ನವ ದೆಹಲಿ: ಹರ್ಯಾಣ ಮೂಲದ ಬಾಡಿಬಿಲ್ಡರ್, ಸೋಷಿಯಲ್ ಮೀಡಿಯಾ ಸ್ಟಾರ್ ಬಾಬಿ ಕಟಾರಿಯಾ ಸ್ಪೈಸ್ ಜೆಟ್ ವಿಮಾನದಲ್ಲಿ ಕುಳಿತು ಸಿಗರೇಟ್ ಸೇದುತ್ತಿರುವ ವಿಡಿಯೋ, ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿವೆ. ಬಾಬಿ ಕಟಾರಿಯಾ ಸಿಗರೇಟ್ ಸೇದುತ್ತ ಉದ್ಧಟತನದ ಪೋಸ್ ಕೊಟ್ಟ ವಿಡಿಯೋದ ಬಗ್ಗೆ ಕೇಂದ್ರ ವಿಮಾನಯಾನ ಇಲಾಖೆ ಸಚಿವ ಜ್ಯೋತಿರಾದಿತ್ಯಾ ಸಿಂಧಿಯಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಹಾಗೇ, ಈ ಬಗ್ಗೆ ತನಿಖೆಗೆ ಆದೇಶ ನೀಡಿದ್ದಾರೆ.
ವಿಮಾನದಲ್ಲಿ ಧೂಮಪಾನ ಮಾಡುವಂತಿಲ್ಲ. 1937ರ ಏರ್ಕ್ರಾಫ್ಟ್ ನಿಯಮದಡಿ ಸ್ಮೋಕಿಂಗ್ನ್ನು ನಿಷೇಧಿಸಲಾಗಿದೆ. ಈ ಬಗ್ಗೆ ಎಷ್ಟೋ ಜನರಿಗೆ ಸರಿಯಾಗಿ ಅರಿವು ಇಲ್ಲದೆ, ಏರ್ಪೋರ್ಟ್ಗೆ ಸಿಗರೇಟ್ ತೆಗೆದುಕೊಂಡು ಹೋದರೆ ಅವರಿಗೆ ವಿಮಾನ ಹತ್ತಲು ಪ್ರವೇಶ ಕೊಡುವುದಿಲ್ಲ ಅಥವಾ ಸಿಗರೇಟ್ನ್ನು ವಶಪಡಿಸಿಕೊಳ್ಳಲಾಗುತ್ತದೆ. ಇಷ್ಟೆಲ್ಲ ಕಠಿಣ ನಿಯಮಗಳು ಇದ್ದಾಗ್ಯೂ ಬಾಬಿ ಕಟಾರಿಯಾ ವಿಮಾನದ ಮೇಲೆ ಧೂಮಪಾನ ಮಾಡಿದ್ದು ಹೇಗೆ? ಅವರಿಗೆ ಸಿಗರೇಟ್ ಕೊಂಡೊಯ್ಯಲು ಅವಕಾಶ ಕೊಟ್ಟಿದ್ಯಾರು? ಎಂಬಿತ್ಯಾದಿ ವಿಚಾರಗಳ ತನಿಖೆ ನಡೆಯಲಿದೆ.
ಈ ಬಾಬಿ ಕಟಾರಿಯಾ ವಿಮಾನದ ಹಿಂಭಾಗದಲ್ಲಿರುವ ಒಂದು ಸೀಟ್ನಲ್ಲಿ, ಒಂದು ಕಾಲ ಮೇಲೆ, ಇನ್ನೊಂದು ಕಾಲು ಹಾಕಿ ಮಲಗಿ, ತುಂಬ ಸ್ಟೈಲೀಶ್ ಆಗಿ ಸಿಗರೇಟ್ ಹಚ್ಚುವುದನ್ನು ವಿಡಿಯೋದಲ್ಲಿ ನೋಡಬಹುದು. ವಿಡಿಯೋವನ್ನು ಅನೇಕರು ಶೇರ್ ಮಾಡಿಕೊಂಡು, ‘ಬಾಬಿ ಕಟಾರಿಯಾಗೆ ಹೊಸ ರೂಲ್ಸಾ? ಅವರಿಗೆ ಧೂಮಪಾನ ನಿಷೇಧ ಅನ್ವಯ ಆಗುವುದಿಲ್ಲವಾ?’ ಎಂಬಿತ್ಯಾದಿ ಪ್ರಶ್ನೆಗಳನ್ನು ಕೇಳಿದ್ದಾರೆ.
ಸ್ಪೈಸ್ ಜೆಟ್ ಹೇಳೋದೇನು?
ಬಾಬಿ ಕಟಾರಿಯಾ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸ್ಪೈಸ್ ಜೆಟ್ ವಿಮಾನಯಾನ ಸಂಸ್ಥೆ ಹೇಳಿಕೆ ಬಿಡುಗಡೆ ಮಾಡಿದ್ದು, ‘ಈ ವಿಡಿಯೋ ಈಗಿನದ್ದಲ್ಲ. ಮೊಟ್ಟಮೊದಲು ನಮ್ಮ ಗಮನಕ್ಕೆ ಬಂದಿದ್ದು 2022ರ ಜನವರಿಯಲ್ಲಿ. ಆಗಲೇ ನಾವು ಗುರ್ಗಾಂವ್ನ ಉದ್ಯೋಗ ವಿಹಾರ್ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದೇವೆ. ಜನವರಿ 20ರಂದು ದುಬೈನಿಂದ ದೆಹಲಿಗೆ ಆಗಮಿಸಿದ ವಿಮಾನದ 21ನೇ ಸಾಲಿನ ಸೀಟ್ನಲ್ಲಿ ಬಾಬಿ ಕಟಾರಿಯಾ ಸಿಗರೇಟ್ ಸೇದಿದ್ದಾರೆ ಎಂಬುದು ಗೊತ್ತಾಗಿದೆ. ಅಂದು ಬೇರೆ ಯಾವುದೇ ಪ್ರಯಾಣಿಕರಿಗಾಗಲೀ, ವಿಮಾನದ ಸಿಬ್ಬಂದಿಗಾಗಲೀ ಗಮನಕ್ಕೆ ಬಂದಿರಲಿಲ್ಲ ಎಂಬುದು ಪ್ರಾಥಮಿಕವಾಗಿ ಗೊತ್ತಾಗಿದೆ. ಇನ್ನಷ್ಟು ಆಳವಾದ ತನಿಖೆ ನಡೆಯುತ್ತಿದೆ’ ಎಂದು ತಿಳಿಸಿದೆ.
ಕಟಾರಿಯಾ ಹೇಳಿದ್ದೇನು?
ತಾವು ವಿಮಾನದಲ್ಲಿ ಸ್ಮೋಕ್ ಮಾಡಿದ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಬಾಬಿ ಕಟಾರಿಯಾ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದಾರೆ. ‘ಇದು ನನಗೆ ನೆನಪಿರುವಂತೆ 2019ರಲ್ಲೋ, 2020ರಲ್ಲೋ ಚಿತ್ರೀಕರಣವಾದ ವಿಡಿಯೋ. ಮುಖ್ಯವಾಗಿ ಇದು ನಿಜವಾದ ವಿಮಾನ ಆಗಿರಲೇ ಇಲ್ಲ. ಅದೊಂದು ಡಮ್ಮಿ ಪ್ಲೇನ್ ಆಗಿತ್ತು. ನನ್ನ ಬಯೋಪಿಕ್ ಚಿತ್ರೀಕರಣದ ಒಂದು ಭಾಗವಷ್ಟೇ’ ಎಂದು ಸಮರ್ಥನೆ ಮಾಡಿಕೊಂಡಿದ್ದಾರೆ. ‘ಈ ಚಿತ್ರೀಕರಣ ನಡೆದಿದ್ದು ದುಬೈನಲ್ಲಿ. ವಿಮಾನದಲ್ಲಿ ಇದ್ದವರೆಲ್ಲ ಶೂಟಿಂಗ್ನಲ್ಲಿ ಪಾಲ್ಗೊಂಡವರೇ ಆಗಿದ್ದರು. ನನ್ನ ಬಯೋಪಿಕ್ ಶೂಟಿಂಗ್ 2019ರಲ್ಲೇ ಪ್ರಾರಂಭವಾಗಿದ್ದು, 2024ರಲ್ಲಿ ಮುಕ್ತಾಯ ಆಗಲಿದೆ. ವಿಡಿಯೋವನ್ನು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿಕೊಂಡವರು ಒಂದು ಮಾತು ನನ್ನ ಬಳಿ ಕೇಳಿದ್ದರೆ ಸಾಕಿತ್ತು, ನಾನೇ ಎಲ್ಲವನ್ನೂ ವಿವರಿಸುತ್ತಿದ್ದೆ. ಆದರೆ ಎಲ್ಲರಿಗೂ ಟಿಆರ್ಪಿ, ಜನಪ್ರಿಯತೆಯೇ ಬೇಕು. ವಿಮಾನದಲ್ಲಿ ಲೈಟರ್ ಹಚ್ಚಲು ಸಾಧ್ಯವೇ ಎಂದು ನಾನೇ ಕೇಳುತ್ತೇನೆ’ ಎಂದು ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ಸ್ಪೈಸ್ ಜೆಟ್ ವಿಮಾನಗಳಿಗೆ ಆಕಾಶ ದೋಷ!; ಮಾರ್ಗ ಮಧ್ಯೆ ಬಿರುಕುಬಿಟ್ಟ ವಿಂಡ್‌ ಶೀಲ್ಡ್‌