ಬೆಂಗಳೂರು: ಶುಕ್ರವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಜಲ ನೀತಿ-2022ಕ್ಕೆ ಅನುಮೋದನೆ ನೀಡಲಾಗಿದ್ದು, ಜಲ ಸಂಪನ್ಮೂಲ ನಿರ್ವಹಣೆಯನ್ನು ಸಮರ್ಪಕವಾಗಿ ಬಲಪಡಿಸಲು ಅಂತರ್-ವಿಭಾಗೀಯ ರಾಜ್ಯ ಜಲಸಂಪನ್ಮೂಲ ಪ್ರಾಧಿಕಾರ ರಚಿಸಲು ಹೊಸ ಜಲ ನೀತಿಯಲ್ಲಿ ಪ್ರಸ್ತಾಪಿಸಲಾಗಿದೆ.
2022ರ ಏ. 27ರಂದು ಭಾರಿ ಮತ್ತು ಮಧ್ಯಮ ನೀರಾವರಿ ಸಚಿವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಕರಡು ರಾಜ್ಯ ಜಲ ನೀತಿಯನ್ನು ರೂಪಿಸಲಾಗಿತ್ತು. ಇದನ್ನು ಸಂಪುಟ ಸಭೆಯಲ್ಲಿ ಮಂಡಿಸಿದ್ದು, ಇದಕ್ಕೆ ಸಚಿವ ಸಂಪುಟ ಒಪ್ಪಿಗೆ ನೀಡಿದೆ.
ಹೊಸ ಜಲನೀತಿಯಲ್ಲಿ ಯಾವ ಯಾವ ಅಂಶಗಳು ಇವೆ ಎಂಬ ಮಾಹಿತಿ ಇಲ್ಲಿದೆ.
- ಜಲ ನೀತಿಯ ಮಾರ್ಗದರ್ಶನ, ಸಮನ್ವಯ ಮತ್ತು ನೀತಿಯ ಅನುಷ್ಠಾನದ ಕಾರ್ಯದಕ್ಷತೆಯ ವಿಮರ್ಶೆಯನ್ನು ಒದಗಿಸುವ ಕುರಿತು, ಜಲ ಸಂಪನ್ಮೂಲ ನಿರ್ವಹಣೆಯನ್ನು ಬಲಪಡಿಸಲು ವಿಧಾನಗಳ ನೀತಿ ಮತ್ತು ಸಾಂಸ್ಥಿಕ ಮೌಲ್ಯ ಮಾಪನಗಳನ್ನು ಸಕ್ರಿಯಗೊಳಿಸುವುದು, ನೀರು ಬಳಕೆದಾರರ ಸಂಘಗಳ ಮತ್ತು ಸಂಸ್ಥೆಗಳಾದ ನೀರಿನ ಬಳಕೆದಾರರ ಸಂಘ, ನೀರಿನ ಬಳಕೆದಾರರ ಮಹಾ ಮಂಡಳಿ, ಕೆರೆ ನೀರು ಬಳಕೆದಾರರ ಸಂಘ, ಗ್ರಾಮೀಣ ನೀರು ಮತ್ತು ನೈರ್ಮಲ್ಯ ಸಮಿತಿ, ಜಲಾನಯನ ಸಮಿತಿಗಳನ್ನು ಬಲಪಡಿಸಲು ನಿಯಮಿತವಾಗಿ ಸಭೆಗಳನ್ನು ನಡೆಸಲು ಸರ್ಕಾರದ ಮುಖ್ಯ ಕಾರ್ಯದರ್ಶಿಯವರ ಅಧ್ಯಕ್ಷತೆಯಲ್ಲಿ ಉನ್ನತ ಮಟ್ಟದ ಜಲ ನೀತಿ ಸಮಿತಿಯನ್ನು ರಚಿಸಲು ನಿರ್ಧರಿಸಲಾಗಿದೆ.
ಇದನ್ನೂ ಓದಿ | Karnataka Police | ರಾಜ್ಯದ 6 ಪೊಲೀಸ್‌ ಅಧಿಕಾರಿಗಳಿಗೆ ಕೇಂದ್ರದ ಗೃಹ ಸಚಿವರ ಶ್ರೇಷ್ಠತಾ ಪ್ರಶಸ್ತಿ
- ನೀರಿನ ದಕ್ಷ ಬಳಕೆ, ನೀರಾವರಿ ಯೋಜನೆಗಳ ನಿರ್ವಹಣೆ, ನೀರಾವರಿ ಆಧುನೀಕರಣ ಮತ್ತು ಕಾಲುವೆ ಯಾಂತ್ರೀಕರಣ, ಸೂಕ್ಷ್ಮ ನೀರಾವರಿ (ಕೃಷಿ /ತೋಟಗಾರಿಕೆ /ಬೃಹತ್ ನೀರಾವರಿ ಯೋಜನೆಗಳು), ಕರ್ನಾಟಕ ಜಲ ಸಂಪನ್ಮೂಲ ಮಾಹಿತಿ ವ್ಯವಸ್ಥೆ (ಕೆಡಬ್ಲ್ಯು ಆರ್‌ಐಎಸ್), ನದಿ ಕಣಿವೆ ಯೋಜನೆ ಮತ್ತು ನಿರ್ವಹಣೆ, ಕೆರೆ ತುಂಬಿಸಲು, ಅಂತರ್ಜಲ ಮರುಪೂರಣ, ಕೃಷಿ ಇತ್ಯಾದಿಗಳಿಗೆ ನಗರ ತ್ಯಾಜ್ಯ ನೀರಿನ ಸಂಸ್ಕರಣೆ ಕಡಿಮೆ ನೀರು ಬಳಕೆಯ ಬೆಳೆಗಳನ್ನು ಅಳವಡಿಸಿಕೊಳ್ಳಲು ರೈತರನ್ನು ಉತ್ತೇಜಿಸುವುದು, ಜಲಮೂಲಗಳ, ಜಲಾನಯನ ಪ್ರದೇಶಗಳ ಸುಧಾರಣೆ. ನೀರಿನ ನಿರ್ವಹಣೆಯಲ್ಲಿ ರೈತರು/ಬಳಕೆದಾರರ ಭಾಗವಹಿಸುವಿಕೆಯನ್ನು ಪ್ರೋತ್ಸಾಹಿಸುವುದು ಮುಂತಾದವು ಜಲ ನೀತಿಯನ್ನು ಬಲಪಡಿಸುವ ಅಥವಾ ಜಲ ನೀತಿಯಲ್ಲಿನ ಹೊಸ ಅಂಶಗಳಾಗಿರುತ್ತವೆ.
- ರೈತರ ಆದಾಯವನ್ನು ದ್ವಿಗುಣಗೊಳಿಸುವುದು, ವಿವಿಧ ಬೆಳೆಗಳ ನೀರಿನ ಉತ್ಪಾದಕತೆಯನ್ನು ಹೆಚ್ಚಿಸುವುದು, ನೀರಿನ ಬಳಕೆಯ ದಕ್ಷತೆ ಸುಧಾರಿಸುವುದು, ಜಲ ಜೀವನ್ ಮಿಷನ್ ಅಡಿಯಲ್ಲಿ ಅಂತರ ವಲಯದ ನೀರಿನ ಸಂಪನ್ಮೂಲಗಳನ್ನು ಸಮಗ್ರವಾಗಿ ಪರಿಹರಿಸುವ ಮೂಲಕ ಪ್ರತಿ ಮನೆಗೆ 24 x 7 ಕುಡಿಯುವ ನೀರಿನ ಸರಬರಾಜು, ಅಟಲ್ ಭೂಜಲ ಯೋಜನೆಯಡಿ ಅಂತರ್ಜಲ ನಿರ್ವಹಣೆ ಪಾಲ್ಗೊಳ್ಳುವಿಕೆಯನ್ನು ಉತ್ತೇಜಿಸುವುದು, ತ್ಯಾಜ್ಯ ನೀರನ್ನು ಸಂಸ್ಕರಿಸಿ ಮರು ಬಳಕೆಯಿಂದ ರಾಜ್ಯದಲ್ಲಿ ಹೆಚ್ಚಿನ ಜನ ಸಂಖ್ಯೆಗೆ ನೀರನ್ನು ಒದಗಿಸುವುದು ಹೊಸ ಜಲ ನೀತಿ ಉದ್ದೇಶವಾಗಿರುತ್ತದೆ.
- ಆರ್ಥಿಕ ಬೆಳವಣಿಗೆಯಿಂದ ಮತ್ತು ಕರ್ನಾಟಕದಲ್ಲಿ ಕೈಗಾರಿಕೆ ಮತ್ತು ನಗರ ನೀರು ಸರಬರಾಜು ವಲಯಗಳಲ್ಲಿನ ಬೇಡಿಕೆಗಳು ಹೆಚ್ಚುತ್ತಿರುವುದರಿಂದ ನೀರಿನ ಬಳಕೆಯ ದಕ್ಷತೆ, ಉತ್ಪಾದಕತೆಯನ್ನು ಸುಧಾರಿಸುವ, ನೀರಿನ ಗುಣಮಟ್ಟ ಮತ್ತು ನೀರಿನ ಮರುಬಳಕೆಯ ಬಗ್ಗೆ ಗಮನ ಹರಿಸುವ ಅವಶ್ಯಕತೆಯಿದೆ. ಕುಡಿಯುವ ನೀರು, ಆರೋಗ್ಯ, ಆಹಾರ, ಇಂಧನ, ಪರಿಸರ ಮತ್ತು ಇತರೆ ಸಾಮಾಜಿಕ ಉದ್ದೇಶಗಳಿಗಾಗಿ ರಾಜ್ಯದ ಜಲ ಸಂಪನ್ಮೂಲಗಳ ಸುರಕ್ಷತೆ ಮತ್ತು ಉತ್ತಮ ಬಳಕೆಯನ್ನು ಸುಲಭಗೊಳಿಸುವುದು ಜಲ ನೀತಿ ಗುರಿಯಾಗಿರುತ್ತದೆ.
ವಿಜಯಪುರ ಜಿಲ್ಲೆಗೆ ಬೃಹತ್ ಕುಡಿಯುವ ನೀರಿನ ಯೊಜನೆ : ಗೋವಿಂದ ಕಾರಜೋಳ
ಜಲ ಜೀವನ್ ಮಿಷನ್ ಯೋಜನೆಯಡಿ ಹಾಗೂ ನಬಾರ್ಡ್‌ ಇಫ್ರಾಸ್ಟ್ರಕ್ಚರ್‌ ಡೆವಲಪ್‌ಮೆಂಟ್‌ ಅಸಿಸ್ಟನ್ಸ್(NIDA) ನೆರವಿನಿಂದ ವಿಜಯಪುರ ಜಿಲ್ಲೆಯ ವಿಜಯಪುರ, ಬಸವನ ಬಾಗೇವಾಡಿ ಮತ್ತು ಇಂಡಿ ತಾಲೂಕು ಗ್ರಾಮೀಣ ಜನವಸತಿಗಳು ಹಾಗೂ ಇಂಡಿ ಟೌನ್ ಮತ್ತು ಇತರ 4 ನಗರ ಸ್ಥಳೀಯ ಸಂಸ್ಥೆಗಳಾದ ಚಡಚಣ್, ಮನಗೂಲಿ, ನಿಡಗುಂದಿ ಮತ್ತು ಕೊಲ್ಹಾರ್ (ಯೋಜನೆ-೧) ಒಳಗೊಂಡಂತೆ ಬಹುಗ್ರಾಮ ಕುಡಿಯುವ ನೀರು ಸರಬರಾಜು ಪರಿಷ್ಕೃತ ಯೋಜನೆಯ ಅನುಷ್ಠಾನಕ್ಕೆ ರಾಜ್ಯ ಸಚಿವ ಸಂಪುಟ ಆಡಳಿತಾತ್ಮಕ ಅನುಮೋದನೆ ನೀಡಿದೆ ಎಂದು ಸಚಿವ ಗೋವಿಂದ ಕಾರಜೋಳ ತಿಳಿಸಿದ್ದಾರೆ.
ಬಹುಗ್ರಾಮ ಕುಡಿಯುವ ನೀರು ಸರಬರಾಜು ಯೋಜನೆಯನ್ನು ಜಲ ಜೀವನ್ ಮಿಷನ್ ಯೋಜನೆಯಡಿ NIDA ಅಡಿಯಲ್ಲಿ ನಬಾರ್ಡ್‌ನಿಂದ ಪಡೆದ ಸಾಲದಡಿ ಹಾಗೂ ಯುಡಿಡಿಯಿಂದ ಅನುದಾನದ ನೆರವಿನೊಂದಿಗೆ ಸಂಯೋಜಿತಗೊಳಿಸಿದ ಪರಿಷ್ಕೃತ ಅಂದಾಜು ಮೊತ್ತ ೨೦೭೭.೬೩ ಕೋಟಿ ರೂಪಾಯಿ ಮಂಜೂರಿಗೆ ಸಚಿವ ಸಂಪುಟದ ಅನುಮೋದನೆ ದೊರತಿದೆ.
ಇದನ್ನೂ ಓದಿ | Freedom March | ಆ.15ರ ‘ಸ್ವಾತಂತ್ರ್ಯ ನಡಿಗೆ’ ಪಾದಯಾತ್ರೆಗೆ ಕಾಂಗ್ರೆಸ್‌ ಸಜ್ಜು: ಡಾ.ಜಿ.ಪರಮೇಶ್ವರ್‌