ಬೆಂಗಳೂರು: ಐಎಎಸ್ ಅಧಿಕಾರಿ ರೋಹಿಣಿ ಸಿಂಧೂರಿ ಮತ್ತು ಐಪಿಎಸ್‌ ಅಧಿಕಾರಿ ಡಿ. ರೂಪಾ (Sindhuri Vs Roopa) ಅವರ ನಡುವಿನ ಬೀದಿ ಜಗಳ ರಾತ್ರಿಯಾದರೂ ನಿಂತಿಲ್ಲ. ಸಾಮಾಜಿಕ ಜಾಲ ತಾಣ ಮತ್ತು ಮಾಧ್ಯಮಗಳ ಮೂಲಕ ಅವರಿಬ್ಬರೂ ಜಗಳ ಮುಂದುವರಿಸಿದ್ದಾರೆ.
ತಮ್ಮ ಖಾಸಗಿ ಚಿತ್ರಗಳನ್ನು ಸೋಷಿಯಲ್‌ ಮೀಡಿಯಾ ಮತ್ತು ವಾಟ್ಸ್‌ ಆಪ್‌ ಸ್ಟೇಟಸ್‌ನಿಂದ ತೆಗೆದು ಪ್ರಕಟಿಸುವ ಮೂಲಕ ತೇಜೋವಧೆ ಮಾಡಿದ್ದಾರೆ, ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ರೋಹಿಣಿ ಸಿಂಧೂರಿ ಎಚ್ಚರಿಸಿದ್ದಾರೆ. ಇದೇ ವೇಳೆ ಡಿ. ರೂಪಾ ಅವರು ಇಂಥ ಫೋಟೊಗಳನ್ನು ಬಿಡುಗಡೆ ಮಾಡಬೇಕಾಗಿತ್ತಾ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಿಂದಲೂ ಕೇಳಿಬಂದಿದೆ.
ಇದಕ್ಕೆ ಸ್ವತಃ ಡಿ. ರೂಪಾ ಅವರೇ ಉತ್ತರ ನೀಡಿದ್ದಾರೆ. ಫೇಸ್‌ ಬುಕ್‌ ಪೋಸ್ಟ್‌ ಮೂಲಕ ಅವರು ಮತ್ತೆ ಸಿಂಧೂರಿ ಅವರನ್ನು ಕೆಣಕಿದ್ದು, ಯಾಕೆ ಈ ಫೋಟೊಗಳನ್ನು ಹಾಕಿದೆ ಎನ್ನುವುದಕ್ಕೆ ವಿವರಣೆ ನೀಡಿದ್ದಾರೆ.
ʻʻನಾನು ಯಾಕೆ ಆಕೆಯ ಪಿಕ್ಚರ್ಸ್ ಹಾಕಿದೆ ಅಂತ ಕೇಳುವವರಿಗೆ ನಾನು ಹೇಳೋದು ಇಷ್ಟೇ.. ಫೋಟೊ ಕಳಿಸುವಾಕೆಗೆ ಅದರ ದರ್ದು ಇಲ್ಲ ಅಂದ ಮೇಲೆ ಬೇರೆಯವರಿಗೆ ಯಾಕೆ ಇರಬೇಕು? ಈ ರೀತಿಯ ಪಿಕ್ಚರ್ಸ್ ಎಲ್ಲೂ ಅವರ ಸಾಮಾಜಿಕ ಜಾಲತಾಣದಲ್ಲಿಲ್ಲ. ಯಾರು ಯಾರಿಗೆ, ಯಾಕೆ ಕಳಿಸಿದರು ಅಂತ ಅವರೇ ಅವರ ಬಾಯಿಂದ ಹೇಳಲಿ. ಹೀಗೆ ಫೋಟೊ ಕಳುಹಿಸುವುದರ ಹಿಂದಿನ ಉದ್ದೇಶ ಏನು? ಸಂಸಾರಗಳಲ್ಲಿ ಹುಳಿ ಹಿಂಡುವುದೇ?ʼʼ ಎಂದು ಅವರು ಪ್ರಶ್ನಿಸಿದ್ದಾರೆ.
ʻʻಒಬ್ಬ ಹೆಣ್ಣಾಗಿ ಅನೇಕ ಹೆಣ್ಣು ಮಕ್ಕಳಿಗೆ ಮುಳ್ಳು ಆದ ಈಕೆಯ ಮೇಲೆ ಕನಿಕರ ಇಟ್ಟುಕೊಂಡಿರುವ ಕೆಲವರೇ, ಕೇಳಿ, ನಿಮ್ಮದು misplaced sympathy, ಅಂದರೆ ಅನಗತ್ಯವಾದ ಕರುಣೆʼʼ ಎಂದಿದ್ದಾರೆ ರೂಪಾ.
ಮೂವರು ಐಎಎಸ್ ಅಧಿಕಾರಿಗಳಿಗೆ ಫೋಟೊ!
ರೂಪಾ ಅವರ ಪ್ರಕಾರ, ರೋಹಿಣಿ ಸಿಂಧೂರಿಯವರು ಇಂಥ ಫೋಟೊಗಳನ್ನು ಮೂವರು ಐಎಎಸ್ ಅಧಿಕಾರಿಗಳಿಗೆ ಕಳುಹಿಸಿದ್ದಾರೆ. ಅವರೇ ಹೇಳುವ ಪ್ರಕಾರ, ʻʻಈ ರೀತಿಯ ಪಿಕ್ಚರ್ಸ್ ಕೆಲವರಿಗೆ ನಾರ್ಮಲ್‌ ಅನ್ನಿಸಬಹುದು. ಆದರೆ, ಒಬ್ಬ ಮಹಿಳಾ ಐಎಎಸ್ ಅಧಿಕಾರಿ ಒಂದಲ್ಲ, ಎರಡಲ್ಲ ಮೂವರು ಐಎಎಸ್ ಪುರುಷ ಅಧಿಕಾರಿಗಳಿಗೆ ಆಗಾಗ ಇವುಗಳನ್ನು ಹಾಗೂ ಈ ರೀತಿಯ ಅನೇಕ ಪಿಕ್ಸ್ ಗಳ ನೇರವಾಗಿ ಕಳಿಸುತ್ತಾರೆ ಅಂದ್ರೆ ಅದಕ್ಕೆ ಏನರ್ಥ?ʼʼ ಎಂದು ಪ್ರಶ್ನಿಸಿದ್ದಾರೆ.
ʻʻಇದು ಆಕೆಯ ಖಾಸಗಿ ವಿಷಯ ಆಗುವುದಿಲ್ಲ ಐಎಎಸ್ ಸೇವಾ ನಡವಳಿಕೆಗಳ ನಿಯಮಾವಳಿ ಪ್ರಕಾರ ಅಪರಾಧ. ಈ ಚಿತ್ರಗಳ ನೈಜತೆ ಬಗ್ಗೆ ಯಾವುದೇ ತನಿಖಾ ಸಂಸ್ಥೆ ಕೂಡಾ ತನಿಖೆ ಮಾಡಬಹುದು. ಸಲೂನ್‌ನಲ್ಲಿ ಹೇರ್‌ ಕಟ್‌ ಮಾಡಿಸಿಕೊಳ್ಳುವ ಚಿತ್ರ, ತಲೆದಿಂಬು ಇಟ್ಟು ಮಲಗಿ ತೆಗೆದಿರುವ ಚಿತ್ರ, ಕೆಲವರಿಗೆ ನಾರ್ಮಲ್‌ ಅನಿಸಬಹುದು. ಆದರೆ, ಕಳಿಸಿರುವ ಸನ್ನಿವೇಶ ಬೇರೇನೋ ಹೇಳುತ್ತದೆʼʼ ಎಂದು ನೇರದಾಳಿ ಮಾಡಿದ್ದಾರೆ ಡಿ. ರೂಪಾ.
ಇದನ್ನೂ ಓದಿ : Sindhuri Vs Roopa : ಸಿಂಧೂರಿ- ರೂಪಾ ಜಗಳದಲ್ಲಿ ಡಿ.ಕೆ. ರವಿ ಪತ್ನಿ ಕುಸುಮಾ ಎಂಟ್ರಿ: ಕರ್ಮ ಫಲ ಸಿಕ್ಕೇ ಸಿಗುತ್ತದೆ ಅಂತ ಹೇಳಿದ್ಯಾರಿಗೆ?