ಮುಂಬೈ: ಖ್ಯಾತ ಹೂಡಿಕೆದಾರ ರಾಕೇಶ್ ಜುಂಜುನ್ವಾಲಾ ನಿಧನಕ್ಕೆ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ದುಃಖ ವ್ಯಕ್ತಪಡಿಸಿದ್ದಾರೆ. ‘ನಾನು ನನ್ನ ಸಹೋದರನನ್ನು ಕಳೆದುಕೊಂಡೆ. ರಾಕೇಶ್ ಜುಂಜುನ್ವಾಲಾ ಜೀವಂತವಾಗಿ ಇಲ್ಲದೆ ಇದ್ದರೂ. ಅವರು ಹಾಕಿಕೊಟ್ಟ ಪರಂಪರೆ ಸದಾ ಉಳಿಯುತ್ತದೆ’ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲ, ‘ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ನ ಬಾದ್ಶಾ ಆಗಿದ್ದರು’ ಎಂದು ಬಣ್ಣಿಸಿದ್ದಾರೆ. ಟ್ವೀಟ್ ಮಾಡಿರುವ ಅವರು ‘ನಮ್ಮಿಬ್ಬರ ಮಧ್ಯೆ ಇದ್ದ ಬಾಂಧವ್ಯ ಅನೇಕರಿಗೆ ಗೊತ್ತಿಲ್ಲ. ಅವರೊಬ್ಬ ನಿಜವಾದ ಕನಸುಗಾರ’ ಎಂದೂ ತಿಳಿಸಿದ್ದಾರೆ.
ರಾಕೇಶ್ ಜುಂಜುನ್ವಾಲಾ ಅವರು ದೃಢ ನಿಶ್ಚಯ ಹೊಂದಿದ್ದರು. ಅಷ್ಟೇ ಕೋಮಲಹೃದಯದವರು. ವಿನಯಶೀಲರು ಮತ್ತು ನನ್ನ ಪಾಲಿಗೆ ಅಸಾಮಾನ್ಯ ಸಾಮರ್ಥ್ಯ ಉಳ್ಳವರು. ಅವರಿಗೆ ಹೇಗೆ ಬೇಕೋ, ಹಾಗೆ ಬದುಕಿ ಹೋಗಿದ್ದಾರೆ ಎಂದು ಇನ್ನೊಂದು ಟ್ವೀಟ್ನಲ್ಲಿ ಸ್ಮೃತಿ ಇರಾನಿ ಬರೆದುಕೊಂಡಿದ್ದಾರೆ.
ತುಂಬ ದಿನಗಳಿಂದಲೂ ಡಯಾಬಿಟಿಸ್ನಿಂದ ಬಳಲುತ್ತಿದ್ದ ರಾಕೇಶ್ ಜುಂಜುನ್ವಾಲಾ ಇಂದು ಮುಂಜಾನೆ ಮೃತಪಟ್ಟಿದ್ದಾರೆ. ಷೇರು ಮಾರುಕಟ್ಟೆಯ ದಿಗ್ಗಜರಾದ ಅವರು ಇತ್ತೀಚೆಗಷ್ಟೇ ಆಕಾಶೋದ್ಯಮಕ್ಕೂ ಕಾಲಿಟ್ಟಿದ್ದರು. ಆಕಾಸ ಏರ್ ಎಂಬ ಹೊಸ ವಾಯುಯಾನ ಸಂಸ್ಥೆಯನ್ನು ಹುಟ್ಟುಹಾಕಿದ್ದರು. ಆಕಾಸ ಏರ್ನ ಮೊಟ್ಟಮೊದಲ ವಿಮಾನ ಆಗಸ್ಟ್ 7ರಂದು ಟೇಕ್ಆಫ್ ಕೂಡ ಆಗಿದೆ. ವಿಮಾನಯಾನವೆಂಬುದು ಎಲ್ಲರಿಗೂ ಕೈಗೆಟಕುವ ದರದಲ್ಲಿ ಸಿಗಬೇಕು ಎಂಬ ಮಹದುದ್ದೇಶದಿಂದ ಈ ಸಂಸ್ಥೆಯನ್ನು ಪ್ರಾರಂಭಿಸಿ, ಒಂದು ವಾರದಲ್ಲಿ ಅವರು ಇನ್ನಿಲ್ಲವಾಗಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಸೇರಿ ಹಲವು ಗಣ್ಯರು ಸಂತಾಪ ಸೂಚಿಸಿದ್ದಾರೆ.
ಇದನ್ನೂ ಓದಿ: Viral Video | ಅದೆಂಥ ಜೀವನೋತ್ಸಾಹಿಯಾಗಿದ್ದರು ರಾಕೇಶ್ ಜುಂಜುನ್ವಾಲಾ; ಅದ್ಭುತ ಡ್ಯಾನ್ಸ್ ಇಲ್ಲಿದೆ