ಕೇರಳದಲ್ಲಿ ಇತ್ತೀಚೆಗಷ್ಟೇ ಪ್ರಧಾನಿ ನರೇಂದ್ರ ಮೋದಿ (PM Modi)ಯವರಿಂದ ಲೋಕಾರ್ಪಣೆಗೊಂಡ ನೂತನ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲಿನ(Vande Bharat Express) ಮೇಲೆಲ್ಲ ಕಾಂಗ್ರೆಸ್ ಕಾರ್ಯಕರ್ತರು ಪಾಲಕ್ಕಾಡ್ ಸಂಸದ ವಿ.ಕೆ.ಶ್ರೀಕಂದನ್ ಅವರ ಫೋಟೋ ಇರುವ ಪೋಸ್ಟರ್ಗಳನ್ನು ಅಂಟಿಸಿದ್ದಾರೆ. ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲು ಪಾಲಕ್ಕಾಡ್ನ ಶೋರಾನುರ್ ಜಂಕ್ಷನ್ ತಲುಪಿ, ನಿಲ್ದಾಣದಲ್ಲಿ ನಿಂತಿದ್ದಾಗ ಕಾರ್ಯಕರ್ತರು ಈ ಪುಂಡಾಟ ಮೆರೆದಿದ್ದಾರೆ. ರೈಲಿನ ಕಿಟಕಿ-ಬಾಗಿಲಿನ ಗಾಜುಗಳ ಮೇಲೆಲ್ಲ, ವಿ.ಕೆ.ಶ್ರೀಕಂದನ್ ಫೋಟೋ ಮತ್ತು ಅವರನ್ನು ಹೊಗಳಿದ ಸಾಲುಗಳಿರುವ ಪೋಸ್ಟರ್ನ್ನು ಅಂಟಿಸಿದ್ದಾರೆ. ಆ ಸ್ಟೇಶನ್ ತುಂಬೆಲ್ಲ ಕಾರ್ಯಕರ್ತರು ಒಟ್ಟಾಗಿದ್ದರು. ಅನೇಕರು ಕೈಯಲ್ಲಿ ಸಂಸದನ ಫೋಟೋವನ್ನು ಹಿಡಿದುಕೊಂಡಿದ್ದರು.
ಕಾಂಗ್ರೆಸ್ ಕಾರ್ಯಕರ್ತರು ವಂದೇ ಭಾರತ್ ರೈಲಿನ ಮೇಲೆ ಸಂಸದನ ಚಿತ್ರ ಇರುವ ಪೋಸ್ಟರ್ ಅಂಟಿಸಿದ್ದರ ಫೋಟೋವನ್ನು ಕೇರಳ ಬಿಜೆಪಿ ನಾಯಕ ಕೆ.ಸುರೇಂದ್ರನ್ ಅವರು ಟ್ವಿಟರ್ನಲ್ಲಿ ಹಂಚಿಕೊಂಡಿದ್ದಾರೆ. ‘ಪಾಲಕ್ಕಾಡ್ನಲ್ಲಿ ಕಾಂಗ್ರೆಸ್ ಕಾರ್ಯಕರ್ತರು ವಂದೇ ಭಾರತ್ ರೈಲನ್ನು ವಿರೂಪಗೊಳಿಸಿದ್ದಾರೆ. ಕಾಂಗ್ರೆಸ್ ಕಾರ್ಯಕರ್ತರ ಕೆಟ್ಟ ನಡವಳಿಕೆ ಇದು. ಈ ಕ್ರಿಮಿನಲ್ಗಳೆಲ್ಲರೂ ಕಿರೀಟಧಾರಿ ರಾಜಕುಮಾರನ ಅನುಯಾಯಿಗಳು. ನಾಚಿಕೆಯಾಗಬೇಕು ಇವರಿಗೆಲ್ಲ’ ಎಂದು ಕ್ಯಾಪ್ಷನ್ ಬರೆದಿದ್ದಾರೆ. ಮತ್ತೊಂದೆಡೆ ಕಾಂಗ್ರೆಸ್ ನಾಯಕ ಶ್ರೀಕಂದನ್ ಅವರು ತಮಗೂ-ಈ ಘಟನೆಗೂ ಏನೂ ಸಂಬಂಧವಿಲ್ಲ ಎಂದಿದ್ದಾರೆ. ರೈಲಿನ ಮೇಲೆ ನನ್ನ ಫೋಟೋ ಅಂಟಿಸಲು ನಾನ್ಯಾರಿಗೂ ಹೇಳಿಲ್ಲ ಎಂದಿದ್ದಾರೆ. ಹಾಗೇ, ಈ ವಿಚಾರ ಇಟ್ಟುಕೊಂಡು ಬಿಜೆಪಿ ವಿವಾದ ಸೃಷ್ಟಿಸಲು ಪ್ರಯತ್ನ ಮಾಡುತ್ತಿದೆ ಎಂದೂ ಆರೋಪಿಸಿದ್ದಾರೆ. ಈ ಪ್ರಕರಣದ ಸಂಬಂಧ ರೈಲ್ವೆ ಪೊಲೀಸರು ಸುಮೊಟೊ ಕೇಸ್ ದಾಖಲಿಸಿಕೊಂಡಿದ್ದಾರೆ. ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.
ಕೇರಳದ ಮೊದಲ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲು ಸಂಚಾರಕ್ಕೆ ಪ್ರಧಾನಿ ನರೇಂದ್ರ ಮೋದಿಯವರು ಏಪ್ರಿಲ್ 25ರಂದು ಚಾಲನೆ ನೀಡಿದ್ದಾರೆ. ಈ ರೈಲು ತಿರುವನಂತಪುರಂನಿಂದ ಕಾಸರಗೋಡಿಗೆ 568 ಕಿಮೀ ದೂರ ಸಂಚಾರ ಮಾಡಲಿದೆ. ಈ ದೂರವನ್ನು ರೈಲು ಕೇವಲ 8 ತಾಸುಗಳಲ್ಲಿ ಕ್ರಮಿಸಲಿದೆ. ಮಾರ್ಗ ಮಧ್ಯೆ ಕೊಲ್ಲಂ, ಕೊಟ್ಟಾಯಂ, ಎರ್ನಾಕುಲಂ, ತ್ರಿಶೂರ್, ಪಾಲಕ್ಕಾಡ್, ಪತನಂತಿಟ್ಟ, ಮಲಪ್ಪುರಂ, ಕೊಯಿಕ್ಕೋಡ್ ಮತ್ತು ಕಣ್ಣೂರ್ ಸೇರಿ ಒಟ್ಟು 14 ಜಿಲ್ಲೆಗಳ ನಿಲ್ದಾಣಗಳಲ್ಲಿ ನಿಲುಗಡೆಯಾಗಲಿದೆ. ಅಲ್ಲಿನ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ.
ಇದನ್ನೂ ಓದಿ: Video: ಕೇರಳ ರೋಡ್ ಶೋ ವೇಳೆ ಪ್ರಧಾನಿ ಮೋದಿಯತ್ತ ತೂರಿಬಂತು ಮೊಬೈಲ್; ಚುರುಕು ಕಣ್ಣಿನ ಎಸ್ಪಿಜಿ ಕಮಾಂಡೋ ಮಾಡಿದ್ದೇನು?