ಗುರುಗ್ರಾಮ: ಮೂರು ವರ್ಷ ತನ್ನ 10ವರ್ಷದ ಪುತ್ರನೊಂದಿಗೆ, ಮನೆಯೊಳಗೆ ತನ್ನನ್ನು ತಾನು ಬಂಧಿಸಿಕೊಂಡಿದ್ದ ಮಹಿಳೆಯನ್ನು ಅಂತೂ ಪೊಲೀಸರು ಹೊರಗೆ ಕರೆತಂದಿದ್ದಾರೆ. ಮನೆ ಬಾಗಿಲನ್ನು ಒಡೆದು, ತಾಯಿ-ಮಗನನ್ನು ಹೊರಗೆ ಕರೆದುಕೊಂಡು ಬಂದಿದ್ದಾರೆ. ಹರ್ಯಾಣದ ಗುರುಗ್ರಾಮದ ಈ ಮಹಿಳೆ ಕೊರೊನಾ ಸೋಂಕಿಗೆ ಹೆದರಿ, ಹೀಗೆ ಮಗನೊಂದಿಗೆ ಮನೆಯೊಳಗೆ ಸೇರಿಕೊಂಡಿದ್ದಳು. ಪತಿಯನ್ನೂ ಒಳಗೆ ಬಿಟ್ಟುಕೊಂಡಿರಲಿಲ್ಲ. ಅಂತಿಮವಾಗಿ ಆಕೆಯನ್ನು ಪೊಲೀಸರೇ ಗೃಹ ಬಂಧನದಿಂದ ಮುಕ್ತಗೊಳಿಸಿದ್ದಾರೆ. ಫೆ.21ರಂದು ಪೊಲೀಸರು, ಆರೋಗ್ಯಾಧಿಕಾರಿಗಳು, ಮಕ್ಕಳ ಕಲ್ಯಾಣ ಇಲಾಖೆ ಸಿಬ್ಬಂದಿಯೆಲ್ಲ, ಈ ಮಹಿಳೆ ಮನೆಯ ಬಳಿ ಬಂದು, ಬಾಗಿಲನ್ನು ಒಡೆಸಿದ್ದಾರೆ.
ಮಹಿಳೆ ಹೆಸರು ಮುನ್ಮುನ್ ಮಾಜಿ ಮತ್ತು ಆಕೆಯ ಪತಿ ಸುಜನ್ ಮಾಜಿ. 2020ರಲ್ಲಿ ಮೊದಲ ಬಾರಿ ಲಾಕ್ಡೌನ್ ಆದಾಗಲೇ ಮುನ್ಮುನ್ ಮಾಜಿ ಮನೆ ಸೇರಿಕೊಂಡಿದ್ದರು. ಆಗ ಪತಿ-ಮಗನೂ ಕೂಡ ಮನೆಯಲ್ಲೇ ಕಾಲ ಕಳೆದರು. ಆದರೆ ಲಾಕ್ಡೌನ್ನ್ನು ಭಾಗಶಃ ತೆರವುಗೊಳಿಸುತ್ತಿದ್ದಂತೆ, ಖಾಸಗಿ ಕಂಪನಿಯಲ್ಲಿ ಇಂಜಿನಿಯರ್ ಆಗಿದ್ದ ಸುಜನ್ ಕೆಲಸಕ್ಕೆ ಹೊರಟರು. ಒಂದು ದಿನ ಅವರು ಮನೆಯಿಂದ ಹೊರಬಿದ್ದಿದ್ದೇ ನೆಪವಾಗಿ, ಮುನ್ಮುನ್ ಮತ್ತೆ ಅವರನ್ನು ಮನೆಯೊಳಗೆ ಬಿಟ್ಟುಕೊಳ್ಳಲೇ ಇಲ್ಲ. ಮಗನೊಂದಿಗೆ ಮನೆಯ ಒಳಗಿನಿಂದ ಚಿಲಕ ಹಾಕಿಕೊಂಡು, ಬೆಚ್ಚಗೆ ಕುಳಿತುಬಿಟ್ಟರು.
ಇತ್ತ ಪತಿ ಸುಜನ್ ಕಚೇರಿಯಿಂದ ವಾಪಸ್ ಬಂದವ ಪತ್ನಿಯನ್ನು ಪರಿಪರಿಯಾಗಿ ಕೇಳಿಕೊಂಡ, ಮನವೊಲಿಸಲು ಪ್ರಯತ್ನಿಸಿದ. ಅದಾಗದೆ ಇದ್ದಾಗ ಅಲ್ಲೇ ತನ್ನ ಸ್ನೇಹಿತರು, ಬಂಧುಗಳ ಮನೆಯಲ್ಲಿ ಉಳಿದುಕೊಳ್ಳಲು ಪ್ರಾರಂಭಿಸಿದ. ಆದರೆ ಎಷ್ಟು ದಿನ ಹೀಗೇ ನಡೆಯುತ್ತದೆ ಎಂದು, ಪತ್ನಿ-ಮಗ ಇರುವ ಮನೆಯ ಬಳಿಯೇ ಮತ್ತೊಂದು ಬಾಡಿಗೆ ಮನೆಯನ್ನೂ ಮಾಡಿದ. ಪತಿ ಸುಜನ್ ತನ್ನ ಮನೆಯ ಬಾಡಿಗೆ ಕಟ್ಟುವ ಜತೆ, ಪತ್ನಿ-ಮಗ ಇರುವ ಮನೆ ಬಾಡಿಗೆ, ವಿದ್ಯುತ್ ಬಿಲ್, ಮಗನ ಶಾಲಾ ಶುಲ್ಕವನ್ನೂ ಕಟ್ಟುತ್ತಿದ್ದ. ಅಷ್ಟೇ ಅಲ್ಲ, ಕಿರಾಣಿ ಸಾಮಗ್ರಿಗಳು, ಅಗತ್ಯವಸ್ತುಗಳನ್ನು ತಂದು, ಪತ್ನಿ ಇರುವ ಮನೆ ಬಾಗಿಲಿನ ಬಳಿ ಇಟ್ಟು ಹೋಗುತ್ತಿದ್ದ. ಆದರೆ ಆ ಮಹಿಳೆ ಅದ್ಯಾವಾಗ ಅದನ್ನು ಒಳಕ್ಕೆ ತೆಗೆದುಕೊಳ್ಳುತ್ತಿದ್ದಳು ಎಂಬುದು ಗೊತ್ತಿಲ್ಲ. ಪದೇಪದೆ ಖಾಲಿಯಾಗಿ, ಬದಲಿಸಬೇಕಾಗುತ್ತದೆ ಎಂಬ ಕಾರಣಕ್ಕೆ ಸಿಲಿಂಡರ್ ಗ್ಯಾಸ್ ಬಳಕೆ ಬಿಟ್ಟು, ಇಂಡಕ್ಷನ್ ಒಲೆಯಲ್ಲಿ ಅಡುಗೆ ಮಾಡಲು ಶುರು ಮಾಡಿದ್ದರು. ಚಿಕ್ಕಮಕ್ಕಳಿಗೆ ಲಸಿಕೆ ಬರುವವರೆಗೂ ನಾನು ಮನೆ ಬಾಗಿಲು ತೆರೆಯುವುದಿಲ್ಲ ಎಂದೇ ಹಠ ಮಾಡುತ್ತಿದ್ದಳು. 12 ವಯಸ್ಸಿನ ಕೆಳಗಿನ ಮಕ್ಕಳಿಗಾಗಿ ಇನ್ನೂ ಲಸಿಕೆ ಅಭಿವೃದ್ಧಿ ಆಗದ ಕಾರಣ, ಆಕೆ ಮನೆಬಾಗಿಲನ್ನೂ ತೆರೆದಿರಲಿಲ್ಲ.
ಇದನ್ನೂ ಓದಿ: Covid-19 | ಭಾರತದಲ್ಲಿ ಕೊರೊನಾ ಭಯ ದೂರ, ಎರಡು ವರ್ಷದಲ್ಲೇ ಕನಿಷ್ಠ ಕೇಸ್!
ಮುನ್ಮುನ್ ಮಾಜಿ ತನ್ನ ಎಲ್ಲ ಸಂಬಂಧಿಕರೊಂದಿಗೆ ಸಂಪರ್ಕ ಕಡಿತಗೊಡಿಸಿಕೊಂಡಿದ್ದಳು. ಮಗನಿಗೆ ಸ್ಮಾರ್ಟ್ಫೋನ್ ಬಳಕೆ ಮಾಡಲು ಅನುಮತಿ ಕೊಟ್ಟಿದ್ದಳು. ಆತ ಸ್ಕೂಲ್ಗೆ ಹೋಗದೆ, ಆನ್ಲೈನ್ನಲ್ಲೇ ಪಾಠ ಕಲಿಯುತ್ತಿದ್ದ. ಹಾಗೇ, ಪತಿಯೊಂದಿಗೆ ಆಗೊಮ್ಮೆ-ಈಗೊಮ್ಮೆ ವಿಡಿಯೊ ಕಾಲ್ನಲ್ಲಿ ಮಾತನಾಡುತ್ತಿದ್ದಳು. ಆದರೆ ಅವನನ್ನು ಮನೆಯೊಳಕ್ಕೆ ಮಾತ್ರ ಬಿಟ್ಟುಕೊಡುತ್ತಿರಲಿಲ್ಲ. ನೋಡುವಷ್ಟು ನೋಡಿದ ಪತಿ ಸುಜನ್, ಈಗ ಪೊಲೀಸರಿಗೆ ದೂರು ಕೊಟ್ಟಿದ್ದ.
ಈ ಬಗ್ಗೆ ಮಾಹಿತಿ ನೀಡಿದ ಚಕ್ಕರ್ಪುರ ಪೊಲೀಸ್ ಠಾಣೆ ಅಧಿಕಾರಿ ಪ್ರವೀಣ್ ಕುಮಾರ್ ‘ಮೊದಲು ಸುಜನ್ ನನ್ನ ಬಳಿ ಬಂದು ಈ ವಿಷಯ ಹೇಳಿದಾಗ ನಾನು ಅದನ್ನು ತುಂಬ ಗಂಭೀರವಾಗಿ ಪರಿಗಣಿಸಲಿಲ್ಲ. ಇದು ಕೌಟುಂಬಿಕ ವಿಷಯ ಎಂದು ಸುಮ್ಮನಾದೆವು. ಆದರೆ ನಂತರ ಮಗನಿಗೆ ವಿಡಿಯೊ ಕಾಲ್ ಮಾಡಿದಾಗ ನಾನೂ ಮಾತನಾಡಿದೆ. ಆ ಹುಡುಗನ ಬಗ್ಗೆ ಅಯ್ಯೋ ಅನ್ನಿಸಿತು. ಮೂರು ವರ್ಷದಿಂದ ಬಾಲಕ ಸೂರ್ಯನ ಬೆಳಕು ನೋಡದಾಗಿದ್ದ. ಹೀಗಾಗಿ ಪೊಲೀಸ್ ತಂಡವೇ ಹೋಗಿ, ಬಾಗಿಲು ಒಡೆದೆವು’ ಎಂದು ಹೇಳಿದ್ದಾರೆ.