ನವ ದೆಹಲಿ: ಮೂಗಿನ ಮೂಲಕ ತೆಗೆದುಕೊಳ್ಳುವ iNCOVACC ಇಂಟ್ರಾನೇಸಲ್ ಲಸಿಕೆಗೆ ಬೆಲೆ ನಿಗದಿ ಮಾಡಲಾಗಿದ್ದು, ಖಾಸಗಿ ಆಸ್ಪತ್ರೆಗಳಲ್ಲಿ ಇದರ ಬೆಲೆ ಒಂದು ಡೋಸ್ಗೆ 800 ರೂ. (ಜಿಎಸ್ಟಿ ಸೇರಿ 840 ರೂಪಾಯಿ). ಮತ್ತು ಸರ್ಕಾರಿ ಆಸ್ಪತ್ರೆಗಳಲ್ಲಿ ಒಂದು ಡೋಸ್ಗೆ 325 ರೂಪಾಯಿ. ಈ ಲಸಿಕೆಯನ್ನು ಈಗಾಗಲೇ ಖಾಸಗಿ ಆಸ್ಪತ್ರೆಗಳಿಗೆ ವಿತರಿಸಲಾಗಿದ್ದು, ಮುಂಬರುವ ದಿನಗಳಲ್ಲಿ ಸರ್ಕಾರಿ ಆಸ್ಪತ್ರೆಗಳಲ್ಲಿ ಸಿಗಲಿದೆ. ಈಗಾಗಲೇ ಕೊವ್ಯಾಕ್ಸಿನ್ ಅಥವಾ ಕೊವಿಶೀಲ್ಡ್ ಲಸಿಕೆಗಳ ಎರಡೂ ಡೋಸ್ ಪಡೆದ 18 ವರ್ಷ ಮೇಲ್ಪಟ್ಟವರು ಈ ಇಂಟ್ರಾನೇಸಲ್ ಲಸಿಕೆಯನ್ನು ಬೂಸ್ಟರ್ ಡೋಸ್ನಂತೆ ಪಡೆಯಬಹುದು ಎಂದು ಹೇಳಲಾಗಿದೆ.
ಆದರೂ ಈ ಇಂಟ್ರಾನೇಸಲ್ ಲಸಿಕೆ ಬಗ್ಗೆ ಕೆಲವು ಗೊಂದಲಗಳು ಹಾಗೇ ಉಳಿದಿವೆ. ಅದರಲ್ಲಿ ಮುಖ್ಯವಾಗಿ ಈಗಾಗಲೇ ಬೂಸ್ಟರ್ ಡೋಸ್ ತೆಗೆದುಕೊಂಡವರು ಮತ್ತೊಂದು ಬೂಸ್ಟರ್ ಡೋಸ್ ಆಗಿ ಈ iNCOVACC ಲಸಿಕೆಯನ್ನು ಪಡೆಯಬಹುದಾ ಎಂಬ ಪ್ರಶ್ನೆಯೂ ಉದ್ಭವ ಆಗಿದೆ. ಆದರೆ ಅದು ಸಾಧ್ಯವಿಲ್ಲ ಎನ್ನುತ್ತಾರೆ ಕೊವಿಡ್ 19 ರಾಷ್ಟ್ರೀಯ ತಾಂತ್ರಿಕ ಸಲಹಾ ಗುಂಪಿನ ಅಧ್ಯಕ್ಷ ಡಾ. ಎನ್.ಕೆ.ಅರೋರಾ.
ಇಂಟ್ರಾನೇಸಲ್ ಲಸಿಕೆಯ ಪ್ರಯೋಗ-ಫಲಿತಾಂಶಗಳನ್ನು ಹತ್ತಿರದಿಂದ ಬಲ್ಲ ಡಾ. ಎನ್.ಕೆ.ಅರೋರಾ ಅವರು ಎನ್ಡಿಟಿವಿ ನಡೆಸಿದ ಸಂದರ್ಶನದಲ್ಲಿ ಮಾತನಾಡಿ, ‘ಮೂಗಿನ ಮೂಲಕ ತೆಗದುಕೊಳ್ಳುವ iNCOVACC ಲಸಿಕೆಯನ್ನು ನಾವು ಮೊದಲ ಬೂಸ್ಟರ್ ಲಸಿಕೆ ಎಂದೇ ಪರಿಗಣಿಸುತ್ತೇವೆ. ಅಂದರೆ, ಈಗಾಗಲೇ ಕೊವಿಡ್ 19 ಬೂಸ್ಟರ್ ಡೋಸ್ (ಮುನ್ನೆಚ್ಚರಿಕಾ ಡೋಸ್) ಪಡೆದಿರುವವರು ಮತ್ತೊಂದು ಡೋಸ್ ಆಗಿ ನೇಸಲ್ ಲಸಿಕೆಯನ್ನು ಪಡೆಯಲು ನಾವು ಶಿಫಾರಸ್ಸು ಮಾಡುವುದಿಲ್ಲ’ ಎಂದು ಹೇಳಿದ್ದಾರೆ.
ಈಗ ಕೋವಿಡ್ 19 ಲಸಿಕೆ ನಾಲ್ಕನೇ ಡೋಸ್ ಪಡೆಯುವುದರಿಂದ ಅದರಿಂದ ಏನೂ ಪ್ರಯೋಜನ ಇಲ್ಲ. ಒಬ್ಬ ಮನುಷ್ಯ ತನ್ನ ದೇಹಕ್ಕೆ ನಿರ್ಧಿಷ್ಟ ಸ್ವರೂಪದ ಪ್ರತಿಜನಕವನ್ನು ಪದೇಪದೇ ತೆಗೆದುಕೊಂಡರೆ, ಆತನ ದೇಹ ಆ ಪ್ರತಿಜನಕಕ್ಕೆ ಪ್ರತಿಕ್ರಿಯಿಸುವುದನ್ನು ನಿಲ್ಲಿಸುತ್ತದೆ. ಹಾಗಾಗಬಾರದು ಎಂಬ ಕಾರಣಕ್ಕೇ ಮೊದಲ ಬಾರಿಗೆ mRNA ಲಸಿಕೆಗಳನ್ನು ಆರು ತಿಂಗಳ ಅಂತರದಲ್ಲಿ ಕೊಡಲಾಗಿದೆ. ಬಳಿಕ ಮೂರು ತಿಂಗಳ ಅಂತರದಲ್ಲಿ ಕೊಡಲಾಯಿತು. ಆ ಸಮಯದಲ್ಲಿ ಲಸಿಕೆ ಅಷ್ಟೇನೂ ಕೆಲಸ ಮಾಡಲಿಲ್ಲ. ಇದೀಗ ಬಹುತೇಕರು ಬೂಸ್ಟರ್ ಡೋಸ್ ತೆಗೆದುಕೊಂಡಿದ್ದಾರೆ. ಅವರಿಗೆ ಮತ್ತೆ ಈಗ ಕಡಿಮೆ ಅವಧಿಯಲ್ಲಿ ನಾಲ್ಕನೇ ಡೋಸ್ ಕೊಡುವುದರಿಂದ ಅಂಥ ಪ್ರಯೋಜನ ಏನೂ ಇಲ್ಲ’ ಎಂದು ಅರೋರಾ ಹೇಳಿದ್ದಾರೆ.
ಇದನ್ನೂ ಓದಿ: iNCOVACC | ಮೂಗಿನ ಮೂಲಕ ತೆಗೆದುಕೊಳ್ಳುವ ಕೋವಿಡ್ 19 ಲಸಿಕೆಗೆ ದರ ನಿಗದಿ; ಒಂದು ಡೋಸ್ಗೆ 800 ರೂಪಾಯಿ