| ಪರಶುರಾಮ್ ತಹಶೀಲ್ದಾರ್, ಹುಬ್ಬಳ್ಳಿ
ಬ್ರಿಟಿಷರೇ ಭಾರತ ಬಿಟ್ಟು ತೊಲಗಿ ಎಂದು ಇಡೀ ದೇಶವೇ ಗರ್ಜಿಸಿದ ಕ್ವಿಟ್‌ ಇಂಡಿಯಾ ಚಳವಳಿ ನಡೆದು 8 ದಶಕಗಳಾಗಿವೆ. ಗಂಡುಮೆಟ್ಟಿದ ನಾಡು ಹುಬ್ಬಳ್ಳಿಯ ಬಾಲಕನೊಬ್ಬ ಬ್ರಿಟಿಷರ ಲಾಠಿ ಮತ್ತು ಬೂಟಿನ ಸದ್ದಿಗೆ ಹೆದರದೆ ಹೋರಾಟ ಮಾಡಿ, ಗುಂಡೇಟಿಗೆ ಎದೆಯೊಡ್ಡಿ ಹುತಾತ್ಮನಾಗಿದ್ದ. ದೇಶವನ್ನು ದಾಸ್ಯದ ಸಂಕೋಲೆಯಿಂದ ಬಿಡಿಸಲು ವೀರಮರಣವನ್ನಪ್ಪಿದ ಹುಬ್ಬಳ್ಳಿಯ ಬಾಲಕನ ಬಲಿದಾನವನ್ನು ಸ್ವಾತಂತ್ರ್ಯದ ಅಮೃತ ಮಹೋತ್ಸವದ(Amrit Mahotsav) ಸಂದರ್ಭದಲ್ಲಿ ಸ್ಮರಿಸಿಕೊಳ್ಳಲೇಬೇಕು.
1942ರ ಆಗಸ್ಟ್‌ 9ರಂದು ಮಹಾತ್ಮ ಗಾಂಧಿ ಅವರ ಕರೆಗೆ ಓಗೊಟ್ಟಿದ್ದ ದೇಶ ಬ್ರಿಟಿಷರ ವಿರುದ್ಧ ಸಿಡಿದೆದ್ದಿತ್ತು. ಬ್ರಿಟಿಷರೇ ಭಾರತಬಿಟ್ಟು ತೊಲಗಿ ಎನ್ನುವ ಘೋಷಣೆ ಎಲ್ಲೆಡೆ ಮುಗಿಲುಮುಟ್ಟಿತ್ತು. ಗಂಡುಮೆಟ್ಟಿದ ನಾಡು ಹುಬ್ಬಳ್ಳಿಯಲ್ಲಿ ಕ್ವಿಟ್‌ ಇಂಡಿಯಾ ಚಳವಳಿಯ ಕಿಚ್ಚು ತೀವ್ರಗೊಂಡಿತ್ತು. ದೇಶವನ್ನು ಬ್ರಿಟಿಷರ ದಾಸ್ಯದಿಂದ ಬಿಡಿಸಬೇಕು ಎನ್ನುವ ಕೂಗಿಗೆ ಧ್ವನಿಗೂಡಿಸಿದ್ದ ಹುಬ್ಬಳ್ಳಿಯ ಜನತೆ ಬೃಹತ್ ಪ್ರತಿಭಟನಾ ಮೆರವಣಿಗೆ ಹಮ್ಮಿಕೊಂಡಿದ್ದರು.
ರಾಷ್ಟ್ರಧ್ವಜಗಳನ್ನು ಕೈಯಲ್ಲಿ ಹಿಡಿದು ಘೋಷಣೆಗಳನ್ನು ಕೂಗುತ್ತಾ ದುರ್ಗದಬೈಲ್‌ ವೃತ್ತಕ್ಕೆ ಮೆರವಣಿಗೆಯಲ್ಲಿ ಸಾಗಿದ್ದರು. ಬ್ರಾಡ್‌ವೇ ಬಳಿ ಮೆರವಣಿಗೆ ಸಾಗುತ್ತಿದ್ದಾಗ ಪುಟ್ಟ ಬಾಲಕನೊಬ್ಬ ರಾಷ್ಟ್ರಧ್ವಜ ಹಿಡಿದು ಮೆರವಣಿಗೆಗೆ ಜತೆಯಾಗಿದ್ದ. ಮನೆಯವರು, ದೊಡ್ಡವರು ಬೇಡವೆಂದರೂ ಕೇಳದೆ ಹೋರಾಟದ ಮುಂಚೂಣಿಯಲ್ಲಿ ಪುಟ್ಟ ಬಾಲಕ ಸಾಗಿದ್ದ. ಆತನ ಹೆಸರೇ ನಾರಾಯಣ ಡೋಣಿ. ತನ್ನ 14ನೇ ವಯಸ್ಸಿನಲ್ಲಿ ದೇಶಪ್ರೇಮದ ಕಿಚ್ಚು ಅವನನ್ನು ಹೋರಾಟದಲ್ಲಿ ಭಾಗವಹಿಸುವಂತೆ ಮಾಡಿತ್ತು.
ದೇಶಪ್ರೇಮಿ ಬಾಲಕ ನಾರಾಯಣ ಡೋಣಿ ಭಾರತ್‌ ಮಾತಾ ಕೀ ಜೈ, ವಂದೇ ಮಾತರಂ, ಜೈ ಹಿಂದ್‌ ಎಂದು ಘೋಷಣೆಗಳನ್ನು ಕೂಗುತ್ತಾ ಮೆರವಣಿಗೆಯಲ್ಲಿ ಸಾಗಿದ್ದ. ಭಾರೀ ಸಂಖ್ಯೆಯಲ್ಲಿ ಜನರು ಮೆರವಣಿಗೆ ಮೂಲಕ ಹುಬ್ಬಳ್ಳಿ ಶಹರ ಪೊಲೀಸ್‌ ಠಾಣೆಯ ಬಳಿ ತೆರಳುತ್ತಿದ್ದಂತೆ ಬ್ರಿಟಿಷ್ ಅಧಿಕಾರಿಗಳು ಕಂಗಾಲಾಗಿದ್ದರು. ಬೃಹತ್ ಜನಸ್ತೋಮವನ್ನು ನಿಯಂತ್ರಿಸಲಾಗದೆ ಲಾಠಿ ಚಾರ್ಜ್‌ಗೆ ಆದೇಶಿಸಿದ್ದರು. ಲಾಠಿ ಏಟನ್ನು ಲೆಕ್ಕಿಸದೆ ಹಲವು ಸ್ವತಂತ್ರ ವೀರರು ಮುನ್ನುಗ್ಗುತ್ತಿದ್ದರು. ಅದರಲ್ಲಿ ಬಾಲಕ ನಾರಾಯಣ ಡೋಣಿ ಕೂಡ ಮುಂಚೂಣಿಯಲ್ಲಿದ್ದ.
ಮೆರವಣಿಗೆಯಲ್ಲಿ ಯಾರಿಗೂ ಅಂಜದೆ ಲಾಠಿ ಏಟನ್ನೂ ಲೆಕ್ಕಿಸದೆ ಮೆರವಣಿಗೆ ಬಿಟ್ಟು ಕದಲದೇ ನಾರಾಯಣ ಡೋಣಿ ಮುನ್ನುಗ್ಗಿದ್ದ. ಆದರೆ ಬ್ರಿಟಿಷರು ಏಕಾಏಕಿ ಗೋಲಿಬಾರ್‌ ಆರಂಭಿಸಿದ್ದರು. ದುರದೃಷ್ಟವಶಾತ್ ಒಂದು ಗುಂಡು ನಾರಾಯಣ ಡೋಣಿಯ ಎದೆಯನ್ನು ಸೀಳಿತ್ತು. ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡಿದ ನಾರಾಯಣ ಡೋಣಿಯನ್ನು ಚಿಟಗುಪ್ಪಿ ಆಸ್ಪತ್ರೆಗೆ ಸಾಗಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೆ ವೀರ ಬಾಲಕ ಚಿಟಗುಪ್ಪಿ ಆಸ್ಪತ್ರೆಯಲ್ಲಿ ವೀರಮರಣವನ್ನಪ್ಪಿದ್ದ.
ಗುಂಡೇಟಿಗೆ ಬಲಿಯಾದ ವೀರ ಬಾಲಕನ ಅಂತ್ಯ ಸಂಸ್ಕಾರಕ್ಕೆ ಹುಬ್ಬಳ್ಳಿ ಶಹರ ಹಿಂದೆಂದೂ ಕಂಡು ಕೇಳರಿಯದ ರೀತಿಯಲ್ಲಿ ಜನಸಾಗರ ಸೇರಿತ್ತು. ಬಾಲಕನ ರಾಷ್ಟ್ರ ಪ್ರೇಮವನ್ನು ಇಡೀ ದೇಶವೇ ಕೊಂಡಾಡಿತ್ತು. ಘಟನೆ ನಡೆದು 80 ವರ್ಷಗಳು ಉರುಳಿವೆ, ದೇಶಕ್ಕೆ ಸ್ವತಂತ್ರ ಸಿಕ್ಕ ನಂತರ ಈ ವೀರ ಬಾಲಕನ ನೆನಪನ್ನೇ ಸರ್ಕಾರಗಳು ಮರೆತಂತೆ ಕಾಣುತ್ತಿದೆ. ಕೆಲವು ದೇಶ ಪ್ರೇಮಿಗಳ ಹೋರಾಟದ ಫಲವಾಗಿ ನಾರಾಯಣ ಡೋಣಿ ಗುಂಡೇಟು ತಿಂದ ಜಾಗದಲ್ಲಿ ಒಂದು ಕಂಚಿನ ಪುತ್ಥಳಿ ನಿರ್ಮಿಸಲಾಗಿದೆ. ಆತ ಓದುತ್ತಿದ್ದ ಲ್ಯಾಮಿಂಗ್ಟನ್‌ ಶಾಲೆಯ ಬಳಿ ಒಂದು ವೀರಗಲ್ಲು ಸ್ಥಾಪಿಸಲಾಗಿದೆ. ಅಷ್ಟಕ್ಕೆ ನಾರಾಯಣ ಡೋಣಿ ನೆನಪು ಸೀಮಿತಗೊಂಡಿದೆ.
ನಾರಾಯಣ ಡೋಣಿಯ ಪುತ್ಥಳಿಯ ಸುತ್ತಲಿನ ಜಾಗವನ್ನು ಕೆಲ ವ್ಯಾಪಾರಿಗಳು ಅತಿಕ್ರಮಣ ಮಾಡಿದ್ದಾರೆ. ಧೂಳು ಹಿಡಿಯುವ ಪುತ್ಥಳಿಯನ್ನು ಸ್ಥಳೀಯರೇ ಆಗಾಗ ಸ್ವಚ್ಛಗೊಳಿಸುತ್ತಾರೆ. ಆದರೆ ಬಾಲಕನ ತ್ಯಾಗವನ್ನು ಸ್ಮರಿಸುವ ಕೆಲಸವನ್ನು ಯಾರೂ ಮಾಡದಿರುವುದು ವಿಪರ್ಯಾಸ. ಈಗಲಾದರೂ ಪಾಲಿಕೆ ಆಡಳಿತ ನಾರಾಯಣ ಡೋಣಿ ಪುತ್ಥಳಿಯನ್ನು ಸ್ಮಾರಕವಾಗಿ ಅಭಿವೃದ್ಧಿಪಡಿಸಿ ಪ್ರವಾಸಿಗರ ಭೇಟಿಗೆ ಅವಕಾಶ ಮಾಡಬೇಕು. ಬಾಲಕನ ದೇಶಪ್ರೇಮ ಮತ್ತು ವೀರಗಾಥೆಯನ್ನು ಎಲ್ಲರಿಗೂ ತಿಳಿಸಬೇಕು. ಕ್ವಿಟ್‌ ಇಂಡಿಯಾ ಚಳವಳಿ, ಸ್ವಾತಂತ್ರ್ಯೋತ್ಸವದ ದಿನವಾದರೂ ಜಿಲ್ಲಾಡಳಿತದಿಂದ ಹುತಾತ್ಮ ನಾರಾಯಣ ಡೋಣಿ ಪುತ್ಥಳಿಗೆ ಗೌರವ ಸಮರ್ಪಣೆಯಾಗಬೇಕು ಎನ್ನುವುದೇ ಎಲ್ಲರ ಆಶಯವಾಗಿದೆ.
ಇದನ್ನೂ ಓದಿ| Amrit Mahotsav | ಆದಿವಾಸಿಗಳ ಹಕ್ಕುಗಳ ಧ್ವನಿಯಾಗಿದ್ದ ಅಲ್ಲೂರಿ ಸೀತಾರಾಮ ರಾಜು