ದೇಹದ ಶಕ್ತಿಕೇಂದ್ರ ಎಂದು ಸಾಮಾನ್ಯವಾಗಿ ಕರೆಯಲ್ಪಡುವ ಲಿವರ್ ಅಥವಾ ಯಕೃತ್ತು ಒಟ್ಟಾರೆ ಆರೋಗ್ಯದಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ದೇಹವನ್ನು ನಿರ್ವಿಷ ಮಾಡುವುದು, ಚಯಾಪಚಯ ಇತ್ಯಾದಿ ಇದರ ಕೆಲಸ. ಆದರೆ ಫ್ಯಾಟಿ ಲಿವರ್ (Fatty liver disease- ಕೊಬ್ಬಿನ ಪಿತ್ತಜನಕಾಂಗದ ಕಾಯಿಲೆ) ಎಂದು ಕರೆಯಲಾಗುವ ಸಮಸ್ಯೆ ಇಂದು ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದೆ. ಇದು ಯಕೃತ್ತಿನ ಜೀವಕೋಶಗಳಲ್ಲಿ ಹೆಚ್ಚುವರಿ ಕೊಬ್ಬಿನ ಶೇಖರಣೆಯಿಂದ ಉಂಟಾಗುವಂಥದು. ಅದರ ಸಾಮಾನ್ಯ ಕೆಲಸಗಳಿಗೆ ಅಡ್ಡಿಯಾಗುತ್ತದೆ. ಈ ಸ್ಥಿತಿಯ ಆರಂಭಿಕ ಚಿಹ್ನೆಗಳನ್ನು ಗುರುತಿಸುವುದು (Fatty liver symptoms) ಅತ್ಯಂತ ಅಗತ್ಯ. ಲಿವರ್ ಆರೋಗ್ಯದತ್ತ (liver health) ಸೂಕ್ತ ಎಚ್ಚರಿಕೆ ಇರಲಿ.
ಫ್ಯಾಟಿ ಲಿವರ್ ಅನ್ನು ಅರ್ಥ ಮಾಡಿಕೊಳ್ಳುವುದು ಹೇಗೆ?
ಕೊಬ್ಬಿನ ಪಿತ್ತಜನಕಾಂಗದ ಕಾಯಿಲೆಯನ್ನು ಹೆಪಾಟಿಕ್ ಸ್ಟೀಟೋಸಿಸ್ ಎಂದೂ ಕರೆಯುತ್ತಾರೆ. ಇದನ್ನು ಎರಡು ಮುಖ್ಯ ವಿಧಗಳಾಗಿ ವಿಂಗಡಿಸಬಹುದು: ಆಲ್ಕೊಹಾಲ್‌ಯುಕ್ತ ಮತ್ತು ಆಲ್ಕೊಹಾಲ್‌ಯುಕ್ತವಲ್ಲದ ಫ್ಯಾಟಿ ಲಿವರ್ ಎಂದು. ಹೆಸರೇ ಸೂಚಿಸುವಂತೆ ಮೊದಲನೆಯದು ಅತಿಯಾದ ಆಲ್ಕೋಹಾಲ್ ಸೇವನೆಗೆ ಸಂಬಂಧಿಸಿದೆ. ಆದರೆ ಎರಡನೆಯದು ಆಲ್ಕೋಹಾಲ್ ಸೇವನೆಗೆ ಸಂಬಂಧಿಸಿಲ್ಲ. ಆದರೆ ಸ್ಥೂಲಕಾಯ, ಇನ್ಸುಲಿನ್ ಪ್ರತಿರೋಧ ಮತ್ತು ಮೆಟಬಾಲಿಕ್ ಸಿಂಡ್ರೋಮ್‌ನಂತಹ ಅಂಶಗಳೊಂದಿಗೆ ಹೆಚ್ಚಾಗಿ ಸಂಬಂಧಿಸಿದೆ.
ಗಮನಿಸಬೇಕಾದ ಚಿಹ್ನೆಗಳು
- ವಿವರಿಸಲಾಗದ ತೂಕ ಹೆಚ್ಚಳ: ತ್ವರಿತವಾಗಿ ಮತ್ತು ವಿವರಿಸಲಾಗದಂತೆ ತೂಕ ಹೆಚ್ಚಾಗುವುದು. ವಿಶೇಷವಾಗಿ ಕಿಬ್ಬೊಟ್ಟೆಯ ಪ್ರದೇಶದ ಸುತ್ತ. ಇದು ಫ್ಯಾಟಿ ಲಿವರ್‌ಗೆ ಸಂಬಂಧಿಸಿರಬಹುದು. ಇದು ಸಾಮಾನ್ಯವಾಗಿ ಇನ್ಸುಲಿನ್ ಪ್ರತಿರೋಧ ಮತ್ತು ಚಯಾಪಚಯ ಕ್ರಿಯೆಗೆ ಸಂಬಂಧಿಸಿದೆ.
- ಗಾಢಬಣ್ಣದ ಮೂತ್ರ ಮತ್ತು ಮಲ: ಕಡು ಬಣ್ಣದ ಮೂತ್ರ ಮತ್ತು ಬಣ್ಣದ ಮಲ ಇದೆಯಾ. ಹಾಗಿದ್ದರೆ ಇದು ತ್ಯಾಜ್ಯ ಉತ್ಪನ್ನವಾದ ಬಿಲಿರುಬಿನ್ ಅನ್ನು ಸಂಸ್ಕರಿಸುವ ಯಕೃತ್ತಿನ ಸಾಮರ್ಥ್ಯದಲ್ಲಿ ಕೊರತೆಯಾಗಿದೆ ಎಂಬುದರ ಸಂಕೇತ. ಮೂತ್ರ ಮತ್ತು ಮಲ ಬಣ್ಣದಲ್ಲಿನ ಈ ಬದಲಾವಣೆಗಳನ್ನು ನಿರ್ಲಕ್ಷಿಸಬಾರದು.
- ಚರ್ಮದ ಆರೋಗ್ಯದಲ್ಲಿ ಬದಲಾವಣೆ: ಕೊಬ್ಬಿನ ಪಿತ್ತಜನಕಾಂಗದ ಕಾಯಿಲೆಯು ಚರ್ಮ ಮತ್ತು ಕಣ್ಣುಗಳ ಹಳದಿ, ತುರಿಕೆ ಚರ್ಮ ಮತ್ತು ಸುಲಭವಾಗಿ ಮೂಗೇಟುಗಳು ಸೇರಿದಂತೆ ಚರ್ಮದ ಆರೋಗ್ಯದಲ್ಲಿನ ಬದಲಾವಣೆಗಳ ಮೂಲಕ ಪ್ರಕಟವಾಗಬಹುದು. ಈ ರೋಗಲಕ್ಷಣಗಳು ಯಕೃತ್ತಿನ ಕ್ರಿಯೆಯಲ್ಲಿ ಮಂದಗತಿ ಸೂಚಿಸುತ್ತವೆ.
- ಇನ್ಸುಲಿನ್ ಪ್ರತಿರೋಧದ ಚಿಹ್ನೆಗಳು: ಪ್ರಿ ಡಯಾಬಿಟಿಸ್ ಅಥವಾ ಟೈಪ್ 2 ಡಯಾಬಿಟಿಸ್‌ನಂತಹ ಸಮಸ್ಯೆಗಳು, ಅಧಿಕ ರಕ್ತದ ಸಕ್ಕರೆಯ ಮಟ್ಟದಿಂದ ಉಂಟಾಗುವ ಗುಣಲಕ್ಷಣಗಳನ್ನು ಹೊಂದಿದ್ದು, ಕೊಬ್ಬಿನ ಯಕೃತ್ತಿನ ಕಾಯಿಲೆಗೆ ಕಾರಣವಾಗಬಹುದು. ಹೆಚ್ಚಿದ ಬಾಯಾರಿಕೆ, ಆಗಾಗ್ಗೆ ಮೂತ್ರ ವಿಸರ್ಜನೆ ಮತ್ತು ಮಸುಕಾದ ದೃಷ್ಟಿಗಳತ್ತ ಗಮನ ಕೊಡಿ.
- ಆಯಾಸ ಮತ್ತು ದೌರ್ಬಲ್ಯ: ಕೊಬ್ಬಿನ ಯಕೃತ್ತಿನ ಕಾಯಿಲೆಯ ಆರಂಭಿಕ ಚಿಹ್ನೆಗಳಲ್ಲಿ ಒಂದು ವಿವರಿಸಲಾಗದ ಆಯಾಸ ಮತ್ತು ದೌರ್ಬಲ್ಯ. ಶಕ್ತಿಯನ್ನು ಸಂಗ್ರಹಿಸುವ ಮತ್ತು ಬಿಡುಗಡೆ ಮಾಡುವ ಯಕೃತ್ತಿನ ಸಾಮರ್ಥ್ಯ ಕಡಿಮೆಯಾಗುವುದರಿಂದ ಇದು ನಿರಂತರ ಆಯಾಸಕ್ಕೆ ಕಾರಣವಾಗುತ್ತದೆ.
- ಹೊಟ್ಟೆ ಮತ್ತು ಕಾಲುಗಳಲ್ಲಿ ಊತ: ರೋಗವು ಮುಂದುವರಿದಂತೆ, ಕಾಲುಗಳಲ್ಲಿ, ಹೊಟ್ಟೆಯಲ್ಲಿ ನೀರು ತಂಬಿಕೊಳ್ಳಬಹುದು. ಇದು ಹೊಟ್ಟೆಯ ಊತ, ಊದಿಕೊಂಡ ಕಾಲುಗಳು ಮತ್ತು ಕಣಕಾಲುಗಳಿಗೆ ಕಾರಣವಾಗುತ್ತದೆ. ಇದು ಯಕೃತ್ತಿನ ವೈಫಲ್ಯದ ಮುಂದುವರಿದ ಹಂತಗಳನ್ನು ಸೂಚಿಸುತ್ತದೆ.
- ಕಿಬ್ಬೊಟ್ಟೆಯ ಅಸ್ವಸ್ಥತೆ: ಹೊಟ್ಟೆಯ ಮೇಲಿನ ಬಲಭಾಗದಲ್ಲಿ ಅಸ್ವಸ್ಥತೆ ಅಥವಾ ನೋವು ಕೊಬ್ಬಿನ ಶೇಖರಣೆಯಿಂದಾಗಿ ವಿಸ್ತರಿಸಿದ ಯಕೃತ್ತಿನ ಸೂಚಕವಾಗಿರಬಹುದು. ಈ ಅಸ್ವಸ್ಥತೆಯು ಆರಂಭದಲ್ಲಿ ಸೌಮ್ಯವಾಗಿರಬಹುದು. ಅದು ಮುಂದುವರಿದರೆ ನಿರ್ಲಕ್ಷಿಸಬಾರದು.
ಇದನ್ನೂ ಓದಿ: Fatty Liver Disease Foods: ಫ್ಯಾಟಿ ಲಿವರ್ ಸಮಸ್ಯೆಯೇ? ಆಹಾರ ಹೀಗಿರಲಿ