ಮುಂಬೈ: ಖ್ಯಾತ ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ (Jacqueline Fernandez) ವಾಸಿಸುವ ಮುಂಬೈಯ ಬಾಂದ್ರಾ ಪಶ್ಚಿಮದ ಪಾಲಿ ಹಿಲ್ ಪ್ರದೇಶದ ನವರೋಜ್ ಹಿಲ್ ಸೊಸೈಟಿಯಲ್ಲಿ ಬೆಂಕಿ ಅವಘಡ ಸಂಭವಿಸಿದೆ. 17 ಅಂತಸ್ತಿನ ಕಟ್ಟಡದ 13ನೇ ಮಹಡಿಯಲ್ಲಿರುವ ಅಡುಗೆಮನೆಯಲ್ಲಿ ಬೆಂಕಿ ಕಾಣಿಸಿಕೊಂಡಿದೆ ಎಂದು ವರದಿಯಾಗಿದ್ದು, ಘಟನೆಯಲ್ಲಿ ಯಾವುದೇ ಅಪಾಯ ಸಂಭವಿಸಿಲ್ಲ.
ಅಪಾಯದ ಕರೆ ಸ್ವೀಕರಿಸಿದ ತಕ್ಷಣ ನಾಲ್ಕು ಅಗ್ನಿಶಾಮಕ ವಾಹನ, ಮೂರು ಜಂಬೋ ಟ್ಯಾಂಕರ್‌ ಮತ್ತು ಒಂದು ಉಸಿರಾಟದ ಉಪಕರಣಗಳನ್ನು ಒಳಗೊಂಡ ವ್ಯಾನ್ ಘಟನಾ ಸ್ಥಳಕ್ಕೆ ಧಾವಿಸಿ, ಬೆಂಕಿ ನಂದಿಸಿತ್ತು. ಅಲ್ಲದೆ ಬೆಂಕಿ ಇತರೆಡೆಗೆ ಹರಡದ ಕಾರಣ ದೊಡ್ಡ ದುರಂತವೊಂದು ತಪ್ಪಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ. ಬುಧವಾರ (ಮಾರ್ಚ್ 6) ರಾತ್ರಿ ಈ ಘಟನೆ ಸಂಭವಿಸಿದ್ದು, ಬೆಂಕಿ ಹತ್ತಿಕೊಂಡ ಕಾರಣ ತಿಳಿದು ಬಂದಿಲ್ಲ. ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜಾಕ್ವೆಲಿನ್ ಫರ್ನಾಂಡಿಸ್ ಅವರ 5 ಬಿಎಚ್‌ಕೆ ಫ್ಲ್ಯಾಟ್‌ ಕೂಡ ಇದೇ ಕಟ್ಟಡದಲ್ಲಿದೆ. 2023ರಲ್ಲಿ ಜಾಕ್ವೆಲಿನ್ ಫರ್ನಾಂಡಿಸ್ ಈ ಐಷಾರಾಮಿ ನಿವಾಸವನ್ನು ಖರೀದಿಸಿದ್ದರು. ಕಳೆದ ಜುಲೈನಲ್ಲಿ ಅವರು ತಮ್ಮ ನಿವಾಸದ ಹೊರಭಾಗವನ್ನು ಪ್ರದರ್ಶಿಸುವ ವಿಡಿಯೊವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. ಇದು ಅಭಿಮಾನಿಗಳ ಗಮನ ಸೆಳೆದಿತ್ತು.
ಶ್ರೀಲಂಕಾ ಮೂಲದ ಮಾಡೆಲ್‌, ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಸದ್ಯ ಭಾರತದಲ್ಲಿ ನೆಲೆ ಕಂಡಿದ್ದಾರೆ. 2009 ತೆರೆಕಂಡ ʼಅಲಾದೀನ್‌ʼ ಹಿಂದಿ ಚಿತ್ರದ ಮೂಲಕ ಬಾಲಿವುಡ್‌ಗೆ ಕಾಲಿಟ್ಟ ಅವರು ಬಳಿಕ ಜನಪ್ರಿಯ ನಾಯಕಿಯಾಗಿ ಗುರುತಿಸಿಕೊಂಡಿದ್ದಾರೆ. ಸಲ್ಮಾನ್‌ ಖಾನ್‌, ಸೈಫ್‌ ಆಲಿ ಖಾನ್‌, ರಣಬೀರ್‌ ಕಪೂರ್, ಅಕ್ಷಯ್ ಕುಮಾರ್, ಇಮ್ರಾನ್‌ ಹಶ್ಮಿಯಂತಹ ಬಾಲಿವುಡ್‌ನ ಸ್ಟಾರ್‌ಗಳ ಜತೆ ಅವರು ನಟಿಸಿದ್ದಾರೆ.
ಕನ್ನಡ ಚಿತ್ರದಲ್ಲಿಯೂ ಕಾಣಿಸಿಕೊಂಡಿದ್ದ ಜಾಕ್ವೆಲಿನ್
ಹಿಂದಿಯ ಜತೆಗೆ ತೆಲುಗು, ಕನ್ನಡ ಚಿತ್ರಗಳಲ್ಲಿಯೂ ಜಾಕ್ವೆಲಿನ್ ನಟಿಸಿದ್ದಾರೆ. 2022ರಲ್ಲಿ ತೆರೆ ಕಂಡ ಕನ್ನಡದ ಪ್ಯಾನ್‌ ಇಂಡಿಯಾ ಚಿತ್ರ ʼವಿಕ್ರಾಂತ್‌ ರೋಣʼದಲ್ಲಿಯೂ ಜಾಕ್ವೆಲಿನ್ ಕಾಣಿಸಿಕೊಂಡಿದ್ದರು. ಕಿಚ್ಚ ಸುದೀಪ್‌ ಅಭಿನಯದ ಈ ಚಿತ್ರವನ್ನು ಅನೂಪ್‌ ಭಂಡಾರಿ ನಿರ್ದೇಶಿಸಿದ್ದಾರೆ. ಬಾಕ್ಸ್‌ ಆಫೀಸ್‌ನಲ್ಲಿ 100 ಕೋಟಿ ರೂ.ಗಿಂತ ಹೆಚ್ಚು ಗಳಿಸಿದ ಈ ಸಿನಿಮಾದ ʼರಾ ರಾ ರಕ್ಕಮ್ಮ…ʼ ಹಾಡಿಗೆ ಹೆಜ್ಜೆ ಹಾಕಿ ಜಾಕ್ವೆಲಿನ್ ಮೋಡಿ ಮಾಡಿದ್ದರು. ಅವರ ಈ ಸ್ಪೆಷಲ್‌ ಸಾಂಗ್‌ ಎಲ್ಲ ಭಾಷೆಗಳಲ್ಲಿಯೂ ಸೂಪರ್‌ ಹಿಟ್‌ ಆಗಿತ್ತು.
ಇದನ್ನೂ ಓದಿ: Jacqueline Fernandez | 200 ಕೋಟಿ ರೂ. ಹವಾಲ ಕೇಸ್‌ನಲ್ಲಿ ನಟಿ ಜಾಕ್ವೆಲಿನ್ ಫರ್ನಾಂಡಿಸ್‌ಗೆ ಬೇಲ್
ಸದ್ಯ ಜಾಕ್ವೆಲಿನ್ ಬಹು ತಾರಾಗಣದ ʼವೆಲ್‌ಕಮ್‌ ಟು ದ ಜಂಗಲ್ʼ ಹಿಂದಿ ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. ಅಕ್ಷಯ್ ಕುಮಾರ್, ಸಂಜಯ್ ದತ್, ಸುನೀಲ್ ಶೆಟ್ಟಿ, ಅರ್ಷದ್ ವಾರ್ಸಿ, ಪರೇಶ್ ರಾವಲ್, ಜಾನಿ ಲಿವರ್, ರಾಜ್‌ಪಾಲ್‌ ಯಾದವ್, ತುಷಾರ್ ಕಪೂರ್, ಶ್ರೇಯಸ್ ತಲ್ಪಾಡೆ, ಕೃಷ್ಣ ಅಭಿಷೇಕ್, ಕಿಕು ಶಾರದಾ, ದಲೇರ್ ಮೆಹಂದಿ, ಮಿಕಾ ಸಿಂಗ್, ಸಯಾಜಿ ಶಿಂಧೆ, ಮುಖೇಶ್ ತಿವಾರಿ, ಜಾಕಿರ್ ಹುಸೇನ್, ಯಶ್ಪಾಲ್ ಶರ್ಮಾ, ರವೀನಾ ಟಂಡನ್, ಲಾರಾ ದತ್ತಾ, ದಿಶಾ ಪಟಾನಿ ಮತ್ತು ವೃಹಿ ಕೊಡ್ವಾರ ಮತ್ತಿತರರು ಕೂಡ ಈ ಚಿತ್ರದಲ್ಲಿ ಅಭಿನಯಿಸುತ್ತಿದ್ದು ಈ ವರ್ಷಾಂತ್ಯಕ್ಕೆ ತೆರೆ ಕಾಣಲಿದೆ.
ವಂಚಕ ಸುಕೇಶ್‌ನಿಂದ ಕೋಟ್ಯಂತರ ರೂಪಾಯಿ ಗಿಪ್ಟ್ ಪಡೆದಿರುವ ಆರೋಪ ಜಾಕ್ವೆಲಿನ್ ಮೇಲಿದ್ದು, ಈ ವಿಚಾರ ಭಾರೀ ವಿವಾದ ಹುಟ್ಟು ಹಾಕಿತ್ತು.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ