ಉತ್ತರ ಪ್ರದೇಶದ ಸುಲ್ತಾನಪುರದ ಪೊಲೀಸ್ ತರಬೇತಿ ಕೇಂದ್ರದಲ್ಲಿ ತರಬೇತಿ ಪಡೆಯುತ್ತಿದ್ದ ಹೆಡ್ಕಾನ್ಸ್ಟೆಬಲ್ವೊಬ್ಬರು ಎಡವಟ್ಟು ಮಾಡಿ, ಅದಕ್ಕೆ ಸ್ಪಷ್ಟನೆ ನೀಡಿದ್ದಾರೆ. ತಮ್ಮ ತಪ್ಪಿಗೆ ಅವರು ಮೇಲಧಿಕಾರಿಗಳಿಗೆ ಕೊಟ್ಟ ಸ್ಪಷ್ಟನೆ ಪತ್ರ ವೈರಲ್ ಆಗುತ್ತಿದ್ದು, ‘ಅಬ್ಬಾ ಈ ಪೊಲೀಸಪ್ಪನ ಧೈರ್ಯವೇ !’ ಎಂದು ಉದ್ಘರಿಸುವಂತೆ ಮಾಡಿದೆ.
ತರಬೇತಿ ಶಾಲೆಯೆಂದರೆ ಅಲ್ಲಿ ವಿಪರೀತ ಶಿಸ್ತಿರುತ್ತದೆ. ಪೊಲೀಸ್ ಸಿಬ್ಬಂದಿ ಮೈಮರೆಯುವಂತಿಲ್ಲ, ಊಟದಿಂದ ಬೆಳಗ್ಗೆ ಎದ್ದಾಗಿನಿಂದ, ಸಂಜೆವರೆಗೆ ಎಲ್ಲಿಯೂ, ಯಾವ ವಿಚಾರದಲ್ಲೂ ನಿರ್ಲಕ್ಷ್ಯ, ಅಶಿಸ್ತು ತೋರಿಸುವಂತಿಲ್ಲ. ಆದರೆ ಸುಲ್ತಾನಪುರ ತರಬೇತಿ ಶಾಲೆಯಲ್ಲಿ ಟ್ರೇನಿಂಗ್ ಪಡೆಯುತ್ತಿದ್ದ ಹೆಡ್ಕಾನ್ಸ್ಟೆಬಲ್ ರಾಮ್ ಶರೀಫ್ ಯಾದವ್ ಅವರು ಸೋಮವಾರ, ತರಬೇತಿ ಮಧ್ಯೆ, ಹಗಲಲ್ಲೇ ಮಲಗಿ ನಿದ್ದೆ ಮಾಡಿಬಿಟ್ಟಿದ್ದರು. ಅದನ್ನು ನೋಡಿದ ಅವರ ಕಮಾಂಡರ್, ‘ಹೀಗೆ ಟ್ರೇನಿಂಗ್ ಮಧ್ಯೆ ನಿದ್ದೆ ಮಾಡುವುದೆಲ್ಲ ನಿರ್ಲಕ್ಷ್ಯದ ಪರಮಾವಧಿ. ಹಾಗಾಗಿ ನೀವಿದಕ್ಕೆ ಸ್ಪಷ್ಟನೆ ಕೊಡಬೇಕು’ ಎಂದು ಹೇಳಿದ್ದರು.
ಅದರಂತೆ ಹೆಡ್ಕಾನ್ಸ್ಟೆಬಲ್ ಸ್ಪಷ್ಟನೆ ಕೊಟ್ಟಿದ್ದಾರೆ. ‘ನಾನು ಲಖನೌದಿಂದ ಈ ತರಬೇತಿ ಕೇಂದ್ರಕ್ಕೆ ಬಂದಿದ್ದೇನೆ. ಇಲ್ಲಿಗೆ ಬಂದ ನಂತರ ಹಲವು ಸಮಸ್ಯೆಗಳನ್ನು ಎದುರಿಸುತ್ತಿದ್ದೇನೆ. ತಿನ್ನಲು ಸಾಕಷ್ಟು ಆಹಾರ ಸಿಗುತ್ತಿಲ್ಲ. ನನ್ನ ಹೊಟ್ಟೆ ಪೂರ್ತಿಯಾಗಿ ತುಂಬುತ್ತಲೂ ಇರಲಿಲ್ಲ. ಹೀಗಾಗಿ ಸೋಮವಾರ ಬೆಳಗ್ಗೆ ಎದ್ದು 25 ರೊಟ್ಟಿ, ಒಂದು ಪ್ಲೇಟ್ ಅನ್ನ, ಎರಡು ಬಟ್ಟಲು ದಾಲ್ ಮತ್ತು ಒಂದು ಬಟ್ಟಲು ತರಕಾರಿ ತಿಂದೆ. ಹೀಗೆ ಬೆಳಗ್ಗೆ ಬೆಳಗ್ಗೆ ನನ್ನ ಹೊಟ್ಟೆ ಭರ್ತಿಯಾದ ಕಾರಣ, ನನ್ನಲ್ಲಿ ಆಲಸ್ಯ ಮೂಡಿತು. ನಿದ್ದೆಯೂ ಬಂತು’ ಎಂದು ರಾಮ್ ಶರೀಫ್ ಯಾದವ್ ತಮ್ಮ ಮೇಲಧಿಕಾರಿಗೆ ಪತ್ರ ಬರೆದಿದ್ದಾರೆ. ಅಷ್ಟೇ ಅಲ್ಲ ‘ಇನ್ನೊಮ್ಮೆ ಇಂಥ ತಪ್ಪು ಮಾಡೋದಿಲ್ಲ, ದಯವಿಟ್ಟು ಕ್ಷಮಿಸಿ’ ಎಂದು ಕ್ಷಮೆಯನ್ನೂ ಕೇಳಿದ್ದಾರೆ.
ಇದನ್ನೂ ಓದಿ: Viral Photo | ಕೈಲಾಸ ಪರ್ವತದ ಟಾಪ್ ಫ್ಲೋರ್ನಲ್ಲಿ ಹುಟ್ಟಿದ ಗಣೇಶನ ಆಧಾರ್ ಕಾರ್ಡ್ ಇದು !