ಅತ್ಯಂತ ಕ್ಲಿಷ್ಟವಾದ ಹತ್ತು-ಹಲವಾರು ಕ್ರಿಯೆಗಳನ್ನು ನಡೆಸುವ ಮಾನವ ದೇಹಕ್ಕೆ ವಿವಿಧ ರೀತಿಯ ಪೋಷಕಾಂಶಗಳು ಒದಗಬೇಕು. ಆಗಷ್ಟೇ ಶರೀರ ಆರೋಗ್ಯಪೂರ್ಣವಾಗಿರಲು ಸಾಧ್ಯ. ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳ ಬಗ್ಗೆ ನಮಗೆ ಒಂದಿಷ್ಟು ಅರಿವಂತೂ ಇದೆ. ಆದರೆ ಕೆಲವು ಪೋಷಕಾಂಶಗಳು ಅತ್ಯಗತ್ಯ ಎಂದಾದರೂ ನಮ್ಮ ಗಮನದಲ್ಲಿ ಇರುವುದೇ ಇಲ್ಲ. ತಜ್ಞರ ಪ್ರಕಾರ, ವಿಟಮಿನ್‌ ಬಿ೧೨ ಅಂಥದ್ದೊಂದು ಅಗತ್ಯವಾದ, ಆದರೆ ನಮ್ಮ ನೆನಪಿಗೆ ಬಾರದ ಪೋಷಕ. ವಿಟಮಿನ್‌ ಬಿ೧೨ ನಮಗೇಕೆ ಬೇಕು ಮತ್ತು ಅದನ್ನು ಯಾವ ಆಹಾರಗಳ ಮೂಲಕ ಪಡೆಯಬಹುದು ಎಂಬ ಬಗ್ಗೆ ಒಂದಿಷ್ಟು ಮಾಹಿತಿಯಿದು.
ಕಣ್ಣಿನ ಆರೋಗ್ಯಕ್ಕೆ: ಅಗತ್ಯವಾಗಿ ಬೇಕು. ಕಣ್ಣಿನ ಮೆಕ್ಯುಲ ಹಾಳಾಗದೆ, ದೃಷ್ಟಿ ಪರಿಪೂರ್ಣವಾಗಿ ಇರಬೇಕೆಂದರೆ ವಿಟಮಿನ್‌ ಬಿ೧೨ ನಮ್ಮ ಆಹಾರದಲ್ಲಿ ಇರಲೇಬೇಕು. ಸಾಮಾನ್ಯವಾಗಿ ವೃದ್ಧಾಪ್ಯದಲ್ಲಿ ತಲೆದೋರುವ ಈ ಬಗೆಯ ದೃಷ್ಟಿದೋಷ, ವಿಟಮಿನ್‌ ಬಿ೧೨ ಕೊರತೆಯಿಂದ ಕಡಿಮೆ ವಯಸ್ಸಿನವರಿಗೂ ಬಾಧಿಸುತ್ತದೆ.
ಖಿನ್ನತೆ ದೂರವಿಡಲು: ಸಾಕಷ್ಟು ಪ್ರಮಾಣದಲ್ಲಿ ವಿಟಮಿನ್‌ ಬಿ೧೨ ನಮ್ಮ ಆಹಾರದ ಭಾಗವಾಗಿರಬೇಕು. ನಮ್ಮನ್ನು ಸಂತೋಷದಿಂದಿಡಲು ಅಗತ್ಯವಾದ ಸೆರೋಟೋನಿನ್‌ ಚೋದಕಗಳು ಬಿಡುಗಡೆ ಆಗುವಲ್ಲಿ ವಿಟಮಿನ್‌ ಬಿ೧೨ ಪಾತ್ರ ಗಣನೀಯ. ಈ ಪೋಷಕತತ್ವ ಕಡಿಮೆ ಆದವರು ಖಿನ್ನತೆಗೆ ಜಾರುವ ಸಾಧ್ಯತೆ, ಉಳಿದವರಿಗೆ ಹೋಲಿಸಿದಲ್ಲಿ, ದುಪ್ಪಟ್ಟು ಎಂದು ಹೇಳಲಾಗುತ್ತದೆ.
ಇದನ್ನೂ ಓದಿ: ವಿಜ್ಞಾನಿಗಳಿಂದ ನ್ಯಾನೋ ಹಚ್ಚೆ ಸಂಶೋಧನೆ; ಆರೋಗ್ಯ ಸಮಸ್ಯೆಗಳಿಂದ ರಕ್ಷೆ?
ಮೆದುಳಿನ ಆರೋಗ್ಯಕ್ಕೆ: ಮಾತ್ರವಲ್ಲ, ನಮ್ಮ ನರಗಳ ಆರೋಗ್ಯಕ್ಕೂ ವಿಟಮಿನ್‌ ಬಿ೧೨ ಅತಿ ಮುಖ್ಯ. ಮೆದುಳಿನ ನ್ಯೂರಾನ್‌ಗಳು ಸಾಯುತ್ತಾ ಬರುವ ಅಟ್ರೋಫಿಯಂಥ ಅವಸ್ಥೆಗೆ ತುತ್ತಾಗಬಾರದೆಂದರೆ ವಿಟಮಿನ್‌ ಬಿ೧೨ ಸೇವನೆ ಸಾಕಷ್ಟಿರಬೇಕು. ಇರುವುದೆಲ್ಲಾ ಮರೆವಂಥ ಡಿಮೆನ್ಶಿಯದಂಥ ಖಾಯಿಲೆ ದೂರವಿಡುವಲ್ಲಿ ಈ ಪೋಷಕಾಂಶದ ಪಾತ್ರ ಪ್ರಮುಖ. ಮೆದುಳಿಗೆ ಅಗತ್ಯ ಶಕ್ತಿಯನ್ನೂ ಇದು ಪೂರೈಸುವುದರಿಂದ, ನಮ್ಮ ಬುದ್ಧಿಯನ್ನೂ ಚುರುಕಾಗಿಸುವಲ್ಲಿ ಸಹಾಯ ಮಾಡುತ್ತದೆ.
ಯಾವೆಲ್ಲಾ ಆಹಾರಗಳಲ್ಲಿ ಇದು ಲಭ್ಯ?: ಹಲವು ರೀತಿಯ ಸಸ್ಯ ಮತ್ತು ಪ್ರಾಣಿ ಜನ್ಯ ಆಹಾರಗಳಿಂದ ಈ ಪೋಷಕಾಂಶವನ್ನು ಪಡೆಯಲು ಸಾಧ್ಯವಿದೆ
ಅಂಗಾಂಗಗಳಲ್ಲಿ: ಅಂದರೆ ಯಕೃತ್ತು, ಕಿಡ್ನಿಯಂಥ ಅಂಗಾಂಗಗಳ ಮಾಂಸದಲ್ಲಿ ವಿಟಮಿನ್‌ ಬಿ೧೨ ಹೇರಳವಾಗಿದೆ. ಇದೊಂದೇ ಅಲ್ಲ, ಹಲವು ರೀತಿಯ ಪೋಷಕಾಂಶಗಳ ಆಗರ ಈ ಮಾಂಸ ಎನ್ನುತ್ತಾರೆ ತಜ್ಞರು.
ಡೈರಿ ಉತ್ಪನ್ನಗಳಲ್ಲಿ: ಹಾಲು, ಮೊಸರು, ಬೆಣ್ಣೆಯಂಥ ಯಾವುದೇ ಡೈರಿಯ ಉತ್ಪನ್ನಗಳಲ್ಲಿ ಈ ಅಂಶ ಲಭ್ಯವಿದೆ. ಹಾಗಾಗಿ ಸಸ್ಯಾಹಾರಿಗಳು ವಿಟಮಿನ್‌ ಬಿ೧೨ ಕೊರತೆಯನ್ನು ಅನುಭವಿಸುವ ಅಗತ್ಯವೇ ಇಲ್ಲ.
ಮೊಟ್ಟೆ: ವಿಟಮಿನ್‌ ಬಿ೧೨ ಮಾತ್ರವೇ ಅಲ್ಲ, ಹಲವು ರೀತಿಯ ಪೋಷಕಾಂಶಗಳನ್ನು ಪೂರೈಸುವ, ಪ್ರಚಲಿತವಿರುವ ಮತ್ತು ಕೈಗೆಟುಕುವ ಆಹಾರವಿದು.
ಇದನ್ನೂ ಓದಿ: Monsoon diet | ಮಳೆಗಾಲದಲ್ಲಿ ಈ ತರಕಾರಿಗಳನ್ನು ತ್ಯಜಿಸಿದರೆ ಆರೋಗ್ಯ
ಮೀನು: ಮತ್ಸಾಹಾರಿಗಳಂತೂ ವಿಟಮಿನ್‌ ಬಿ೧೨ ಕೊರತೆಯನ್ನು ಸುಲಭದಲ್ಲಿ ನೀಗಿಸಿಕೊಳ್ಳಬಹುದು. ಟ್ಯೂನಾ, ಸಾಲ್ಮನ್‌ ರೀತಿಯ ಮೀನುಗಳಲ್ಲಿ ಪ್ರೊಟೀನ್. ಫಾಸ್ಫರಸ್‌, ವಿಟಮಿನ್‌ ಎ, ವಿಟಮಿನ್‌ ಬಿ೩ ಯಂಥ ಬಗೆಬಗೆಯ ಪೋಷಕಾಂಶಗಳು ಲಭ್ಯವಿವೆ.
ಫಾರ್ಟಿಫೈಡ್‌ ಸೀರಿಯಲ್‌: ಅಂದರೆ, ಪ್ರಾಕೃತಿಕವಾಗಿ ಇಲ್ಲದ ಫೋಷಕಗಳನ್ನು ಕೃತಕವಾಗಿ ಸೇರಿಸಿ ತಯಾರಿಸಿದ ಸೀರಿಯಲ್‌. ಕೆಲವು ರೀತಿಯ ಆಹಾರಕ್ಕೆ ಅಲರ್ಜಿ ಇರುವವರಿಗೂ ಇಂಥ ಆಯ್ಕೆಗಳು ಲಭ್ಯವಿದೆ. ಉಳಿದಂತೆ, ಪೋಷಕಾಂಶಗಳು ನೈಸರ್ಗಿಕವಾಗಿಯೇ ದೇಹಕ್ಕೆ ದೊರಕಿದರೆ ಉತ್ತಮ.
ವಿಟಮಿನ್‌ ಬಿ೧೨ ಕೊರತೆ ಇದೆಯೆನಿಸಿದರೆ ವೈದ್ಯರನ್ನು ಕಾಣುವುದು ಮೊದಲ ಆಯ್ಕೆ. ನಮ್ಮ ದೇಹಕ್ಕೆ ಸೂಕ್ತವೆನಿಸುವ ಚಿಕಿತ್ಸೆಯನ್ನು ಅವರಿಂದಲೇ ಪಡೆಯುವುದು ಸರಿಯಾದ ಮಾರ್ಗ.