ತಿರುವನಂತಪುರಂ: ಮಲಯಾಳಂ ಕಿರುತೆರೆಯ ಖ್ಯಾತ ನಟಿ ಡಾ. ಪ್ರಿಯಾ ಅವರು ಹೃದಯಾಘಾತದಿಂದ (Heart Attack) ಮಂಗಳವಾರ (ಅಕ್ಟೋಬರ್‌ 31) (Dr Priya Dies) ಮೃತಪಟ್ಟಿದ್ದಾರೆ. ಡಾ. ಪ್ರಿಯಾ (35) ಅವರಿಗೆ ಹೃದಯಸ್ತಂಭನ (Cardiac Arrest) ಉಂಟಾಗಿದ್ದು, ಖಾಸಗಿ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ. ಅವರು 8 ತಿಂಗಳ ತುಂಬು ಗರ್ಭಿಣಿಯಾಗಿದ್ದು, ಇನ್ನೊಂದು ತಿಂಗಳು ಇದ್ದಿದ್ದರೆ ಮಗುವನ್ನು ಮುದ್ದಾಡುತ್ತಿದ್ದರು. ನಟಿಯ ನಿಧನಕ್ಕೆ ಮಲಯಾಳಂನ ಖ್ಯಾತ ನಟ-ನಟಿಯರು ಸಂತಾಪ ಸೂಚಿಸಿದ್ದಾರೆ.
ಚೆಕ್‌ಅಪ್‌ಗೆ ಹೋದಾಗಲೇ ಹೃದಯಸ್ತಂಭನ
ನಟಿ ಡಾ. ಪ್ರಿಯಾ ಅವರು ತುಂಬು ಗರ್ಭಿಣಿಯಾದ ಕಾರಣ ನಿತ್ಯದ ಚೆಕ್‌ಅಪ್‌ಗಾಗಿ ಆಸ್ಪತ್ರೆಗೆ ತೆರಳಿದ್ದರು. ಇದೇ ವೇಳೆ ಅವರಿಗೆ ಹೃದಯಸ್ತಂಭನ ಉಂಟಾಗಿದೆ ಎಂದು ತಿಳಿದುಬಂದಿದೆ. ಚಿಕಿತ್ಸೆ ಆರಂಭಿಸಿದರೂ ಅವರು ಕೆಲವೇ ನಿಮಿಷಗಳಲ್ಲಿ ಮೃತಪಟ್ಟರು ಎಂದು ಮೂಲಗಳು ತಿಳಿಸಿವೆ. ಇನ್ನು ನಟಿಯ ಗರ್ಭದಲ್ಲಿದ್ದ ಮಗುವಿನ ಸ್ಥಿತಿಯೂ ಗಂಭೀರವಾಗಿದ್ದು, ತುರ್ತು ನಿಗಾ ಘಟಕದಲ್ಲಿ (ICU) ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ತಿಳಿದುಬಂದಿದೆ.
ನಟ ಕಿಶೋರ್‌ ಸತ್ಯ ಸಂತಾಪ
“ಮಲಯಾಳಂ ಟಿವಿ ಇಂಡಸ್ಟ್ರಿಗೆ ಮತ್ತೊಂದು ಆಘಾತವಾಗಿದೆ. ನಿತ್ಯದ ಚೆಕ್‌ಅಪ್‌ಗೆ ಹೋದ ಡಾ.ಪ್ರಿಯಾ ಅವರಿಗೆ ಹೃದಯಾಘಾತ ಉಂಟಾಗಿದ್ದು, ಅವರು ನಮ್ಮನ್ನೆಲ್ಲ ಅಗಲಿದ್ದಾರೆ. ಗರ್ಭಿಣಿಯಾಗಿದ್ದ ಅವರು ಆರೋಗ್ಯದಿಂದ ಇದ್ದರು. ಇಂತಹ ದುಃಖವನ್ನು ಪ್ರಿಯಾ ಅವರ ಪೋಷಕರು ಹಾಗೂ ಪತಿ ಹೇಗೆ ಸಹಿಸುತ್ತಾರೆ ಎಂಬುದೇ ಗೊತ್ತಾಗುತ್ತಿಲ್ಲ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ” ಎಂದು ನಟ ಕಿಶೋರ್‌ ಸತ್ಯ ಸಂತಾಪ ಸೂಚಿಸಿದ್ದಾರೆ. ಕರುತಮುತ್ತು ಶೋ ಸೇರಿ ಹಲವು ಧಾರಾವಾಹಿಗಳಲ್ಲಿ ಡಾ. ಪ್ರಿಯಾ ನಟಿಸಿ ಖ್ಯಾತಿ ಗಳಿಸಿದ್ದರು. ಇವರ ಜತೆ ಕಿಶೋರ್‌ ಸತ್ಯ ಅವರೂ ನಟಿಸಿದ್ದರು. ವೃತ್ತಿಯಲ್ಲಿ ವೈದ್ಯೆಯಾಗಿದ್ದ ಪ್ರಿಯಾ ಅವರು ನಟನೆಯಿಂದಲೂ ಜನಪ್ರಿಯರಾಗಿದ್ದರು. ಮದುವೆಯಾದ ಬಳಿಕ ಇವರು ನಟನೆಯಿಂದ ಬಿಡುವು ಪಡೆದಿದ್ದರು.
ಇದನ್ನೂ ಓದಿ: Renjusha Menon: ಮಲಯಾಳಂ ಖ್ಯಾತ ನಟಿ ರೆಂಜೂಷಾ ಮೆನನ್ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆ!
ಎರಡು ದಿನಗಳ ಹಿಂದಷ್ಟೇ ಮಲಯಾಳಂ ಚಲನಚಿತ್ರ ಮತ್ತು ಟಿವಿ ಧಾರಾವಾಹಿ ನಟಿ ರೆಂಜೂಷಾ ಮೆನನ್ ಅವರ ಶವ ಪತ್ತೆಯಾಗಿತ್ತು. ಸೋಮವಾರ (ಅ.30) ಅವರ ಅಪಾರ್ಟ್‌ಮೆಂಟ್‌ನಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಅವರ ಶವ ಪತ್ತೆಯಾಗಿತ್ತು. ಅವರಿಗೆ ಕೇವಲ 35 ವರ್ಷ ವಯಸ್ಸಾಗಿತ್ತು. ನಟಿ ತನ್ನ ಕುಟುಂಬದೊಂದಿಗೆ ಅಪಾರ್ಟ್‌ಮೆಂಟ್‌ನಲ್ಲಿ ವಾಸಿಸುತ್ತಿದ್ದು, ಶ್ರೀಕರಿಯಂ ಪೊಲೀಸರು ಈ ಬಗ್ಗೆ ತನಿಖೆ ಆರಂಭಿಸಿದ್ದಾರೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ