ಜಮ್ಮು-ಕಾಶ್ಮೀರದಲ್ಲಿ ಉಗ್ರರ ವಿರುದ್ಧ ನಿರಂತರ ಹೋರಾಡುತ್ತಿರುವ ಭಾರತೀಯ ಸೇನೆ ಇದೀಗ ಪೀಪಲ್ಸ್ ಆ್ಯಂಟಿ ಫ್ಯಾಸಿಸ್ಟ್ ಫ್ರಂಟ್ (PAFF) ಸಂಘಟನೆಯ 15 ಉಗ್ರರನ್ನು ಕೊಲ್ಲುವ (Terrorists Killed)ಮೂಲಕ ಒಂದು ಬಹುದೊಡ್ಡ ದಾಳಿಯನ್ನು ತಡೆಗಟ್ಟಿದೆ. ಜೂ.16 ಮತ್ತು 24ರಂದು ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಭಾರತೀಯ ಸೇನೆ ಈ ಸಂಘಟನೆ ಉಗ್ರರ ವಿರುದ್ಧ ಕಾರ್ಯಾಚರಣೆ ನಡೆಸಿತ್ತು. ಇವೆರಡೂ ಪ್ರತ್ಯೇಕ ಕಾರ್ಯಾಚರಣೆಗಳಿಂದ ಒಟ್ಟು 15 ಭಯೋತ್ಪಾದಕರು ಹತ್ಯೆಗೀಡಾಗಿದ್ದಾಗಿ (15PAFF Terrorists Killed) Indian Aerospace Defence News ಟ್ವೀಟ್ ಮಾಡಿ ತಿಳಿಸಿದೆ.
ಅಂದಹಾಗೇ, ಈ ಪಿಎಎಫ್ಎಫ್ ಎಂಬುದು ಜೈಷೆ ಮೊಹಮ್ಮದ್ ಸಂಘಟನೆಯ ಪ್ರಾತಿನಿಧಿಕ ಸಂಘಟನೆಯಾಗಿದ್ದು, 2020ರಿಂದಲೂ ಜಮ್ಮು-ಕಾಶ್ಮೀರದಲ್ಲಿ ಸಕ್ರಿಯವಾಗಿದೆ. ಇದೂ ಒಂದು ಉಗ್ರ ಸಂಘಟನೆ ಎಂದು 2023ರ ಜನವರಿಯಲ್ಲಿ ಭಾರತದ ಕೇಂದ್ರ ಗೃಹ ಇಲಾಖೆ ಗೊತ್ತುಪಡಿಸಿದೆ. ಕಾಶ್ಮೀರದಲ್ಲಿ ಅಸ್ಥಿರತೆ ಹುಟ್ಟಿಸಲೆಂದೇ ರೂಪುಗೊಂಡಿರುವ ಪಿಎಎಫ್ಎಫ್ ವಿರುದ್ಧ ಸೇನೆ ತೀಕ್ಷ್ಣ ಕಾರ್ಯಾಚರಣೆ ನಡೆಸುತ್ತಿದೆ.
Reports : #IndianArmy has killed 15 PAFF terrorists in two separate operations inside PoK on June 16 & 24.#IADN pic.twitter.com/TEuBvqqAy7
— Indian Aerospace Defence News – IADN (@NewsIADN) June 27, 2023
ಹಾಗೇ, ಮಂಗಳವಾರ (ಜೂ.27)ದಂದು ಜಮ್ಮು-ಕಾಶ್ಮೀರದ ಕುಲಗಾಂವ್ ಜಿಲ್ಲೆಯ ಹೂವ್ರಾ ಎಂಬಲ್ಲಿ ಭಾರತೀಯ ಸೇನೆ ಮತ್ತು ಜಮ್ಮು-ಕಾಶ್ಮೀರ ಪೊಲೀಸರು ಜಂಟಿಯಾಗಿ ನಡೆಸಿದ್ದ ಕಾರ್ಯಾಚರಣೆಯಲ್ಲಿ ಅಲ್-ಬದ್ರ್ (ಪಾಕಿಸ್ತಾನ ಗುಪ್ತಚರ ದಳ ಐಎಸ್ಐನಿಂದ ರಚಿತವಾಗಿರುವ ಸಂಘಟನೆ) ಉಗ್ರನೊಬ್ಬ ಹತ್ಯೆಗೀಡಾಗಿದ್ದಾನೆ. ಹಾಗೇ, ಪೊಲೀಸ್ ಸಿಬ್ಬಂದಿಯೊಬ್ಬರಿಗೆ ಗಾಯವಾಗಿದೆ. ಹತ್ಯೆಗೀಡಾದ ಉಗ್ರನನ್ನು ಅದಿಲ್ ಮಜೀದ್ ಲೋನ್ ಎಂದು ಗುರುತಿಸಲಾಗಿದ್ದು, ಈತ ಕುಲಗಾಂವ್ನ ಅಕ್ಬರಾಬಾದ್ ಹೂವ್ರಾ ಏರಿಯಾದ ನಿವಾಸಿಯಾಗಿದ್ದ. ಇವನ ಬಳಿ ಇದ್ದ ಹಲವು ಶಸ್ತ್ರಾಸ್ತ್ರಗಳನ್ನು, ಮದ್ದುಗುಂಡುಗಳು, ಗ್ರೆನೇಡ್, ಮಾರಕಾಸ್ತ್ರಗಳನ್ನು ಸೇನೆ ವಶಪಡಿಸಿಕೊಂಡಿದೆ