ಮಥುರಾದ ಬಿಜೆಪಿ ಸಂಸದೆ, ಖ್ಯಾತ ನಟಿ ಹೇಮಾ ಮಾಲಿನಿಯವರು ಚೆಂದನೆಯ ಭಜನೆ ಹಾಡಿರುವ ವಿಡಿಯೊ ವೈರಲ್ ಆಗುತ್ತಿದೆ. ಹೇಮಮಾಲಿನಿಯವರು ವೃಂದಾವನದಲ್ಲಿರುವ ಶ್ರೀ ರಾಧಾರಮಣ ದೇವಸ್ಥಾನ ಜನವರಿ 14ರಂದು ಭೇಟಿ ಕೊಟ್ಟಿದ್ದರು. ಇಲ್ಲಿ ಪ್ರಾರ್ಥನೆ-ಪೂಜೆ ಸಲ್ಲಿಸಿದ ಬಳಿಕ ‘ಹರೇ ಕೃಷ್ಣ, ಹರೇ ರಾಮ’ ಭಜನೆ ಹಾಡಿದ್ದಾರೆ.
ಗುಲಾಬಿ ಬಣ್ಣದ ಸೀರೆಯುಟ್ಟು ದೇಗುಲಕ್ಕೆ ಬಂದಿದ್ದ ಹೇಮಾ ಮಾಲಿನಿ, ಅಲ್ಲಿ ಮೈಕ್ ಮುಂದೆ ನಿಂತು ಭಜನೆ ಹೇಳಲು ಪ್ರಾರಂಭಿಸುತ್ತಿದ್ದಂತೆ, ನೆರೆದಿದ್ದ ಭಕ್ತರೂ ಕೂಡ ಅವರೊಂದಿಗೆ ಧ್ವನಿಗೂಡಿಸಿದರು. ಹೇಮಾ ಮಾಲಿನಿ ಒಳ್ಳೆಯ ನಟಿ ಹಾಗೇ, ಅದ್ಭುತ ಕ್ಲಾಸಿಕಲ್ ಡ್ಯಾನ್ಸರ್. ಮಥುರಾದಲ್ಲೇ ಅದೆಷ್ಟೋ ಸಮಾರಂಭಗಳಲ್ಲಿ ನೃತ್ಯ ಮಾಡಿದ್ದಾರೆ. ಆದರೆ ಇದೇ ಮೊದಲ ಬಾರಿಗೆ ಎಂಬಂತೆ ಸಾರ್ವಜನಿಕರ ಎದುರು ಹಾಡಿದ್ದಾರೆ. ಒಂದರ ಬೆನ್ನಿಗೆ ಒಂದರಂತೆ ಸುಮಾರು 4 ಭಜನೆಗಳನ್ನು ಅವರು ಹಾಡಿದ್ದಾರೆ. ಒಟ್ಟಾರೆ ಆ ದೇಗುಲದಲ್ಲಿ ನೆರೆದಿದ್ದವರೆಲ್ಲ ಹೇಮಾ ಮಾಲಿನಿ ಭಜನೆಯಲ್ಲಿ ಮಿಂದೆದ್ದಿದ್ದಾರೆ.
ಹಾಗೇ ಹೇಮಾ ಮಾಲಿನಿಯವರು ಕೃಷ್ಣನ ಭಕ್ತೆ. ಅವರು ಮೊದಲಿನಿಂದಲೂ ಆಗಾಗ ಕೃಷ್ಣನ ದೇವಸ್ಥಾನಗಳಿಗೆ ಭೇಟಿಕೊಟ್ಟು, ಪೂಜೆ ಸಲ್ಲಿಸುತ್ತಾರೆ. ಹಾಗೇ, ಈ ದೇವಸ್ಥಾನಕ್ಕೂ ಸಾಕಷ್ಟು ಬಾರಿ ಬಂದಿದ್ದಾರೆ. ಅಷ್ಟೇ ಅಲ್ಲ, ಶ್ರೀಕೃಷ್ಣನಿಗೆ ನೃತ್ಯಸೇವೆಯನ್ನೂ ಅರ್ಪಿಸಿದ್ದಾರೆ.
ಇದನ್ನೂ ಓದಿ: ಗುಂಡಿ ಬಿದ್ದ ಮುಂಬೈ ರಸ್ತೆಗಳ ಬಗ್ಗೆ ನಟಿ ಹೇಮಾ ಮಾಲಿನಿ ಅಸಮಾಧಾನ