ನವ ದೆಹಲಿ: ಲಕ್ಷ್ಮೀದೇವಿಯನ್ನು ಪೂಜಿಸಿದರೆ ಮಾತ್ರ ಶ್ರೀಮಂತರಾಗುತ್ತಾರೆ, ಸರಸ್ವತಿಯನ್ನು ಆರಾಧಿಸಿದರೆ ಮಾತ್ರ ವಿದ್ಯೆ ಒಲಿಯುತ್ತದೆ ಎಂದಾಗಿದ್ದರೆ, ಮುಸ್ಲಿಮರು ಹೇಗೆ ಶ್ರೀಮಂತರಾಗುತ್ತಿದ್ದರು? ವಿದ್ವಾಂಸರಾಗುತ್ತಿದ್ದರು? ಮುಸ್ಲಿಮರು ಯಾರೂ ಲಕ್ಷ್ಮೀ, ಸರಸ್ವತಿ ಪೂಜೆ ಮಾಡುವುದಿಲ್ಲ. ಹಾಗಿದ್ದರೂ ಅವರಲ್ಲಿ ಸಿರಿವಂತರು, ಪಂಡಿತರು ಇಲ್ಲವೇ? ಎಂದು ಬಿಜೆಪಿ ಶಾಸಕ ಲಲನ್ ಪಾಸ್ವಾನ್ ಪ್ರಶ್ನೆ ಮಾಡಿ ವಿವಾದ ಸೃಷ್ಟಿಸಿದ್ದರು.
ಈಗ ಕಾಂಗ್ರೆಸ್ ಹಿರಿಯ ನಾಯಕ ಶಿವರಾಜ್ ಪಾಟೀಲ್ ಕೂಡ ಅಂಥದ್ದೆ ಒಂದು ವಿತಂಡವಾದ ಮುಂದಿಟ್ಟಿದ್ದಾರೆ. ‘ಜಿಹಾದ್’ ಪರಿಕಲ್ಪನೆ ಇರುವುದು ಕೇವಲ ಇಸ್ಲಾಂನಲ್ಲಷ್ಟೇ ಅಲ್ಲ. ಹಿಂದುಗಳ ಭಗವದ್ಗೀತೆ, ಕ್ರಿಶ್ಚಿಯನ್ರಲ್ಲೂ ಇದೆ. ಆಗ ಮಹಾಭಾರತದಲ್ಲಿ ಅರ್ಜುನನಿಗೆ ಕೃಷ್ಣಪರಮಾತ್ಮ ಬೋಧನೆ ಮಾಡಿದ್ದೂ ಕೂಡ ‘ಜಿಹಾದ್’ ಅಲ್ಲವೇ? ಎಂದು ಕೇಳಿದ್ದಾರೆ.
ಕಾಂಗ್ರೆಸ್ ನಾಯಕ, ಮಾಜಿ ಕೇಂದ್ರ ಸಚಿವ ಮೋಹ್ಸಿನಾ ಕಿದ್ವಾಯಿ ಅವರ ಜೀವನಚರಿತ್ರೆಯನ್ನೊಳಗೊಂಡ ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದ ಶಿವರಾಜ್ ಪಾಟೀಲ್, ‘ಮುಸ್ಲಿಮರ ಜಿಹಾದ್ ಬಗ್ಗೆ ಅನೇಕರೀತಿಯ ಚರ್ಚೆಗಳು ನಡೆಯುತ್ತಿವೆ. ಆದರೆ ಜಿಹಾದ್ ಎಲ್ಲ ಕಡೆಗಳಲ್ಲೂ ಇದೆ. ಕೇವಲ ಇಸ್ಲಾಂನಲ್ಲಿ ಮಾತ್ರವಲ್ಲ. ಯಾವಾಗ ನಮ್ಮ ಆಶಯ, ಕಾಯಕಗಳು ಎಲ್ಲ ಸರಿಯಾಗಿಯೇ ಇದ್ದರೂ ಅದನ್ನು ಯಾರೂ ಅರ್ಥ ಮಾಡಿಕೊಳ್ಳದೆ, ನಮಗೆ ಸಹಕಾರ ನೀಡುವುದಿಲ್ಲವೋ, ಆಗ ಸಹಜವಾಗಿಯೇ ಅಲ್ಲಿ ಬಲಪ್ರದರ್ಶನ ಆಗುತ್ತದೆ. ಅದೇ ಹೋರಾಟ, ಜಿಹಾದ್ ಎನ್ನಿಸಿಕೊಳ್ಳುತ್ತದೆ. ಹಾಗಾಗಿ ಜಿಹಾದ್ ಇಸ್ಲಾಂನಲ್ಲಿ ಮಾತ್ರವಿದೆ ಎಂದುಕೊಳ್ಳಬಾರದು. ಭಗವದ್ಗೀತೆಯಲ್ಲೂ ಹೇಳಿದ್ದು ಜಿಹಾದ್..ಕ್ರಿಶ್ಚಿಯನ್ ಧರ್ಮದಲ್ಲೂ ಜಿಹಾದ್ ಇದೆ’ ಎಂದು ಶಿವರಾಜ್ ಪಾಟೀಲ್ ತಿಳಿಸಿದ್ದಾರೆ.
ಶಿವರಾಜ್ ಪಾಟೀಲ್ ಈ ಮಾತಿಗೆ ಬಿಜೆಪಿ ತಿರುಗೇಟು ಕೊಟ್ಟಿದೆ. ಪ್ರತಿಕ್ರಿಯೆ ನೀಡಿದ ಬಿಜೆಪಿ ವಕ್ತಾರ ಶೆಹಜಾದ್ ಪೂನಾವಾಲಾ, ‘ಕಾಂಗ್ರೆಸ್ನದ್ದು ಹಿಂದು ವಿರೋಧಿ ಮತ್ತು ಮತಬ್ಯಾಂಕ್ ರಾಜಕಾರಣ’ ಎಂದು ಹೇಳಿದ್ದಾರೆ. ಹಾಗೇ, ‘ಕಾಂಗ್ರೆಸ್ ಹಿಂದು/ಕೇಸರಿ ಭಯೋತ್ಪಾದನೆ ಸೃಷ್ಟಿಸಿತು. ರಾಮಮಂದಿರ ನಿರ್ಮಾಣವನ್ನು ವಿರೋಧಿಸಿತು. ಭಗವಂತ ಶ್ರೀರಾಮನ ಅಸ್ತಿತ್ವವನ್ನೇ ಪ್ರಶ್ನಿಸಿತು. ಹಿಂದುತ್ವವನ್ನು ಐಸಿಸ್ಗೆ ಹೋಲಿಸಿತು ಎಂದು ಅವರು ಆಕ್ರೋಶಭರಿತರಾಗಿ ಟ್ವೀಟ್ ಮಾಡಿದ್ದಾರೆ.
ಪಾಟೀಲ್ ಸಮರ್ಥನೆ !
ತಮ್ಮ ಮಾತುಗಳಿಂದ ವಿವಾದ ಸೃಷ್ಟಿಯಾಗುತ್ತಿದೆ ಎಂಬುದನ್ನು ಅರಿತ ಶಿವರಾಜ್ ಪಾಟೀಲ್ ಸಮರ್ಥನೆ ನೀಡಲು ಮುಂದಾಗಿದ್ದಾರೆ. ‘ಕೃಷ್ಣ ಅರ್ಜುನನಿಗೆ ಬೋಧಿಸಿದ್ದು ಜಿಹಾದ್ ಎಂದು ನಾನು ಹೇಳಿಲ್ಲ. ಶ್ರೀಕೃಷ್ಣ ಪರಮಾತ್ಮ ಅರ್ಜುನನಿಗೆ ಬೋಧಿಸಿದ ವಿಚಾರಗಳನ್ನು ಜಿಹಾದ್ ಎಂದು ಕರೆಯಲು ಸಾಧ್ಯವಿಲ್ಲ ಎಂದೇ ನಾನು ಹೇಳಿದ್ದೆ. ಅದನ್ನು ನೀವು ತಿರುಚಿದ್ದೀರಿ’ ಎಂದು ಮಾಧ್ಯಮದವರಿಗೇ ತಿರುಗಿ ಹೇಳಿದ್ದಾರೆ.
ಇದನ್ನೂ ಓದಿ: ಲಕ್ಷ್ಮಿ ದೇವಿಯನ್ನು ಪೂಜಿಸದ ಮುಸ್ಲಿಮರಲ್ಲೂ ಶ್ರೀಮಂತರಿದ್ದಾರೆ; ಹಿಂದುಗಳ ನಂಬಿಕೆಗೆ ಬಿಜೆಪಿ ಶಾಸಕನಿಂದ ಅಪಮಾನ