ಅಯೋಧ್ಯಾ: 5 ವರ್ಷಗಳ ನಂತರ ಉತ್ತರ ಪ್ರದೇಶದ ಅಯೋಧ್ಯಾ ಜೈಲಿನಿಂದ ಬಿಡುಗಡೆಯಾದ 98ವರ್ಷದ ವೃದ್ಧನಿಗೆ ಪೊಲೀಸ್ ಸಿಬ್ಬಂದಿ ಠಾಣೆಯಲ್ಲಿಯೇ ಸನ್ಮಾನ ಮಾಡಿ, ಕಳಿಸಿಕೊಟ್ಟಿದ್ದಾರೆ. ಉತ್ತರ ಪ್ರದೇಶ ಕಾರಾಗೃಹ ಡಿಜಿ ಆನಂದ್ ಕುಮಾರ್ ಅವರು ತಮ್ಮ ಟ್ವಿಟರ್ನಲ್ಲಿ ವಿಡಿಯೊ ಶೇರ್ ಮಾಡಿಕೊಂಡಿದ್ದಾರೆ. ಅಯೋಧ್ಯಾ ಜೈಲು ಜಿಲ್ಲಾ ಅಧೀಕ್ಷಕ ಶಶಿಕಾಂತ್ ಮಿಶ್ರಾ ಅವರ ನೇತೃತ್ವದಲ್ಲಿ ಆ ವೃದ್ಧರಿಗೆ ಚೆಂದನೆಯ ವಿದಾಯ ಕೊಟ್ಟಿದ್ದನ್ನು ವಿಡಿಯೊದಲ್ಲಿ ನೋಡಬಹುದು.
ಈ ವೃದ್ಧನ ಹೆಸರು ರಾಮ್ ಸೂರತ್ ಎಂದಾಗಿದ್ದು, ಕೆಲವು ಕ್ರಿಮಿನಲ್ ಪ್ರಕರಣಗಳಡಿ ಐದು ವರ್ಷಗಳ ಹಿಂದೆ ಜೈಲು ಸೇರಿದ್ದರು. ಆಗಿನಿಂದಲೂ ಅಯೋಧ್ಯಾ ಜೈಲಿನಲ್ಲಿಯೇ ಇದ್ದರು. 2022ರ ಆಗಸ್ಟ್ಕ್ಕೆ ಅವರ ಶಿಕ್ಷೆ ಮುಗಿಯುವುದಿತ್ತು. ಆದರೆ ಅದಕ್ಕೂ ಮೊದಲು ಮೇ ತಿಂಗಳಲ್ಲಿ ರಾಮ್ ಸೂರತ್ಗೆ ಕೊವಿಡ್ 19 ಸೋಂಕು ತಗುಲಿದ ಕಾರಣ, 90 ದಿನಗಳ ಪೆರೋಲ್ ನೀಡಲಾಗಿತ್ತು. ಹೀಗಾಗಿ ಅವರು ಜೈಲಿನಿಂದ ಹೊರಗೆ ಇದ್ದು ಚಿಕಿತ್ಸೆ ಪಡೆದರು. ಹೀಗೆ ಪೆರೋಲ್ ಆಧಾರದ ಮೇಲೆ ಹೊರಗಿದ್ದ ಅವಧಿಯನ್ನು ಜೈಲಿನಲ್ಲಿ ಪೂರ್ತಿಗೊಳಿಸಿ, ಈಗ ಬಿಡುಗಡೆಯಾಗಿದ್ದಾರೆ.
ಈ 98 ವರ್ಷದ ವೃದ್ಧ ಜೈಲಿನಿಂದ ಬಿಡುಗಡೆಯಾದರೂ, ಅವರನ್ನು ಕರೆದೊಯ್ಯಲು ಯಾರೂ ಬರಲಿಲ್ಲ. ಹೀಗಾಗಿ ನಮ್ಮ ಠಾಣೆಯ ಜೀಪ್ನಲ್ಲೇ ಅವರನ್ನು ಕರೆದುಕೊಂಡು ಹೋಗಿ, ಮನೆಗೆ ಬಿಡಲಾಯಿತು ಎಂದೂ ಕಾರಾಗೃಹ ಡಿಜಿ ತಿಳಿಸಿದ್ದಾರೆ. ಇನ್ನು ಪೊಲೀಸ್ ಸಿಬ್ಬಂದಿ ಆ ವೃದ್ಧನನ್ನು ಕೈ ಹಿಡಿದು ಜೀಪ್ವರೆಗೆ ಕರೆದುಕೊಂಡು ಹೋಗಿ, ಕಳಿಸಿಕೊಟ್ಟಿದ್ದಾರೆ. ಈ ವಿಡಿಯೊ ಅನೇಕರಿಗೆ ಖುಷಿಕೊಟ್ಟಿದ್ದರೆ, ಇನ್ನೂ ಕೆಲವರು ‘ಅಷ್ಟು ಹಿರಿಯ ಜೀವವನ್ನು ಯಾಕಾದರೂ ಜೈಲಿನಲ್ಲಿ ಇಟ್ಟುಕೊಳ್ಳಬೇಕಿತ್ತು’? ಎಂದು ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ಬ್ಯಾಂಕ್ ಅಕೌಂಟ್ಗೆ ಪಾವತಿಯಾದ ಕೋಟ್ಯಂತರ ರೂಪಾಯಿ ತಂದಿಟ್ಟ ಸಂಕಷ್ಟ; ದುಬೈನಲ್ಲಿ ಭಾರತೀಯ ಮೂಲದ ವ್ಯಕ್ತಿಗೆ ಜೈಲುಶಿಕ್ಷೆ