ಹೋಳಿ (Holi 2024) ಆಡುವುದು ಎಲ್ಲರಿಗೂ ಬೇಕು. ಆದರೆ ಆಡಿದ ನಂತರ ಆ ಬಣ್ಣ ತೆಗೆಯುವುದು ಯಾರಿಗೂ ಬೇಡ. ಸಾಂಪ್ರದಾಯಿಕ ʻಗುಲಾಲ್ʼ ಅಥವಾ ಗುಲಾಬಿ ರಂಗನ್ನು ಮೋರೆಯೆಲ್ಲಾ ಬಳಿದುಕೊಂಡು ದಿನಗಟ್ಟಲೆ, ಆ ಬಣ್ಣ ಇಳಿಯದೆ ಕೆಂಬಣ್ಣದ ಮುಖವರ್ಣಿಕೆಯಲ್ಲಿ ಊರೆಲ್ಲ ಸುತ್ತುವುದು ಅಷ್ಟೇನು ಇಷ್ಟವಾಗುವ ಸಂಗತಿಯಲ್ಲ. ಜೊತೆಗೆ, ಅಲರ್ಜಿ, ಕಿರಿಕಿರಿಯಂಥವು ಕಾಣಬಹುದು. ಆದರೆ ಬಿಡದೆ ಹಠ ಮಾಡುವ ಬಣ್ಣಗಳನ್ನು ಸುರಕ್ಷಿತವಾಗಿ ತೆಗೆಯುವುದು ಹೇಗೆ? ಹೆಚ್ಚು ರಾಸಾಯನಿಕಗಳನ್ನು ಬಳಸಿದಷ್ಟೂ ಚರ್ಮಕ್ಕೆ ಇನ್ನಷ್ಟು ಹಾನಿಯಾಗುತ್ತದೆ. ಈ ವಿಷಯದಲ್ಲಿ ನಮ್ಮ ಅಡುಗೆಮನೆಯ ಕೆಲವು ವಸ್ತುಗಳು ಉಪಯುಕ್ತ ನೆರವು ನೀಡಬಲ್ಲವು.
ಕೊಬ್ಬರಿ ಎಣ್ಣೆ
ಬಿಡದೆ ಕಾಡುವ ಬಣ್ಣಗಳನ್ನು ತೆಗೆಯುವುದರಲ್ಲಿ ಮತ್ತು ಚರ್ಮಕ್ಕೆ ಯಾವುದೇ ಹಾನಿಯಾಗದಂತೆ ಕಾಪಾಡುವುದರಲ್ಲಿ ಕೊಬ್ಬರಿ ಎಣ್ಣೆ ನಂಬರ್‌ ೧! ಚರ್ಮದ ಒಳಗೆ ಪ್ರವೇಶಿಸಿ ಕಾಡುವ ಬಣ್ಣದ ಸೂಕ್ಷ್ಮ ಕಣಗಳನ್ನು ತೆಗೆದು ಚರ್ಮದ ಕೋಶಗಳಿಗೆ ಅಗತ್ಯವಾದ ಆರೈಕೆಯನ್ನು ಈ ಎಣ್ಣೆ ನೀಡುತ್ತದೆ. ತ್ವಚೆಯ ತೇವವನ್ನು ಹೆಚ್ಚಿಸಿ, ಯಾವುದೇ ಹಾನಿಯಾಗುವುದನ್ನು ತಡೆಯುತ್ತದೆ. ಸಾಮಾನ್ಯವಾಗಿ ಯಾವುದೇ ಬಣ್ಣಗಳನ್ನಾದರೂ ಈ ಎಣ್ಣೆ ಕ್ಷಿಪ್ರವಾಗಿ ಕರಗಿಸಿ ಬಿಡಿಸಬಲ್ಲದು. ಬಣ್ಣದೋಕುಳಿ ಆಡುವುದಕ್ಕೆ ಮುನ್ನ ಚರ್ಮಕ್ಕೆ ಢಾಳಾಗಿ ಕೊಬ್ಬರಿ ಎಣ್ಣೆಯನ್ನು ಲೇಪಿಸಿಕೊಳ್ಳುವುದು ಉತ್ತಮ ಮಾರ್ಗ.
ನಿಂಬೆಹಣ್ಣು
ಶುಂಠ ಬಣ್ಣಗಳನ್ನು ಒದ್ದೋಡಿಸುವುದಕ್ಕೆ ನಿಂಬೆರಸವೂ ಒಳ್ಳೆಯ ಉಪಾಯ. ಇದರಲ್ಲಿರುವ ನೈಸರ್ಗಿಕ ಆಮ್ಲೀಯ ಅಂಶಗಳು ಬಣ್ಣ ತೆಗೆಯುತ್ತವೆ. ಇದನ್ನು ಚರ್ಮದ ಮೇಲೆ ಸ್ವಲ್ಪವೇ ಹಾಕಿ ನಯವಾಗಿ ಮಸಾಜ್‌ ಮಾಡಿದರೆ ಸಾಕಾದೀತು. ಮುಖದ ಚರ್ಮಕ್ಕೆ ಇದು ಕೊಂಚ ಕಠೋರವಾಗಬಹುದು. ಆದರೆ ದೇಹದ ಉಳಿದೆಡೆ ಇದನ್ನು ಅಲ್ಪ ಪ್ರಮಾಣದಲ್ಲಿ ಬಳಸಬಹುದು. ಒಂದೊಮ್ಮೆ ಬಟ್ಟೆಗೆ ಅಂಟಿರುವ ಬಣ್ಣ ಹೋಗದಿದ್ದರೆ, ಅದಕ್ಕೂ ನಿಂಬೆರಸ ಹಾಕಿ ಉಜ್ಜಿ ತೊಳೆಯಬಹುದು. ಬಟ್ಟೆಗಳೂ ಬಣ್ಣದಿಂದ ಮುಕ್ತಿ ಪಡೆಯುತ್ತವೆ.
ಲೋಳೆಸರ
ಬಹಳಷ್ಟು ಮನೆಗಳಲ್ಲಿ ಸಣ್ಣದೊಂದು ಕುಂಡದಲ್ಲಿ ಇದ್ದಿರಬಹುದು ಲೋಳೆಸರ. ಇದರ ಒಳಗಿನ್‌ ಲೋಳೆಯಂಥ ಅಥವಾ ಜೆಲ್‌ ಅಂಶವನ್ನು ಚರ್ಮಕ್ಕೆ ಧಾರಾಳವಾಗಿ ಹಾಕಿ ನಯವಾಗಿ ಮಸಾಜ್‌ ಮಾಡಿ, ಕೆಲವು ನಿಮಿಷಗಳ ಕಾಲ ಹಾಗೆಯೇ ಬಿಡಿ. ನಂತರ ಉಗುರು ಬಿಸಿ ನೀರಿನಿಂದ ತೊಳೆಯಿರಿ. ಚರ್ಮಕ್ಕೆ ಯಾವುದೇ ಕಿರಿಕಿರಿ ಆಗದಂತೆ ಜೋಪಾನವಾಗಿ ಬಣ್ಣವನ್ನು ಸೂಕ್ಷ್ಮ ರಂಧ್ರಗಳಿಂದ ಬಿಡಿಸುವ ಕೆಲಸವನ್ನಿದು ಮಾಡುತ್ತದೆ. ಒಂದೊಮ್ಮೆ ಲೋಳೆಸರ ಇಲ್ಲದಿದ್ದರೆ, ರಾಸಾಯನಿಕಗಳು ಸೇರದ ಶುದ್ಧ, ನೈಸರ್ಗಿಕ ಅಲೋವೇರಾ ಜೆಲ್‌ ಮಾರುಕಟ್ಟೆಯಲ್ಲಿ ದೊರೆತರೆ, ಅದನ್ನೂ ಉಪಯೋಗಿಸಬಹುದು.
ಸಾಸಿವೆ ಎಣ್ಣೆ
ಯಾವುದೇ ರಾಸಾಯನಿಕಗಳಿಲ್ಲದ ಸಾಸಿವೆ ಎಣ್ಣೆ ಸಹ ಹೋಗಲೊಲ್ಲದ ಬಣ್ಣಗಳನ್ನು ಚರ್ಮದಿಂದ ಬಿಡಿಸಬಲ್ಲದು. ಬಣ್ಣ ಅಂಟಿಕೊಂಡಿರುವ ಭಾಗಕ್ಕೆ ಸಾಸಿವೆ ಎಣ್ಣೆ ಹಾಕಿ ನಯವಾಗಿ ಮಸಾಜ್‌ ಮಾಡಿ, ಉಗುರು ಬಿಸಿ ನೀರಿನಿಂದ ತೊಳೆಯಿರಿ. ಚರ್ಮಕ್ಕೆ ಬೇಕಿರುವ ತೇವವನ್ನು ನೀಡಿ, ಬಣ್ಣವನ್ನು ತೆಗೆದು, ತ್ವಚೆಯನ್ನು ಹೊಳಪಾಗಿಸಿ ಮೃದುವಾಗಿಸಬಲ್ಲದು ಈ ಎಣ್ಣೆ.
ಸೈಂಧವ ಲವಣ
ಈ ಉಪ್ಪನ್ನು ನುಣ್ಣನೆಯ ಪುಡಿ ಮಾಡಿ ತೆಂಗಿನೆಣ್ಣೆಯ ಜೊತೆಗೆ ಸೇರಿಸಿ, ಸ್ಕ್ರಬ್‌ ಮಾಡಬಹುದು. ಇದನ್ನು ಮಾಡುವಾಗ ಕೆಲವು ಹನಿ ಎಸೆನ್ಶಿಯಲ್‌ ಆಯಿಲ್‌ಗಳಲ್ಲಿ ಯಾವುದನ್ನಾದರೂ ಒಂದೆರಡು ಹನಿ ಸೇರಿಸಿದರೆ ಉತ್ತಮ ಫಲಿತಾಂಶ ದೊರೆಯುತ್ತದೆ. ಆದರೆ ಇದನ್ನು ಮುಖಕ್ಕೆ ಹಾಕುವಾಗ ಜಾಗ್ರತೆ ಮಾಡಿ, ತರಿಯಾದ ಈ ಸ್ಕ್ರಬ್‌ನಿಂದ ಉಜ್ಜಿದರೆ ಚರ್ಮಕ್ಕೆ ಹಾನಿಯಾದರೆ ಕಷ್ಟ. ಹಾಗಾಗಿ ಬಳಸುವಾಗ ನಾಜೂಕಿರಲಿ. ಇದನ್ನು ತೆಂಗಿನೆಣ್ಣೆಯ ಬದಲು ನಿಂಬೆರಸದೊಂದಿಗೆ ಸೇರಿಸಿ, ವಸ್ತ್ರಗಳ ಕಲೆ ತೆಗೆಯಲು ಉಪಯೋಗಿಸಬಹುದು.
ಮೊಸರು
ಮಜ್ಜಿಗೆ, ಮೊಸರಿಲ್ಲದ ಅಡುಗೆಮನೆಯೇ ಇಲ್ಲ ಎನ್ನಬಹುದು. ಮೊಸರಿನಲ್ಲಿರುವ ನೈಸರ್ಗಿಕ ಹುಳಿಯಂಶವು ಬಣ್ಣಗಳನ್ನು ಕರಗಿಸಲು ನೆರವಾಗುತ್ತದೆ. ಜೊತೆಗೆ ಜಿಡ್ಡಿನಂಶವು ಚರ್ಮಕ್ಕೆ ಬೇಕಾದ ತೇವವನ್ನು ನೀಡುತ್ತದೆ. ಬಣ್ಣದ ಕಲೆಯಾಗಿರುವ ಚರ್ಮದ ಭಾಗಕ್ಕೆ ಗಟ್ಟಿ ಮೊಸರನ್ನು ಧಾರಾಳವಾಗಿ ಲೇಪಿಸಿ ಹತ್ತಾರು ನಿಮಿಷಗಳ ಕಾಲ ಬಿಡಿ. ನಂತರ ಉಗುರು ಬಿಸಿ ನೀರಿನಿಂದ ತೊಳೆಯಿರಿ. ಇದರಿಂದ ಚರ್ಮಕ್ಕೆ ಅಗತ್ಯವಾಗ ಪೋಷಣೆಯೂ ದೊರೆಯುತ್ತದೆ.