ಮುಂಬೈ: ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಮುಕೇಶ್ ಅಂಬಾನಿ (Mukesh Ambani) ಮತ್ತು ಅವರ ಪತ್ನಿ ನೀತಾ ಅಂಬಾನಿ ಇಂದು ವಿಶೇಷವಾಗಿ ಸ್ವಾತಂತ್ರ್ಯೋತ್ಸವ ಆಚರಿಸಿದರು. ತಮ್ಮ ಮೊಮ್ಮಗ ಪ್ರಥ್ವಿ ಅಂಬಾನಿ ಜತೆ ಸೇರಿ ರಾಷ್ಟ್ರಧ್ವಜವನ್ನು ಹಿಡಿದು ಹಾರಾಡಿಸುತ್ತ ಫುಲ್ ಖುಷಿಯಾಗಿ ಸ್ವಾತಂತ್ರ್ಯ ದಿನವನ್ನು ಸಂಭ್ರಮಿಸಿದ್ದಾರೆ. ಈ ವಿಡಿಯೋ ಈಗ ಸಿಕ್ಕಾಪಟೆ ವೈರಲ್ ಆಗುತ್ತಿದೆ. ಮುಕೇಶ್ ಅಂಬಾನಿ ಪುತ್ರ ಆಕಾಶ್ ಅಂಬಾನಿ ಮತ್ತು ಶ್ಲೋಕಾ ಮೆಹ್ತಾ ಪುತ್ರ ಪ್ರಥ್ವಿ ಅಂಬಾನಿ ಹುಟ್ಟಿದ್ದು 2020ರ ಡಿಸೆಂಬರ್ 10ರಂದು.
ರಿಲಯನ್ಸ್ ಇಂಡಿಯಾ ಲಿಮಿಟೆಡ್ ಇಂದು ತನ್ನೆಲ್ಲ ಕಚೇರಿ, ಶಾಖೆ, ವಿಭಾಗಗಳಲ್ಲೂ ಸ್ವಾತಂತ್ರ್ಯೋತ್ಸವವನ್ನು ಸಂಭ್ರಮದಿಂದ ಆಚರಿಸುತ್ತಿದೆ. ಆರ್ಐಎಲ್ ಕಾರ್ಪೋರೇಟ್ ಆಫೀಸ್, ನವೀ ಮುಂಬೈನಲ್ಲಿರುವ ರಿಲಯನ್ಸ್ ಕಾರ್ಪೋರೇಟ್ ಪಾರ್ಕ್ (ಆರ್ಸಿಪಿ), 1072 ಜಿಯೋ ಸೆಂಟರ್ಗಳು, 6000 ಜಿಯೋ ಪಾಯಿಂಟ್ಗಳು, ರಿಲಯನ್ಸ್ ರಿಟೇಲ್ ಸ್ಟೋರ್ಸ್ಗಳಲ್ಲೆಲ್ಲ ಧ್ವಜಾರೋಹಣ ಮಾಡಿ, ಸ್ವಾತಂತ್ರ್ಯೋತ್ಸವ ಆಚರಿಸಲಾಗಿದೆ. ಅದರಲ್ಲೂ ರಿಲಯನ್ಸ್ ಕಾರ್ಪೋರೇಟ್ ಪಾರ್ಕ್ನಲ್ಲಿ ನಡೆದ ಇಂಡಿಪೆಂಡೆನ್ಸ್ ಡೇ ಸಂಭ್ರಮದಲ್ಲಿ ಉದ್ಯೋಗಿಗಳು ತಮ್ಮ ಕುಟುಂಬದವರೊಂದಿಗೆ ಪಾಲ್ಗೊಂಡು ಸಂಭ್ರಮಿಸಿದರು. ಆರ್ಐಎಲ್ ಇಂದು ಮಾಜಿ ಸೈನಿಕರನ್ನೂ ಗೌರವಿಸಿದೆ. ಆರ್ಐಎಲ್ನ ಎಲ್ಲ ಕಚೇರಿಗಳಲ್ಲೂ ಮಾರ್ಚ್ ಪಾಸ್ಟ್ ನಡೆಸಲಾಗಿದೆ. ವಿವಿಧೆಡೆ ಸಸಿಗಳನ್ನು ನೆಡುವ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಸಿಹಿ ಕೂಡ ವಿತರಿಸಲಾಗಿದೆ.
ಇದನ್ನೂ ಓದಿ: Mukesh Ambani | ಮುಕೇಶ್ ಅಂಬಾನಿ ಕುಟುಂಬಕ್ಕೆ ಬೆದರಿಕೆ ಕರೆ, ಒಬ್ಬನ ಸೆರೆ