ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಪ್ರಾಣಿಪ್ರಿಯರು. ಅವರು ಗೋವುಗಳನ್ನು ಸಲುಹುವುದನ್ನು ನೋಡಿದ್ದೇವೆ. ಇತ್ತೀಚೆಗಷ್ಟೇ ಅವರು ಗೋರಖ್ಪುರ ಪ್ರಾಣಿಸಂಗ್ರಾಹಲಯಕ್ಕೆ ಭೇಟಿ ಕೊಟ್ಟಿದ್ದಾಗ ಮುದ್ದಾದ ಎರಡು ಚಿರತೆ ಮರಿಗಳನ್ನು ತೋಳಲ್ಲಿ ಎತ್ತಿಕೊಂಡು, ಬಾಟಲಿ ಹಾಲು ಕುಡಿಸಿದ್ದರು. ಅವುಗಳಿಗೆ ನಾಮಕರಣವನ್ನೂ ಮಾಡಿದ್ದರು. ಇನ್ನು ಗೋರಖ್ಪುರ ಮಠದ ಪೀಠಾಧ್ಯಕ್ಷರಾಗಿರುವ ಅವರು ಅಲ್ಲಿಗೆ ಭೇಟಿಕೊಟ್ಟಾಗಲೆಲ್ಲ ಗೋಶಾಲೆಗೂ ಹೋಗಿ ಬರುತ್ತಾರೆ. ಅಲ್ಲಿರುವ ಗೋವುಗಳಿಗೆ ಮೇವು-ಬೆಲ್ಲ ತಿನ್ನಿಸಿ, ಮೈದವಡಿ ಮುದ್ದಾಡಿ ಬರುತ್ತಾರೆ.
ಇಂತಿಪ್ಪ ಯೋಗಿ ಆದಿತ್ಯನಾಥ್ ಈಗ ಬೆಕ್ಕಿನೊಂದಿಗೆ ಇರುವ ಫೋಟೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಗೋರಖ್ಪುರ ದೇವಸ್ಥಾನದಲ್ಲಿರುವ ತಮ್ಮ ಕಚೇರಿಯಲ್ಲಿ ಕುಳಿತ ಯೋಗಿ ಆದಿತ್ಯನಾಥ್ ಮಡಿಲಲ್ಲಿ ಬೆಕ್ಕೊಂದು ಬೆಚ್ಚಗೆ ಮಲಗಿರುವ ಫೋಟೋ ಇದು. ಇಲ್ಲಿ ಯೋಗಿ ಆದಿತ್ಯನಾಥ್ ಅವರು ಖಾವಿ ವಸ್ತ್ರಧಾರಿಯಾಗಿ, ಕೇಸರಿ ಬಣ್ಣದ ಹೊದಿಕೆ ಹೊದಿಸಲಾದ ಕುರ್ಚಿಯ ಮೇಲೆ ಕುಳಿತಿದ್ದಾರೆ. ಅವರ ಮಡಿಲೇ ತನ್ನ ಸುಪ್ಪತ್ತಿಗೆ ಎಂಬಂತೆ ಬೆಕ್ಕೊಂದು ಅಲ್ಲಿ ಮಲಗಿದೆ. ಬೆಕ್ಕನ್ನು ಅವರು ತಂದು ಮಲಗಿಸಿಕೊಂಡಿದ್ದಲ್ಲ, ಯೋಗಿ ಆದಿತ್ಯನಾಥ್ ಸೀಟ್ ಮೇಲೆ ಕುಳಿತುಕೊಳ್ಳುತ್ತಿದ್ದಂತೆ, ಅದಾಗೇ ಬಂದು ಮಲಗಿದೆ ಎನ್ನಲಾಗಿದೆ. ಫೋಟೋ ಮಾತ್ರ ಸಖತ್ ಕ್ಯೂಟ್ ಆಗಿದೆ.
ಫೋಟೋವನ್ನು ಯೋಗಿ ಆದಿತ್ಯನಾಥ್ ಅವರೂ ಶೇರ್ ಮಾಡಿಕೊಂಡು ‘ತಮ್ಮ ಮಿತ್ರರು ಯಾರು, ಶತ್ರುಗಳು ಯಾರು ಎಂಬುದನ್ನು ಪ್ರಾಣಿ-ಪಕ್ಷಿಗಳೂ ಗುರುತಿಸಿಕೊಳ್ಳುತ್ತವೆ’ ಎಂದು ಕ್ಯಾಪ್ಷನ್ ಬರೆದಿದ್ದಾರೆ.
ಇದನ್ನೂ ಓದಿ: OBC Reservation In UP | ಚುನಾವಣೆಯಲ್ಲಿ ಒಬಿಸಿ ಮೀಸಲಾತಿ ರದ್ದು, ಯೋಗಿ ಆದಿತ್ಯನಾಥ್ ಸರ್ಕಾರಕ್ಕೆ ಭಾರಿ ಹಿನ್ನಡೆ