ನವ ದೆಹಲಿ: ಖಲಿಸ್ತಾನಿ ನಾಯಕ ಅಮೃತ್ಪಾಲ್ ಸಿಂಗ್ (Amritpal Singh) ಬಂಧನಕ್ಕಾಗಿ ಪಂಜಾಬ್ ಪೊಲೀಸರು ಬೆಟ್ಟ, ಬಿಲಗಳಲ್ಲಿ ಹುಡುಕುತ್ತಿದ್ದರೆ, ಆತ ನವ ದೆಹಲಿಯ ರಸ್ತೆಗಳಲ್ಲಿ ಸನ್ಗ್ಲಾಸ್, ಡೆನ್ಹಿಮ್ ಜಾಕೆಟ್ ಹಾಕಿಕೊಂಡು ಭರ್ಜರಿಯಾಗಿ ಓಡಾಟ ನಡೆಸುತ್ತಿದ್ದಾನೆ. ಒಂದೇ ಒಂದು ವ್ಯತ್ಯಾಸ ಅಂದರೆ ತಲೆಯಲ್ಲಿ ಟರ್ಬನ್ ಇಲ್ಲ. ಯಾರಿಗೂ ಗುರುತು ಸಿಗುವುದಿಲ್ಲ ಎಂಬ ವಿಶ್ವಾಸದಲ್ಲಿ ಎದೆಯುಬ್ಬಿಸಿ ನಡೆಯುತ್ತಿದ್ದಾನೆ ಪ್ರತ್ಯೇಕತಾವಾದಿ ನಾಯಕ. ಜತೆಗೆ ಸಹಚರ ಪಾಪಲ್ಪ್ರೀತ್ ಸಿಂಗ್ ಕೂಡ ಇದ್ದಾನೆ. ಸಿಸಿ ಟಿವಿ ಕ್ಯಾಮೆರಾವೊಂದರಲ್ಲಿ ಆತ ಬಿಂದಾಸ್ ಆಗಿ ಬೀದಿ ಸುತ್ತುತ್ತಿರುವ ವಿಡಿಯೊ ಸೆರೆಯಾಗಿದೆ.
ಮಾರ್ಚ್ 18ರಂದು ಅಮೃತ್ಪಾಲ್ ಸಿಂಗ್ ಬಂಧನಕ್ಕೆ ದೊಡ್ಡ ಮಟ್ಟದ ಕಾರ್ಯಾಚರಣೆ ನಡೆಸಿತ್ತು. 10 ದಿನಗಳಾದರೂ ಆತನ ಪತ್ತೆಯಿಲ್ಲ, ಸುಳಿವಿಲ್ಲ. ನೇಪಾಳದ ಮೂಲಕ ವಿದೇಶಕ್ಕೆ ಹಾರಿದ್ದಾನೆ, ಬಿಯರ್ ಕ್ಯಾನ್ ಹಿಡಿದುಕೊಂಡು ಆರಾಮಕ್ಕೆ ಇದ್ದಾನೆ ಎಂದೆಲ್ಲ ಹೇಳಲಾಗುತ್ತಿದ್ದರೂ ಪೊಲೀಸರಿಗೆ ಆತನ ಇರುವಿಕೆಯ ಬಗ್ಗೆ ಕಿಂಚಿತ್ತೂ ಮಾಹಿತಿ ಸಿಗುತ್ತಿಲ್ಲ. ಆದರೆ, ಪೊಲೀಸರು ಅಮೃತ್ಪಾಲ್ನನ್ನು ಬೆನ್ನಟ್ಟಿದ ಮೂರು ದಿನಗಳ ಬಳಿಕ ಆತ ದೆಹಲಿಯಲ್ಲಿ ಇದ್ದಿದ್ದು ವಿಡಿಯೊ ಫೂಟೇಜ್ ಮೂಲಕ ಗೊತ್ತಾಗಿದೆ.
ಅಮೃತ್ಪಾಲ್ ಡೆಲ್ಲಿಯಲ್ಲೇ ಬಚ್ಚಿಕೊಂಡು ಪೊಲೀಸರಿಗೆ ಚಳ್ಳೆ ಹಣ್ಣು ತಿನ್ನಿಸುತ್ತಿದ್ದಾನೆ ಎಂಬ ಗುಮಾನಿಯೂ ಇದೀಗ ಶುರುವಾಗಿದೆ. ಪೊಲೀಸರು ಪಂಜಾಬ್ನಲ್ಲಿ ಅಮೃತ್ಪಾಲ್ಗಾಗಿ ಅಟ್ಟಳಿಗೆ, ಮಂಚದಡಿಯಲ್ಲೆಲ್ಲ ಹುಡುಕುತ್ತಿರುವಾಗ ಆತ ನನ್ನ ಸಂಪರ್ಕಗಳನ್ನು ಬಳಸಿಕೊಂಡು ಹರಿಯಾಣದ ಕುರುಕ್ಷೇತ್ರದ ಮೂಲಕ ಡೆಲ್ಲಿ ತಲುಪಿರಬಹುದು ಎಂದು ಹೇಳಲಾಗುತ್ತಿದೆ. ಬಂದವನೇ ಮೊದಲು ತನ್ನ ಪ್ರಮುಖ ಗುರುತಾಗಿರುವ ಟರ್ಬನ್ ಕಿತ್ತು ಮೂಲೆಗಿಟ್ಟು ಚಂದದ ತಂಪುಕನ್ನಡಕ ಹಾಕಿಕೊಂಡು ಓಡಾಡುತ್ತಿದ್ದಾನೆ. ಡೆನ್ಹಿಮ್ ಜಾಕೆಟ್ ಹಾಕಿಕೊಂಡ ಬಳಿಕವಂತೂ ಯಾರೆಂದು ಗುರ್ತು ಹಿಡಿಯಲೂ ಸಾಧ್ಯವಾಗುತ್ತಿಲ್ಲ ಎಂದು ಹೇಳಲಾಗಿದೆ.
ಗಡಿಯಲ್ಲಿ ಕಣ್ಗಾವಲು
ಅಮೃತ್ಪಾಲ್ ಸಿಂಗ್ ಇನ್ನೂ ಡೆಲ್ಲಿಯಲ್ಲೇ ಇದ್ದಾನೆ ಎಂಬುದು ಪೊಲೀಸರ ಅನುಮಾನ. ಅಲ್ಲದೆ, ನಕಲಿ ಪಾಸ್ಪೋರ್ಟ್ ಬಳಸಿಕೊಂಡು ನೇಪಾಳಕ್ಕೆ ಪರಾರಿಯಾಗುವ ಸಾಧ್ಯತೆಗಳೂ ಹೆಚ್ಚು ಎನ್ನಲಾಗುತ್ತಿದೆ. ಹೀಗಾಗಿ ಅಲ್ಲಿನ ಗಡಿಗಳಲ್ಲಿ ಭಾರತದ ಪೊಲೀಸರು ಕಣ್ಗಾವಲು ಇಟ್ಟಿದ್ದಾರೆ.
ಸೋಮವಾರ ಅಮೃತ್ಪಾಲ್ ಸಿಂಗ್ ಬಿಯರ್ ಟಿನ್ ಹಿಡಿದುಕೊಂಡು ಆರಾಮವಾಗಿ ಕುಳಿತಿರುವ ಫೋಟೋ ಒಂದು ಸೋಶಿಯಲ್ ಮೀಡಿಯಾಗಳಲ್ಲಿ ಹರಿದಾಡಿತ್ತು. ಪೊಲೀಸರ ಪ್ರಕಾರ ಪಂಜಾಬ್ನಿಂದ ಓಡಿ ಹೋಗಿರುವ ಆತ ತನ್ನ ಪರಿಚಿತರ ಮೂಲಕ ಆರಾಮ ಜೀವನ ನಡೆಸುತ್ತಿದ್ದಾನೆ.