ನೀವು ಸಂತೋಷವಾಗಿದ್ದೀರಾ? (How to Be Happy) ಇದೇನು ಪ್ರಶ್ನೆ ಎಂದು ಕಳವಳಗೊಳ್ಳಬೇಡಿ. ಸಂತೋಷವಾಗಿರಲು ನೂರು ಕಾರಣಗಳಿರಬಹುದು. ಆದರೆ ದುಃಖಕ್ಕೆ ಒಂದೇ ಒಂದು ಕಾರಣ ಸಾಕು. ಬದುಕಿನಲ್ಲಿ ಸಂತೋಷದಿಂದ ಇರಬೇಕು ಎಂಬುದು ಬಹುತೇಕ ಎಲ್ಲರ ಪರಮ ಉದ್ದೇಶವಾದರೂ, ಪ್ರತಿಯೊಬ್ಬರ ಸಂತೋಷವೂ ಭಿನ್ನವೇ. ಕೆಲವರಿಗೆ ಸಣ್ಣ ವಸ್ತುವಿನಲ್ಲಿ, ಬದುಕಿನ ನೆಮ್ಮದಿಯಲ್ಲಿ ಕಂಡ ಸಂತೋಷ ಇನ್ನೊಬ್ಬನಿಗೆ ಇನ್ಯಾವುದೋ ದೊಡ್ಡ ವಸ್ತುವಿನಲ್ಲಿ ಇರಬಹುದು. ಹೀಗಾಗಿ ಸಂತೋಷದ ವ್ಯಾಖ್ಯಾನ ಒಬ್ಬರಿಂದ ಒಬ್ಬರಿಗೆ ಬೇರೆ ಬೇರೆಯಾಗಿಯೇ ಇರುತ್ತದೆ. ಬನ್ನಿ, ನೀವು ಸಂತೋಷವಾಗಿದ್ದೀರಾ ಎಂದೊಮ್ಮೆ ನಿಮ್ಮ ಹೆಗಲ ಮುಟ್ಟಿ ನೋಡಿಕೊಳ್ಳಿ!
ಕೃತಜ್ಞತೆ ಸಲ್ಲಿಸಿ
ಕೆಲವರನ್ನು ನೀವು ನೋಡಿರಬಹುದು. ಎದ್ದ ಕೂಡಲೇ, ನಮ್ಮನ್ನು ಇಷ್ಟು ಚೆನ್ನಾಗಿಟ್ಟಿರುವ ಎಲ್ಲರಿಗೂ, ನಂಬಿದ ಭಗವಂತನಿಗೂ ಕೈಮುಗಿದು ಕೃತಜ್ಞತೆ ಸಲ್ಲಿಸುವ ಅಭ್ಯಾಸವನ್ನು ಇಟ್ಟುಕೊಂಡಿರುವುದನ್ನು ಕಂಡಿರಬಹುದು. ಕೆಲವರಿಗೆ ಇದು ವಿಚಿತ್ರ ಅಭ್ಯಾಸವೆಂದು ಕಂಡರೆ ಇನ್ನೂ ಕೆಲವರಿಗೆ ಇದು ನಮ್ಮನ್ನು ಒಂದು ದಿನದ ಪಾಸಿಟಿವ್‌ ಆರಂಭವಾಗಿ ಕಾಣಬಹುದು. ಒಟ್ಟಾರೆಯಾಗಿ, ಸಂತೋಷವೇ ಜೀವನದಲ್ಲಿ ಮುಖ್ಯವಾಗಿರುವಾಗ ನಮ್ಮನ್ನು ಸಂತೋಷವಾಗಿಟ್ಟ ದಿಗೆ ಕೃತಜ್ಞತೆ ಸಲ್ಲಿಸುವುದು ಒಂದೊಳ್ಳೆ ಕ್ರಮವೂ ಹೌದು ತಾನೇ. ಜೀವನದಲ್ಲಿ ನಿಜಕ್ಕೂ ಖುಷಿಯಿಂದಿರುವ ಮಂದಿಯನ್ನು ನೋಡಿ, ಅವರು ತಾವು ಈವರೆಗೆ ಪಡೆದುದಕ್ಕೆ, ಅದು ಸಂತೋಷವಿರಲಿ ದುಃಖವಿರಲಿ, ಒಂದು ಆನಂದದಾಯಕ ಅನುಭೂತಿಯಲ್ಲಿರುತ್ತಾರೆ.
ಈ ಅಭ್ಯಾಸ ಒಳ್ಳೆಯದು
ನಮ್ಮ ಇಷ್ಟಗಳಿಗೆ, ನಮ್ಮ ಖುಷಿಗಳಿಗೆ ದಿನದ ಒಂದಷ್ಟು ಸಮಯವನ್ನು ಮೀಸಲಿಡುವುದು, ಅದರಿಂದ ಖುಷಿಯನ್ನು ಕಾಣುವುದು ಕೆಲವರಿಗೆ ಅಭ್ಯಾಸವಾಗಿಬಿಟ್ಟಿರುತ್ತದೆ. ಜೀವನ ಎಷ್ಟೇ ಬ್ಯುಸಿಯಾಗಿರಲಿ, ಸಮಯವೇ ಇಲ್ಲದೆ ಇರಲಿ. ಆದರೂ ಒಂದು ಕ್ಷಣದ ಸಂತೋಷದ ಗಳಿಗೆಯನ್ನು ಅವರು ತನಗಾಗಿ ಕಾದಿರಿಸುತ್ತಾರೆ. ಅದೊಂದು ರಾತ್ರಿಯ ಪುಟ್ಟ ವಾಕ್‌ ಇರಬಹುದು, ಒಂದೆರಡು ಪುಟವಾದರೂ ದಿನವೂ ಓದಿಯೇ ಮಲಗುವುದಿರಬಹುದು, ಅಥವಾ ಪ್ರೀತಿಪಾತ್ರರ ಜೊತೆಗೆ ಒಂದ್ಹತ್ತು ನಿಮಿಷ ಮಾತನಾಡುವುದು ಇರಬಹುದು. ಇಂಥವರು ಸಂತೋಷವಾಗಿರುತ್ತಾರೆ. ತಮ್ಮ ಜೀವನದ ಬಗ್ಗೆ ಅವರಿಗೆ ದೂರುಗಳಿರುವುದಿಲ್ಲ.
ಹೊಸ ಕಲಿಕೆಯ ತುಡಿತ
ತನ್ನ ಬೆಳವಣಿಗೆಯಲ್ಲಿ ನಂಬಿಕೆಯಿಟ್ಟಿರುವ ಇವರು ನಿಂತ ನೀರಾಗಿರುವುದಿಲ್ಲ. ತನ್ನ ಕಷ್ಟಗಳನ್ನು ಹಳಿದುಕೊಂಡು ಅಲ್ಲೇ ನಿಂತಿರುವುದಿಲ್ಲ. ಸಾಧ್ಯತೆಗಳನ್ನು ಹುಡುಕಿಕೊಂಡು ಸದಾ ಹೊಸ ಕಲಿಕೆಯ ತುಡಿತವನ್ನು ಹೊಂದಿರುವ ಮಂದಿ ಸದಾ ಖುಷಿಯಾಗಿರುತ್ತಾರೆ.
ತಾಳ್ಮೆ, ಶಾಂತಿ ಇರಲಿ
ದಯಾಪರರು ಸದಾ ಒಂದು ಬಗೆಯ ತಾಳ್ಮೆ, ಶಾಂತಿಯನ್ನು ಬದುಕಿನಲ್ಲಿ ರೂಢಿಸಿಕೊಂಡಿರುತ್ತಾರೆ. ಇನ್ನೊಬ್ಬರ ಕಷ್ಟಗಳಿಗೆ ಕರಗುವ ಇವರು ತಮ್ಮ ಕೈಲಾಗುವ ಸಹಾಯ ಮಾಡುತ್ತಾರೆ. ಬೇರೆವರ ಕಷ್ಟಗಳಿಗೆ ಇವರ ಹೃದಯ ಮಿಡಿಯುತ್ತದೆ.
ಜವಾಬ್ದಾರಿ ನಿಭಾಯಿಸಿ
ಜೀವನ ಎಷ್ಟೇ ಬ್ಯುಸಿಯಿರಲಿ, ಇವರು ತಮ್ಮ ಒತ್ತಡದಿಂದ ಹೈರಾಣಾಗುವುದಿಲ್ಲ. ಎಲ್ಲವನ್ನೂ ಶಾಂತಿಯಿಂದ, ಸಮಾಧಾನದಿಂದ ಬ್ಯಾಲೆನ್ಸ್‌ ಮಾಡುತ್ತಾರೆ. ತಮ್ಮ ಕೆಲಸದ ಒತ್ತಡಕ್ಕಾಗಿ ಜವಾಬ್ದಾರಿಗಳಿಂದ ನುಣುಚಿಕೊಳ್ಳುವುದಿಲ್ಲ. ಕೆಲಸದ ಜೊತೆಗೆ ಜವಾಬ್ದಾರಿಗಳನ್ನೂ ನಿಭಾಯಿಸಿಕೊಂಡು, ತಮ್ಮ ಖುಷಿಯನ್ನೂ ಕಂಡುಕೊಳ್ಳುತ್ತಾರೆ. ತೃಪ್ತಿ ಇವರ ಸಂತೋಷದ ಕೀಲಿಕೈ.
ಬದಲಾವಣೆಗೆ ಹೊಂದಿಕೊಳ್ಳಿ
ಬದುಕು ಅಂದುಕೊಂಡ ಹಾಗೆ ಇರುವುದಿಲ್ಲ. ಬದಲಾವಣೆಗಳು ಖಂಡಿತ. ಆದರೆ, ಬದಲಾವಣೆಗಳನ್ನು ಸಹಜವಾಗಿ ಸ್ವೀಕರಿಸಿ ಬದುಕನ್ನು ಸಂಪೂರ್ಣವಾಗಿ ಅನುಭವಿಸುವುದು ಬದುಕಿನ ನಿಜವಾದ ಪಯಣ. ಇಂಥವರು ಬದುಕಿನ ಇಂಥನ ಅನಪೇಕ್ಷಿತ ಮಜಲುಗಳನ್ನೂ ಸಮಾಧಾನದಿಂದ ಸ್ವೀಕರಿಸುತ್ತಾರೆ.
ಸದಾ ಕ್ರಿಯಾಶೀಲರಾಗಿರುವ ಮಂದಿ ಯಾವಾಗಲೂ ಸಂತೋಷದಿಂದಿರುತ್ತಾರೆ. ಅದು ದೈಹಿಕವಾಗಿ ಇರಬಹುದು, ಮಾನಸಿಕವಾಗಿಯೂ ಇರಬಹುದು. ಸದಾ ತನ್ನನ್ನು ವಿವಿಧ ವಿಚಾರಗಳಲ್ಲಿ ತೊಡಗಿಸಿಕೊಂಡಿರುವ ಮಂದಿ ಯಾವಾಗಲೂ ಸಂತೋಷವಾಗಿರುತ್ತಾರೆ. ಸಂಬಂಧಗಳಿಗೆ ಬೆಲೆ ಕೊಡುವ, ಪ್ರೀತಿ ಪಾತ್ರರನ್ನು ಸಂತೋಷವಾಗಿಟ್ಟಿರುವ, ಅವರಿಗಾಗಿ ಸಮಯ ಮಾಡಿಕೊಳ್ಳುವ ಮನೋಭಾವ ಹೊಂದಿರುವ, ಅವರ ಖುಷಿಯಲ್ಲಿ ಪ್ರೀತಿಯಲ್ಲಿ ಸಂತೋಷ ಹೊಂದುವ ಮಂದಿ ಖುಷಿಯಾಗಿರುತ್ತಾರೆ. ಇಂಥವರಿಗೆ ಸಂಬಂಧದ ಬೆಲೆ ತಿಳಿದಿರುತ್ತದೆ. ಸಣ್ಣ ಸಣ್ಣ ಖುಷಿಗಳೂ ಇವರನ್ನು ಸುಖವಾಗಿಟ್ಟಿರುತ್ತವೆ.