ಹೈದರಾಬಾದ್: ಇಲ್ಲಿನ ಅಮೀರ್ಪೇಟ್ನಲ್ಲಿದ್ದ ರೆಸ್ಟೋರೆಂಟ್ನಲ್ಲಿ ಗ್ರಾಹಕರೊಬ್ಬರಿಗೆ ಬಿರ್ಯಾನಿಯಲ್ಲಿ ಜಿರಳೆ ಸಿಕ್ಕಿದೆ (Cockroach Found in Biryani). ತಿನ್ನುವ ಅನ್ನದಲ್ಲಿ ತೆವಳುತ್ತಿರುವ ಜಿರಳೆಯನ್ನು ಕಂಡ ಆತ ಕ್ರೋಧಗೊಂಡು ಹೋಗಿ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗಕ್ಕೆ ದೂರು ಕೊಟ್ಟಿದ್ದ. ದೂರು ದಾಖಲಿಸಿಕೊಂಡ ಆಯೋಗ, ಆ ಗ್ರಾಹಕನಿಗೆ 20 ಸಾವಿರ ರೂಪಾಯಿ ಪರಿಹಾರ ನೀಡುವಂತೆ ರೆಸ್ಟೋರೆಂಟ್ಗೆ ಆದೇಶ ನೀಡಿದೆ. ಈ ಘಟನೆ ನಡೆದಿದ್ದು 2021ರ ಸೆಪ್ಟೆಂಬರ್ನಲ್ಲಿ. ಎಂ.ಅರುಣ್ ಎಂಬುವರು ಅಮೀರ್ಪೇಟ್ನಲ್ಲಿರುವ ಕ್ಯಾಪ್ಟನ್ ಕುಕ್ ರೆಸ್ಟೋರೆಂಟ್ನಿಂದ ಬಿರ್ಯಾನಿ ಪಾರ್ಸೆಲ್ ತೆಗೆದುಕೊಂಡು, ತಾವು ಕೆಲಸ ಮಾಡುವ ಸ್ಥಳಕ್ಕೆ ಹೋಗಿದ್ದರು. ಅಲ್ಲಿ ಬಿರ್ಯಾನಿ ತಿನ್ನಲೆಂದು ಪಾರ್ಸೆಲ್ ತೆರೆಯುತ್ತಿದ್ದಂತೆ ಶಾಕ್ಗೆ ಒಳಗಾಗಿದ್ದಾರೆ. ಆ ಬಿರ್ಯಾನಿಯಲ್ಲಿ ದೊಡ್ಡದಾದ ಜಿರಳೆಯೊಂದು ತೆವಳುತ್ತಿತ್ತು.
ಅರುಣ್ ಕೂಡಲೇ ರೆಸ್ಟೋರೆಂಟ್ಗೆ ಕರೆ ಮಾಡಿ, ಜಿರಳೆ ಸಿಕ್ಕಿದ್ದನ್ನು ಹೇಳಿದ. ಅದಕ್ಕೆ ಪ್ರತಿಯಾಗಿ ಅಲ್ಲಿನ ಮ್ಯಾನೇಜರ್ ಒಂದು ಕ್ಷಮೆಯನ್ನಷ್ಟೇ ಕೇಳಿದ ಮತ್ತು ರೆಸ್ಟೋರೆಂಟ್ನಲ್ಲಿ ಜಿರಳೆ ಮತ್ತಿತರ ಕೀಟ ನಿಯಂತ್ರಣಕ್ಕಾಗಿ ಅಗತ್ಯ ಕ್ರಮಗಳನ್ನು ಕೈಗೊಂಡಿದ್ದಾಗಿ ಹೇಳಿದ. ಆದರೆ ಬರೀ ಒಂದು ಕ್ಷಮೆಗೆ ತೃಪ್ತಿಗೊಳ್ಳದ ಅರುಣ್, ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗಕ್ಕೆ ದೂರು ನೀಡಿದ್ದರು.
ಇದನ್ನೂ ಓದಿ: Viral news: ಹಳೆಪ್ರೇಮಿಯ ಮೇಲೆ ಸಿಟ್ಟಾ? ಹಾಗಿದ್ದರೆ ಕೆನಡಾದ ಜಿರಳೆಗೆ ಪ್ರೇಮಿಯ ಹೆಸರಿಡಿ!
ಈ ಕೇಸ್ನ ವಿಚಾರಣೆಯನ್ನು ಆಯೋಗ ನಡೆಸಿಕೊಂಡು ಬಂದಿತ್ತು. ತಮ್ಮದೇನೂ ತಪ್ಪಿಲ್ಲ ಎಂದು ರೆಸ್ಟೋರೆಂಟ್ ವಿಚಾರಣೆ ವೇಳೆ ಹೇಳಿದೆ. ನಮ್ಮಲ್ಲಿ ಆಹಾರಗಳು ಸದಾ ಬಿಸಿಯಾಗಿಯೂ, ತಾಜಾ ಆಗಿಯೂ ಇರುತ್ತವೆ ಎಂದೇ ಮ್ಯಾನೇಜರ್ ಹೇಳಿದ್ದರು. ಬಿರ್ಯಾನಿಯಲ್ಲಿ ಜಿರಳೆ ಬಿದ್ದಿದ್ದ ವಿಡಿಯೊವನ್ನು ಅರುಣ್ ಆಯೋಗಕ್ಕೆ ನೀಡಿದ್ದ. ಹೀಗಾಗಿ ರೆಸ್ಟೋರೆಂಟ್ನ ವಾದ ನಡೆಯಲಿಲ್ಲ. ಅಂತಿಮವಾಗಿ ಅರುಣ್ಗೆ 20 ಸಾವಿರ ರೂ.ಪರಿಹಾರ ನೀಡುವಂತೆ ಮತ್ತು ಅವರ ವೆಚ್ಚಭರಿಸಲು ಹೆಚ್ಚುವರಿಯಾಗಿ 10 ಸಾವಿರ ರೂ. ಕೊಡುವಂತೆ ಆಯೋಗ ಸೂಚನೆ ನೀಡಿದೆ.