ಲಖನೌ: ಶಾರುಕ್ ಖಾನ್ ಮಗ(ಆರ್ಯನ್ ಖಾನ್) ಡ್ರಗ್ಸ್ ಪಾರ್ಟಿಯಲ್ಲಿ ಸಿಕ್ಕಿಬಿದ್ದು ಜೈಲಿಗೆ ಹೋಗಿ ಬಂದಿದ್ದಾನೆ. ಸಲ್ಮಾನ್ ಖಾನ್ ಡ್ರಗ್ಸ್ ಸೇವಿಸುತ್ತಾರೆ, ಮಾದಕ ವ್ಯಸನಿ. ಆಮೀರ್ ಖಾನ್ ಬಗ್ಗೆ ನನಗೆ ಗೊತ್ತಿಲ್ಲ. ಈ ನಟರ ಬಗ್ಗೆ ದೇವರಿಗೆ ಗೊತ್ತು ಎಂದು ಬಾಬಾ ರಾಮ್ದೇವ್ (Baba Ramdev) ವಿವಾದಾತ್ಮಕ ಹೇಳಿಕೆಯನ್ನು ನೀಡಿದ್ದಾರೆ. ಉತ್ತರ ಪ್ರದೇಶದಲ್ಲಿ ಆಯೋಜಿಸಲಾಗಿದ್ದ ಮಾದಕ ವಸ್ತು ವಿರೋಧಿ ಜಾಗೃತಿ ಅಭಿಯಾನವನ್ನು ಉದ್ಘಾಟಿಸಿ ಮಾತನಾಡಿ, ಬಾಲಿವುಡ್‌ನಲ್ಲಿ ನಟರು ಡ್ರಗ್ಸ್ ತೆಗೆದುಕೊಳ್ಳುತ್ತಾರೆಂದು ಗಂಭೀರ ಆರೋಪ ಮಾಡಿದರು. ಅಷ್ಟೇ ಅಲ್ಲದೇ, ಜನರ ಮಧ್ಯೆ ಮಾದಕ ವಸ್ತುಗಳ ಹಂಚಿಕೆಗೆ ಬಾಲಿವುಡ್ ಪ್ರಭಾವವೇ ಕಾರಣ ಎಂದು ಹೇಳುವ ಮೂಲಕ ವಿವಾದಕ್ಕೆ ನಾಂದಿ ಹಾಡಿದ್ದಾರೆ.
ಉತ್ತರ ಪ್ರದೇಶದ ಮೊರದಾಬಾದ್‌ನಲ್ಲಿ ಈ ಮಾದಕ ವಸ್ತು ವಿರೋಧಿ ಜಾಗೃತಿ ಅಭಿಯಾನವನ್ನು ಆಯೋಜಿಸಲಾಗಿತ್ತು. ಈ ವೇಳೆ ಭಾರೀ ಸಂಖ್ಯೆಯಲ್ಲಿ ಸೇರಿದ್ದ ಜನರನ್ನು ಉದ್ದೇಶಿಸಿ ಯೋಗ ಗುರುವೂ ಆಗಿರುವ ಬಾಬಾ ರಾಮ್ ದೇವ್ ಅವರು ಬಾಲಿವುಡ್ ವಿರುದ್ಧ ಕಡು ಟೀಕೆ ಮಾಡಿದರು.
ಯಾವೆಲ್ಲ ನಟರು ಡ್ರಗ್ಸ್ ತೆಗೆದುಕೊಳ್ಳುತ್ತಾರೆಂದು ಯಾರಿಗೆ ಗೊತ್ತು. ನಟಿಯರ ಬಗ್ಗೆ ಹೇಳವುದೇ ಬೇಡ. ಫಿಲ್ಮ್ ಇಂಡಸ್ಟ್ರೀ ಪೂರ್ತಿ ಡ್ರಗ್ಸ್‌ಮಯವಾಗಿದೆ. ಬಾಲಿವುಡ್‌ನಲ್ಲಿ ಡ್ರಗ್ಸ್ ಇದೆ, ಪಾಲಿಟಿಕ್ಸ್‌ನಲ್ಲಿ ಡ್ರಗ್ಸ್ ಇದೇ ಎಂದು ಮೂರು ದಿನಗಳ ಕಾಲ ನಡೆಯುವ ಈ ಆರ್ಯವೀರ ಸಮ್ಮೇಳನದಲ್ಲಿ ತಿಳಿಸಿದರು.
ಚುನಾವಣೆ ವೇಳೆ ಸಾರಾಯಿಯನ್ನು ಹಂಚಲಾಗುತ್ತದೆ. ಭಾರತವು ಸಂಪೂರ್ಣವಾಗಿ ಡ್ರಗ್ಸ್ ಮುಕ್ತವಾಗಬೇಕೆಂದು ನಾವೆಲ್ಲ ಪ್ರತಿಜ್ಞೆ ಮಾಡೋಣ. ಇದಕ್ಕಾಗಿ ನಾವು ಚಳವಳಿ ರೂಪಿಸೋಣ ಎಂದು ಹೇಳಿದರು. ಯಾವುದೇ ಸಾಕ್ಷ್ಯಗಳಿಲ್ಲದೇ ಬಾಬಾ ರಾಮ್ ದೇವ್ ಆರೋಪ ಮಾಡಿದ್ದರೂ ಯಾವುದೇ ನಟರು ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ಹೋಗಿಲ್ಲ.
ಇದನ್ನೂ ಓದಿ | Patanjali | ಪತಂಜಲಿಯ 4 ಕಂಪನಿಗಳಿಂದ 5 ವರ್ಷಗಳಲ್ಲಿ ಷೇರುಪೇಟೆ ಪ್ರವೇಶ: ಬಾಬಾ ರಾಮ್ದೇವ್