ನವ ದೆಹಲಿ: ಆಮ್ ಆದ್ಮಿ ಪಕ್ಷದ ಚುನಾವಣೋತ್ಸಾಹ ಉತ್ತುಂಗದಲ್ಲಿದೆ. ಗುಜರಾತ್ ವಿಧಾನಸಭೆ ಚುನಾವಣೆ ಇನ್ನೂ ಐದು ತಿಂಗಳು ಬಾಕಿ ಇರುವಾಗಲೇ 10 ಅಭ್ಯರ್ಥಿಗಳ ಹೆಸರನ್ನು ಆಪ್ ಬಿಡುಗಡೆ ಮಾಡಿದೆ (AAP candidates List of Gujarat). 182 ವಿಧಾನಸಭಾ ಕ್ಷೇತ್ರಗಳಿರುವ ಗುಜರಾತ್ನಲ್ಲಿ ಇದೇ ವರ್ಷ ಡಿಸೆಂಬರ್ನಲ್ಲಿ ಚುನಾವಣೆ ನಡೆಯಲಿದ್ದು, ಅಲ್ಲಿ ಅಭ್ಯರ್ಥಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದ ಮೊದಲ ಪಕ್ಷ ಆಪ್ ಆಗಿದೆ.
ದೆಹಲಿಯಲ್ಲಿ ಮಾತ್ರ ಸರ್ಕಾರ ರಚಿಸಿದ್ದ ಆಮ್ ಆದ್ಮಿ ಪಕ್ಷಕ್ಕೆ ಈ ಬಾರಿಯ ಪಂಜಾಬ್ ಗೆಲುವು ಆತ್ಮವಿಶ್ವಾಸ ಹೆಚ್ಚಿಸಿದೆ. ಪಂಜಾಬ್ನಲ್ಲಿ ಸರ್ಕಾರ ರಚನೆ ಮಾಡುತ್ತಿದ್ದಂತೆ, ನಮ್ಮ ಮುಂದಿನ ಗುರಿ ಹಿಮಾಚಲ ಪ್ರದೇಶ ಮತ್ತು ಗುಜರಾತ್ ಎಂದು ಅರವಿಂದ್ ಕೇಜ್ರಿವಾಲ್ ಹೇಳಿಕೊಂಡಿದ್ದರು. ಅದರಂತೆ ಗುಜರಾತ್ನಲ್ಲಿ ಚುನಾವಣೆಗೆ ಇನ್ನೂ ಐದು ತಿಂಗಳು ಬಾಕಿ ಇರುವಾಗಲೇ ಫೀಲ್ಡ್ ವರ್ಕ್ ಪ್ರಾರಂಭ ಮಾಡಿಕೊಂಡಿದ್ದಾರೆ. ಪಂಜಾಬ್ನಲ್ಲಿ ಈ ಹಿಂದೆ ಇದ್ದ ಕಾಂಗ್ರೆಸ್ ಸರ್ಕಾರವನ್ನು ಸೋಲಿಸಿದ ರೀತಿಯಲ್ಲೇ, ಗುಜರಾತ್ನಲ್ಲಿ ಈಗಿರುವ ಬಿಜೆಪಿ ಸರ್ಕಾರವನ್ನು ಸೋಲಿಸಿ, ಅಧಿಕಾರ ಚುಕ್ಕಾಣಿ ಹಿಡಿಯುವ ಉತ್ಸಾಹಲ್ಲಿ ಆಮ್ ಆದ್ಮಿ ಪಕ್ಷವಿದೆ.
ಆಪ್ನ ರಾಷ್ಟ್ರೀಯ ಸಂಚಾಲಕ, ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರು ಗುಜರಾತ್ನ ವೇರಾವಲ್, ಗಿರ್ ಸೋಮನಾಥ್ಗಳಲ್ಲಿ ಚುನಾವಣಾ ಪ್ರಚಾರ ನಡೆಸಿದ್ದಾರೆ. ‘ಆಪ್ ಸರ್ಕಾರ ಅಧಿಕಾರಕ್ಕೆ ಬಂದಿದ್ದೇ ಆದರೆ ನಾವು ಯುವಜನರಿಗೆ ಉದ್ಯೋಗಾವಕಾಶ ನೀಡುತ್ತೇವೆ. ನಿರುದ್ಯೋಗಿಗಳಿಗೆ ತಿಂಗಳ ಭತ್ಯೆ 3 ಸಾವಿರ ರೂ.ಕೊಡುತ್ತೇವೆ’ ಎಂಬ ಭರವಸೆ ನೀಡಿದ್ದಾರೆ. ಇದೀಗ 10 ಕ್ಷೇತ್ರಗಳ ಅಭ್ಯರ್ಥಿಗಳ ಪಟ್ಟಿಯನ್ನು ನೋಡಿದರೆ, ಆಪ್ ಪಕ್ಷದ ಪ್ರಮುಖರು, ಗುಜರಾತ್ನಲ್ಲಿ ಪಕ್ಷ ಸಂಘಟನೆಯಲ್ಲಿ ಸಕ್ರಿಯರಾಗಿ ತೊಡಗಿಸಿಕೊಂಡವರಿಗೆ ಆದ್ಯತೆ ನೀಡಲಾಗಿದ್ದು ಸ್ಪಷ್ಟವಾಗಿ ಗೋಚರಿಸುತ್ತದೆ.
ಅಭ್ಯರ್ಥಿಗಳು ಯಾರು?-ಕ್ಷೇತ್ರ ಯಾವುದು?
1. ಭೇಮಾಭಾಯಿ ಚೌಧರಿ- ದಿಯೋಘಡ್ ಕ್ಷೇತ್ರದಿಂದ ಟಿಕೆಟ್
2. ಜಗ್ಮಲ್ ವಾಲಾ- ಸೋಮನಾಥ್ ಕ್ಷೇತ್ರ
3. ಅರ್ಜುನ್ ರಥ್ವಾ-ಛೋಟಾ ಉದಯ್ಪುರ
4. ಸಾಗರ್ ರಬಾರಿ- ಬೇಚರಾಜಿ ವಿಧಾನಸಭಾ ಕ್ಷೇತ್ರ
5. ವಶ್ರಮ್ ಸಾಗತಿಯಾ- ರಾಜ್‌ಕೋಟ್ ಗ್ರಾಮಾಂತರ
6. ರಾಮ್ ಧಡುಕ್-ಕಮ್ರೇಜ್
7. ಶಿವಲಾಲ್ ಬರಸಿಯಾ-ರಾಜಕೋಟ್ ದಕ್ಷಿಣ
8. ಸುಧೀರ್ ವಾಘಾನಿ-ಗರಿಯಾಧರ್
9. ರಾಜೇಂದ್ರ ಸೋಲಂಕಿ-ಬರ್ಡೋಲಿ
10. ಓಂ ಪ್ರಕಾಶ್ ತಿವಾರಿ-ನರೋಡಾ
ಇದನ್ನೂ ಓದಿ: ಆಪ್‌ಗೆ ಮುಖಭಂಗ; ಭಗವಂತ್‌ ಮಾನ್‌ ಸಂಸದರಾಗಿದ್ದ ಕ್ಷೇತ್ರದಲ್ಲಿ ಎಸ್‌ಎಡಿ-ಎ ಅಭ್ಯರ್ಥಿಗೆ ಗೆಲುವು