ಬೆಂಗಳೂರು : ಬಹುಭಾಷಾ ನಟಿ ಪ್ರಣಿತಾ ಸುಭಾಷ್ ಅವರು ತಮ್ಮ ಹೆಣ್ಣು ಮಗುವಿನ ಹೆಸರನ್ನು ಬಹಿರಂಗ ಮಾಡಿದ್ದಾರೆ. ಜತೆಗೆ ಮುದ್ದು ಮಗುವಿನ ಹಲವು ಚಿತ್ರಗಳನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಮಗುವಾಗಿ ಹಲವು ದಿನಗಳು ಕಳೆದರೂ ಅವರು ಹೆಸರನ್ನು ಪ್ರಕಟಿಸಿರಲಿಲ್ಲ. ಇದೀಗ ಫೊಟೊ ಶೂಟ್‌ ಮಾಡಿರುವ ಚಿತ್ರವನ್ನು ಹಾಕುವ ಜತೆಗೆ ಹೆಸರನ್ನು ತಿಳಿಸಿದ್ದಾರೆ. ಮಗುವಿನ ಚಿತ್ರವನ್ನು ನೋಡಿದ ಅವರ ಲಕ್ಷಾಂತರ ಅಭಿಮಾನಿಗಳು ಶುಭಾಶಯಗಳನ್ನು ತಿಳಿಸಿದ್ದಾರೆ.
ತಮ್ಮ ಜೀವನದ ಖುಷಿಯ ಕ್ಷಣಗಳ ಚಿತ್ರವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವುದೆಂದರೆ ಪ್ರಣಿತಾ ಅವರಿಗೆ ಖುಷಿಯ ವಿಚಾರ. ಅವರ ಇನ್‌ಸ್ಟಾಗ್ರಾಮ್‌ ಖಾತೆಗೆ ಪ್ರವೇಶ ಪಡೆದರೆ ಇಂತಹ ಹಲವಾರು ಚಿತ್ರಗಳು ಸಿಗುತ್ತವೆ. ಅಂತೆಯೇ ಮದುವೆಯಿಂದ ಹಿಡಿದು, ಗರ್ಭಧಾರಣೆ, ಸೀಮಂತ, ಹೆರಿಗೆ ಸೇರಿದಂತೆ ಹಲವು ಚಿತ್ರಗಳು ಹಾಗೂ ವಿಡಿಯೊಗಳು ಅವರ ಇನ್‌ಸ್ಟಾ ಖಾತೆಯಲ್ಲಿದೆ. ಆದರೆ, ತಮ್ಮ ಹೆಣ್ಣು ಮಗುವಿನ ಮುಖವನ್ನು ಇದುವರೆಗೆ ಅವರು ತೋರಿಸಿರಲಿಲ್ಲ. ಇದೀಗ ಅವರು ಮಗುವಿನ ಫೋಟೊ ಶೂಟ್‌ ಮಾಡಿ ಹೆಸರಿನೊಂದಿಗೆ ತಿಳಿಸಿದ್ದಾರೆ.
ಪ್ರಣಿತಾ ಅವರು ತಮ್ಮ ಮಗುವಿಗೆ ಅರ್ನಾ ಎಂದು ಹೆಸರಿಟ್ಟಿದ್ದಾರೆ. ಅರ್ನಾಳನ್ನು ನಾನು ಪರಿಚಯಿಸುತ್ತಿದ್ದೇನೆ ಎಂದು ಚಿತ್ರಕ್ಕೆ ಅವರು ಒಕ್ಕಣೆ ಬರೆದಿದ್ದಾರೆ. ಪ್ರಣಿತಾ ಅವರು ೨೦೨೧ರಲ್ಲಿ ಉದ್ಯಮಿ ನಿತಿನ್‌ ರಾಜು ಅವರನ್ನು ವಿವಾಹವಾಗಿದ್ದರು. ಅವರಿಬ್ಬರದ್ದು ಪ್ರೀತಿಯ ಬಂಧ. ಅಂತೆಯೇ ಅವರು ಕೆಲವು ತಿಂಗಳ ಹಿಂದೆ ಅರ್ನಾಗಳಿಗೆ ಜನ್ಮ ನೀಡಿದ್ದರು. ಆರಂಭದಲ್ಲಿ ಮಗುವಿನ ಮುಖವನ್ನು ತೋರಿಸಿರಲಿಲ್ಲ. ಇದೀಗ ಹೆಸರು ಹಾಗೂ ಚಿತ್ರವನ್ನು ಹಾಕಿದ್ದಾರೆ.
ಪ್ರಣಿತಾ ಅವರು ಹೆರಿಗೆ ಸಂದರ್ಭದದಲ್ಲೂ ವಿಶೇಷ ಪೋಸ್ಟ್‌ ಹಾಕಿ ತಮ್ಮ ತಾಯಿಗೆ ಧನ್ಯವಾದ ಹೇಳಿದ್ದರು. “ತಾಯಿ ಸ್ವಯಂ ಸ್ತ್ರಿರೋಗ ತಜ್ಞೆಯಾಗಿದ್ದರಿಂದ ಮಗುವಿನ ಜನ್ಮ ನೀಡುವ ಪ್ರಕ್ರಿಯೆ ಸರಳವಾಯಿತು. ಆದರೆ, ನನ್ನ ತಾಯಿಗೆ ಅದು ಭಾವನಾತ್ಮಕ ಸಂದರ್ಭವಾಗಿತ್ತು,” ಎಂದು ಬರೆದುಕೊಂಡಿದ್ದರು.
ಪ್ರಣಿತಾ ಅವರು ಸಮಾಜ ಸೇವೆಯಲ್ಲೂ ಹೆಸರುವಾಸಿಯಾಗಿದ್ದಾರೆ. ಶಾಲೆಗಳನ್ನು ದತ್ತು ತೆಗೆದುಕೊಂಡು ಅಲ್ಲಿನ ವಿದ್ಯಾರ್ಥಿಗಳ ಶ್ರೇಯಸ್ಸಿಗಾಗಿಯೂ ಪ್ರಯತ್ನಿಸುತ್ತಿದ್ದಾರೆ.
ಇದನ್ನೂ ಓದಿ | Actor Pranitha | ಬಹುಭಾಷಾ ನಟಿಯ ಭೀಮನ ಅಮವಾಸ್ಯೆ ಆಚರಣೆಗೆ ಹಿತೈಷಿಗಳ ಶಹಬ್ಬಾಸ್‌