರೆಸ್ ಸರ್ಕಾರದಲ್ಲಿ ಚುನಾವಣಾ ಪೂರ್ವದಲ್ಲಿ ಚಿಲುಮೆ ಸಂಸ್ಥೆಯನ್ನು ತಮ್ಮ ಅಕ್ರಮಗಳಿಗೆ ಬಳಸಿಕೊಂಡಿರುವ ಸಾಧ್ಯತೆಯಿದೆ. ಈಗಿನ ಸರ್ಕಾರ ಯಾವಾಗ ಚಿಲುಮೆ ಸಂಸ್ಥೆಯ ಅಕ್ರಮದ ವಿರುದ್ಧ ಕ್ರಮ ತೆಗೆದುಕೊಳ್ಳಲು ಪ್ರಾರಂಭಿಸಿದ್ದರಿಂದ ಕಾಂಗ್ರೆಸ್ ನಾಯಕರು ತಮ್ಮ ಅಕ್ರಮ ಬಯಲಾಗುವ ಮುನ್ನ ತನಿಖೆಯನ್ನು ದಾರಿ ತಪ್ಪಿಸುವ ದುರುದ್ದೇಶದಿಂದ ಈ ರೀತಿ ಬಿಜೆಪಿ ಸರ್ಕಾರದ ವಿರುದ್ಧ ಆರೋಪಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.
ಕಾಂಗ್ರೆಸ್ ನಾಯಕರಿಗೆ ಎನ್‌.ರವಿಕುಮಾರ್ ಕೆಲ ಪ್ರಶ್ನೆ ಹಾಗೂ ಸವಾಲು
- ಸುರ್ಜೇವಾಲಾ ಅವರೇ, ಈ ಪ್ರಕರಣದಲ್ಲಿ ಕಿಂಗ್‌ಪಿನ್ ನಿಮ್ಮ ಪಕ್ಕದಲ್ಲೇ ಇರುವ ಸಿದ್ದರಾಮಯ್ಯ, ನಿಮಗೇನಾದರೂ ನೈತಿಕತೆಯಿದ್ದರೆ ಅವರನ್ನು ಪ್ರತಿಪಕ್ಷ ನಾಯಕ ಸ್ಥಾನದಿಂದ ತೆಗೆದುಹಾಕಿ.
- ಸುರ್ಜೇವಾಲಾ ಅವರೇ, ನೀವು ಒಮ್ಮೆಯೂ ಚುನಾವಣೆಯನ್ನು ಗೆಲ್ಲದ, ನಾಲ್ಕೂ ಬಾರಿ ಚುನಾವಣೆಯಲ್ಲಿ ಸೋತಿರುವ ಕಾಂಗ್ರೆಸ್‌ನ ಮಹಾ ನಾಯಕರು ಎಂಬುವುದು ಗೊತ್ತಿದೆ. ನೀವಿಲ್ಲಿ ಭ್ರಷ್ಟಾಚಾರವನ್ನೇ ತಮ್ಮ ವೃತ್ತಿ ಮಾಡಿಕೊಂಡಿರುವ ಕಾಂಗ್ರೆಸ್ ನಾಯಕರನ್ನು ಮುಂದಿಟ್ಟುಕೊಂಡು ಕಾಂಗ್ರೆಸ್ ಅನ್ನು ಗೆಲ್ಲಿಸುತ್ತೇನೆ ಎಂದು ಈಗ ಕರ್ನಾಟಕಕ್ಕೆ ಬಂದಿದ್ದೀರಿ, ನಿಮ್ಮ ಅಕ್ಕಪಕ್ಕದಲ್ಲೇ ಕಿಂಗ್‌ಪಿನ್‌ಗಳಿದ್ದಾರೆ. ಆದರೆ ನಿಮ್ಮ ಕಿವಿಗೆ ಹೂವಿಟ್ಟು ನಿಮ್ಮ ಬಾಯಲ್ಲಿ ಬೊಮ್ಮಾಯಿಯವರ ಹೆಸರು ಹೇಳಿಸುತ್ತಿರುವವರೇ ಈ ಪ್ರಕರಣದ ಕಿಂಗ್ ಪಿನ್ ಸಿದ್ದರಾಮಯ್ಯ.
- ಪ್ರಥಮ ಮಾಹಿತಿಯಂತೆ ಕಾನೂನು ಪ್ರಕಾರ ಎಫ್‌ಐಆರ್‌ ದಾಖಲಾಗಿದೆ, ತನಿಖೆಯಾಗುತ್ತಿದೆ. ತನಿಖೆಯಲ್ಲಿ ನಿಮ್ಮ ಕಾಂಗ್ರೆಸ್ ನಾಯಕರ ಬಂಡವಾಳ ಬಯಲಾಗುವುದು ನಿಶ್ಚಿತ. ನೀವೆಂತಹ ಸುಳ್ಳುಕೋರರು ಎಂಬುವುದು ಎಲ್ಲರಿಗೂ ಗೊತ್ತಿದೆ. ನಿಮ್ಮ ಸುಳ್ಳುಗಳನ್ನು ನಂಬಿಕೊಂಡು ತನಿಖೆ ಮಾಡುವಷ್ಟು ದಡ್ಡರಲ್ಲ ತನಿಖಾ ಅಧಿಕಾರಿಗಳು. ತಾಳ್ಮೆಯಿಂದಿರಿ, ತಪ್ಪು ಮಾಡಿದವರು ಶಿಕ್ಷೆ ಅನುಭವಿಸುತ್ತಾರೆ. ನೀವು ಪದೇಪದೆ ಮುಖ್ಯಮಂತ್ರಿಗಳ ಹೆಸರು ಹೇಳಿದರೆ, ನಿಮ್ಮ ಸುಳ್ಳುಗಳು ಸತ್ಯವಾಗುವುದಿಲ್ಲ.
- ಇಲ್ಲಿ ಭ್ರಷ್ಟ ಅಧಿಕಾರಿಗಳ ವಿರುದ್ಧ ದೂರು ದಾಖಲಾಗಿದೆ, ತನಿಖೆಯಾಗುತ್ತಿದೆ. ಸಿದ್ದರಾಮಯ್ಯನವರೂ ಸೇರಿ ಒಬ್ಬೊಬ್ಬರೇ ಕಾಂಗ್ರೆಸ್ ನಾಯಕರ ಬಂಡವಾಳ ಬಯಲಾಗುತ್ತಿದೆ. ಇದನ್ನು ಮರೆಮಾಚಲು ನೀವು ಮುಖ್ಯಮಂತ್ರಿಗಳ ಮತ್ತು ಪಾಲಿಕೆ ಆಯುಕ್ತರ ವಿರುದ್ಧ ದೂರು ದಾಖಲಿಸಿಲ್ಲ ಎನ್ನುವುದು ನಿಮ್ಮ ಅಜ್ಞಾನವೋ ಅಥವಾ ನಿಮ್ಮವರನ್ನು ರಕ್ಷಿಸಿಕೊಳ್ಳುವ ಹುನ್ನಾರವೋ? ನೀವೇ ಹೇಳಬೇಕು.
- ಹೌದು ಮಿಸ್ಟರ್ ಸುರ್ಜೇವಾಲಾ, ನಿಮ್ಮ ಆರೋಪ ಸುಳ್ಳು. ನಿಜ ಏನೆಂದರೆ ಈ ಪ್ರಕರಣದಲ್ಲಿ ಸಿದ್ದರಾಮಯ್ಯನವರೇ ಮೊದಲ ಆರೋಪಿಯಾಗಬೇಕಿತ್ತು. ಇನ್ನು, ಪ್ರಕರಣದಲ್ಲಿ ಅಕ್ರಮದ ಮಾಹಿತಿ ತಿಳಿದ ತಕ್ಷಣ ಸರ್ಕಾರ ದೂರು ದಾಖಲಿಸಿಕೊಂಡು ತನಿಖೆ ಮಾಡಲು ತಿಳಿಸಿದೆ. ಆದರೆ ಪ್ರಕರಣದಲ್ಲಿ ತನಿಖೆಯ ದಾರಿ ತಪ್ಪಿಸಿ ಜನರಿಗೆ ಸುಳ್ಳು ಮಾಹಿತಿ ಕೊಡುತ್ತಾ ಕಾಂಗ್ರೆಸ್‌ನಲ್ಲಿರುವ ಭ್ರಷ್ಟರನ್ನು ರಕ್ಷಿಸುವ ಪ್ರಯತ್ನ ಮಾಡುತ್ತಿರುವುದು ಕಾಂಗ್ರೆಸ್.
- ನಿಜಕ್ಕೂ ಕನ್ನಡಿಗರನ್ನು ದಾರಿ ತಪ್ಪಿಸುತ್ತಿರುವುದು ಕಾಂಗ್ರೆಸ್. ಕಾಂಗ್ರೆಸ್ ಆರೋಪ ಮಾಡುವ ಮೊದಲೇ ಈ ಪ್ರಕರಣದಲ್ಲಿ ದೂರು ದಾಖಲಾಗಿದೆ. ಪ್ರಕರಣದ ತನಿಖೆಯಲ್ಲಿ ಎಲ್ಲಿ ತಮ್ಮ ಅಕ್ರಮಗಳು ಬೆಳಕಿಗೆ ಬಂದು ಬಿಡುತ್ತೋ ಎಂಬ ಭಯದಿಂದ ಕಾಂಗ್ರೆಸ್ಸಿನ ಅತಿರಥ ಮಹಾರಥ ಭ್ರಷ್ಟರೆಲ್ಲ ಸೇರಿ ಸಂಚು ಮಾಡಿ ವ್ಯವಸ್ಥಿತವಾಗಿ ಸಾರ್ವಜನಿಕರಿಗೆ ಸುಳ್ಳು ಮಾಹಿತಿ ಕೊಟ್ಟು ಸುಳ್ಳು ಆರೋಪ ಮಾಡುತ್ತಿದ್ದಾರೆ.
- ತಲೆಬುಡವಿಲ್ಲದ ಆರೋಪ ಮಾಡುವುದರಲ್ಲಿ ಕಾಂಗ್ರೆಸ್ಸಿಗರು ನಿಸ್ಸೀಮರು ಎನ್ನುವುದಕ್ಕೆ ಇದಕ್ಕಿಂತ ಉದಾಹರಣೆ ಬೇಕೇ? ಇವೆಲ್ಲ ಡಿಕೆಶಿಯವರ ವ್ಯವಸ್ಥಿತ ಸುಳ್ಳುಗಳ ಒಂದು ಭಾಗ ಅಷ್ಟೇ.
- ತನಿಖಾಧಿಕಾರಿಗಳಿಗೆ ತಿಳಿಯುವ ಮೊದಲೇ ಕಾಂಗ್ರೆಸ್ಸಿಗರಿಗೆ ತಿಳಿಯುತ್ತೆ ಏನೇನು ಕಳ್ಳತನ ಆಗಿದೆ ಅಂತ. ಯಾಕೆಂದರೆ ಕದ್ದವರು ಅವರೇ ಅಲ್ಲವೇ, ಕದ್ದವರಿಗೆ ಗೊತ್ತಿರುತ್ತೆ ಏನೇನು ಕಳ್ಳತನವಾಗಿದೆ ಅಂತ. ಕೂಲಂಕಷವಾಗಿ ತನಿಖೆಯಾಗುತ್ತಿದೆ,ಎಲ್ಲಾ ಕಳ್ಳರು ಸಿಗುತ್ತಾರೆ ಎಂದು ಕಾಂಗ್ರೆಸ್ ನಾಯಕರು ಭಯದಿಂದ ಮೈಪರಚಿಕೊಳ್ಳುತ್ತಿದ್ದಾರೆ ಅಷ್ಟೇ ಹಾಗೂ ಯಾವುದನ್ನು ಸೀಜ್ ಮಾಡಬೇಕು ಯಾವುದನ್ನು ಸೀಜ್ ಮಾಡಬಾರದು ಎಂಬುವುದು ತನಿಖಾಧಿಕಾರಿಗಳಿಗೆ ಗೊತ್ತಿದೆ. ಕಾಂಗ್ರೆಸ್ ನಾಯಕರು ಭಯದಿಂದ ತಮ್ಮ ಹುಚ್ಚುತನದ ಸಲಹೆಗಳನ್ನು ಕೊಡುವುದನ್ನು ನಿಲ್ಲಿಸಿದರೆ ಸಾಕು.
- ಕಾಂಗ್ರೆಸ್ ನಾಯಕರೇ ತಾಳ್ಮೆವಹಿಸಿ, ಚಿಲುಮೆ ಸಂಸ್ಥೆ ಯಾವಾಗ ಹುಟ್ಟಿತು, ಅದನ್ನು ಯಾರ ಸರ್ಕಾರ ಇದ್ದಾಗ ನೇಮಿಸಿಕೊಂಡಿದ್ದರು. ಯಾರ ಆಣತಿಯಂತೆ ಅದು ಕೆಲಸ ಮಾಡುತ್ತಿತ್ತು, ಯಾರಿಗೆ ಅಕ್ರಮದ ಲಾಭವಾಗುತ್ತಿತ್ತು. ಎಲ್ಲವೂ ತನಿಖೆಯಲ್ಲಿ ಹೊರಬರುತ್ತದೆ. ಒಂದಂತೂ ಸತ್ಯ ಇವೆಲ್ಲಕ್ಕೂ ಉತ್ತರ ಕಾಂಗ್ರೆಸ್ ಮತ್ತು ಸಿದ್ದರಾಮಯ್ಯ ಎನ್ನುವುದು ಸತ್ಯ, ಅದೂ ಕೂಡ ತನಿಖೆಯಿಂದ ಹೊರಬರುತ್ತದೆ.
- ಸುರ್ಜೇವಾಲಾರವರೇ ನೀವು ಬಿಜೆಪಿಯ ವಿರುದ್ಧ ಮಾಡುತ್ತಿರುವ ಆರೋಪ ಸುಳ್ಳು ಅಷ್ಟೇ. ಆದರೆ ಎಫ್‌ಐಆರ್‌ ಆದಮೇಲೆ ಇದರಲ್ಲಿ ಸಿದ್ದರಾಮಯ್ಯನವರೇ ಕಿಂಗ್‌ಪಿನ್ ಎನ್ನುವುದನ್ನು ಹಲವು ದಾಖಲೆಗಳು ಸಾರಿ ಸಾರಿ ಹೇಳುತ್ತಿವೆ.
- ಆಧಾರ ರಹಿತ ಆರೋಪ ಮಾಡುವುದರಲ್ಲಿ ಕಾಂಗ್ರೆಸ್ಸಿಗರು ಪಳಗಿದ್ದಾರೆ. ಯಾವುದೇ ವಿಚಾರವಿರಲಿ ಸುಳ್ಳುಗಳನ್ನು ಸತ್ಯದಂತೆ ಬಿಂಬಿಸುವುದರಲ್ಲಿ ಕಾಂಗ್ರೆಸ್ ಎತ್ತಿದ ಕೈ. ಯಾರೇ ತಪ್ಪು ಮಾಡಿದ್ದರೂ ಶಿಕ್ಷೆಯಾಗುತ್ತೆ, ಆದರೆ ಸುರ್ಜೇವಾಲಾ ಮತ್ತು ಕಾಂಗ್ರೆಸ್ ನಾಯಕರು ತನಿಖೆಗೆ ಅಡ್ಡಿಪಡಿಸದೇ ತನಿಖೆ ನಡೆಯಲು ಬಿಡಬೇಕಷ್ಟೆ.
- ಚಿಲುಮೆ ಸಂಸ್ಥೆಯನ್ನು 2017ರಲ್ಲಿ ಕಾನೂನು ಬಾಹಿರವಾಗಿ ನೇಮಿಸಿಕೊಂಡಿದ್ದು ಯಾರು ಸಿದ್ದರಾಮಯ್ಯನವರೇ. ಮತದಾರರ ಪಟ್ಟಿ ಪರಿಷ್ಕರಣೆ ಕೆಲಸಕ್ಕೂ ಸರ್ಕಾರಕ್ಕೂ ಸಂಬಂಧವಿಲ್ಲ ಎಂಬ ಜ್ಞಾನವಿಲ್ಲವೇ ಕಾಂಗ್ರೆಸ್ ನಾಯಕರೇ, ಮತದಾರರ ಪಟ್ಟಿ ಪರಿಷ್ಕರಣೆ ಮಾಡುವುದು ಚುನಾವಣಾ ಆಯೋಗದ ಕೆಲಸ ಎಂಬ ಸಣ್ಣ ವಿಷಯವು ನಿಮಗೆ ತಿಳಿಯದೆ?
- ಅಕ್ರಮ ನಡೆದಿದ್ದರೆ ಅದು ನಡೆದಿರುವುದು ಸಿದ್ದರಾಮಯ್ಯನವರೇ ಮಾಡಿರುವ ಅಕ್ರಮ ನೇಮಕಾತಿಗಳ ಫಲ. ಅಂದರೆ ಕಿಂಗ್ ಪಿನ್ ಸಿದ್ದರಾಮಯ್ಯನವರೇ ಅಲ್ಲವೇ ಸುರ್ಜೇವಾಲಾ ಅವರೇ? ಅಕ್ರಮದ ಮಾಹಿತಿ ಬಂದ ತಕ್ಷಣ ಎಫ್‌ಐಆರ್‌ ದಾಖಲಿಸಿ ತನಿಖೆ ನಡೆಸಲಾಗುತ್ತಿದೆ. ತನಿಖೆಯಲ್ಲಿ ಸಿದ್ದರಾಮಯ್ಯನವರ ಮತ್ತು ಚಿಲುಮೆ ಸಂಸ್ಥೆಯ ಅಕ್ರಮಗಳು ಬೆಳಕಿಗೆ ಬರುತ್ತಿವೆ. ಅದಕ್ಕೆ ಅಲ್ಲವೇ ಕಾಂಗ್ರೆಸ್‌ನವರಿಗೆ ಈ ತಳಮಳ ಎಂದು ಹೇಳಿದ್ದಾರೆ.
ಇದನ್ನೂ ಓದಿ | Voter Data | ಮತದಾರರ ಪಟ್ಟಿ ಅಕ್ರಮ; ಕೇಂದ್ರ ಚುನಾವಣಾ ಆಯೋಗಕ್ಕೆ ರಾಜ್ಯ ಕಾಂಗ್ರೆಸ್ ನಾಯಕರಿಂದ ದೂರು