ದೆಹಲಿ: ಭ್ರಷ್ಟಾಚಾರ ಆರೋಪದಡಿ ತಿಹಾರ್ ಜೈಲು ಸೇರಿರುವ ದೆಹಲಿ ಸಚಿವ ಸತ್ಯೇಂದ್ರ ಜೈನ್ರಿಗೆ ಜೈಲಿನಲ್ಲಿ ವಿಶೇ ಉಪಚಾರ ಸಿಗುತ್ತಿದೆ. ಅವರಲ್ಲಿ ಕೈದಿಯಾಗಿದ್ದರೂ ಎಲ್ಲ ರೀತಿಯ ಸೌಲಭ್ಯಗಳೂ ಸಿಗುತ್ತಿದ್ದು, ಅತ್ಯಂತ ಆರಾಮದಾಯಕವಾಗಿ ಇದ್ದಾರೆ ಎಂದು ಬಿಜೆಪಿ ಆರೋಪಿಸುತ್ತಿದೆ. ಇತ್ತೀಚೆಗೆ ಸತ್ಯೇಂದ್ರ ಜೈನ್ಗೆ ಜೈಲಿನಲ್ಲಿ ಕೈದಿಯೊಬ್ಬ ಮಸಾಜ್ ಮಾಡುತ್ತಿರುವ ವಿಡಿಯೊ, ಜೈನ್ ಅವರು ಜೈಲಲ್ಲಿ ಕುಳಿತು ವೈವಿಧ್ಯಮಯ ತಿನಿಸುಗಳನ್ನು ಸವಿಯುತ್ತಿರುವ ವಿಡಿಯೊಗಳು ವೈರಲ್ ಆಗಿ ಈ ಆರೋಪಕ್ಕೆ ಪುಷ್ಟಿ ನೀಡಿದ್ದವು. ಹೀಗೆ ಮಸಾಜ್ ಮಾಡಿಸಿಕೊಂಡ ವಿಡಿಯೊ ವೈರಲ್ ಆದ ಬೆನ್ನಲ್ಲೇ ಅಲ್ಲಿನ ಜೈಲು ಅಧೀಕ್ಷಕ ಅಮಾನತುಗೊಂಡಿದ್ದರು. ಈಗ ಸತ್ಯೇಂದ್ರ ಜೈನ್ ಅವರು ಅದೇ ಜೈಲು ಅಧೀಕ್ಷಕನೊಟ್ಟಿಗೆ, ತಮ್ಮ ಸೆಲ್ನಲ್ಲಿಯೇ ಕುಳಿತು ಮಾತನಾಡಿದ ದೃಶ್ಯ ವೈರಲ್ ಆಗಿದೆ.
‘ಸತ್ಯೇಂದ್ರ ಜೈನ್ ಅವರ ಸೆಲ್ನ್ನು ಇಬ್ಬರು ವ್ಯಕ್ತಿಗಳು ಮೊದಲು ಸ್ವಚ್ಛಗೊಳಿಸುತ್ತಾರೆ. ಅದರಲ್ಲಿ ಒಬ್ಬನ ಕುತ್ತಿಗೆಯಲ್ಲಿ ಅದೇನೋ ಐಡಿ ಕಾರ್ಡ್ ಇದೆ. ಇಡೀ ಕೋಣೆಯನ್ನು ನೀರಿನಿಂದ ಒರೆಸುತ್ತಾರೆ. ಬಳಿಕ ಎರಡು ಚಾಪೆ ಹಾಸಿ, ಅಲ್ಲಿಂದ ಹೋಗುತ್ತಾರೆ. ಅದಾದ ನಂತರ ಮತ್ತೆ ಮೂವರು ಆ ಕೋಣೆಗೆ ಬರುತ್ತಾರೆ. ಅವರೊಂದಿಗೆ ಸತ್ಯೇಂದ್ರ ಜೈನ್ ಮಾತುಕತೆ ನಡೆಸುತ್ತ ಕೂರುತ್ತಾರೆ. ಅಷ್ಟರಲ್ಲಿ ಈ ಅಮಾನತುಗೊಂಡ ಪೊಲೀಸ್ ಅಧಿಕಾರಿ ಅಜಿತ್ ಕುಮಾರ್ ಬರುತ್ತಾರೆ. ಆಗ ಇವರೆಲ್ಲ ಎದ್ದು ಹೋಗುತ್ತಾರೆ. ಸತ್ಯೇಂದ್ರ ಜೈನ್ ಮತ್ತು ಅಜಿತ್ ಕುಮಾರ್ ಮಾತುಕತೆ ಮುಂದುವರಿಯುತ್ತದೆ’ -ಇವಿಷ್ಟು ದೃಶ್ಯಗಳು ವಿಡಿಯೊದಲ್ಲಿ ನೋಡಲು ಸಿಗುತ್ತವೆ.
ಹೀಗೆ ಸತ್ಯೇಂದ್ರ ಜೈನ್ ಜೈಲಲ್ಲಿ ಇದ್ದರೂ ಯಾವುದೇ ಸೌಕರ್ಯಗಳಿಂದ ವಂಚಿತರಾಗಿಲ್ಲ ಎಂಬುದನ್ನು ಸಾಕ್ಷೀಕರಿಸುವ ವಿಡಿಯೊಗಳು ವೈರಲ್ ಆಗುತ್ತಿರುವ ಬೆನ್ನಲ್ಲೇ ಬಿಜೆಪಿಯ ವಾಗ್ದಾಳಿಯೂ ಹೆಚ್ಚುತ್ತಿದೆ. ಅದರಲ್ಲೂ ಈಗ ಅಜಿತ್ ಕುಮಾರ್ ಅಮಾನತುಗೊಂಡ ಬಳಿಕವೂ ಬಂದು ಜೈನ್ರನ್ನು ಭೇಟಿಯಾಗಿದ್ದು ಇನ್ನಷ್ಟು ಟೀಕೆಗೆ ಗುರಿಯಾಗಿದೆ. ಇನ್ನು ಒಂದೇ ಸಮನೆ ವ್ಯಂಗ್ಯ ಮಾಡುತ್ತಿರುವ ಬಿಜೆಪಿಗೆ ತಿರುಗೇಟು ನೀಡಿರುವ ಆಪ್ ಮುಖ್ಯಸ್ಥ ಅರವಿಂದ್ ಕೇಜ್ರಿವಾಲ್ ‘ಆಪ್ನ ಅಭಿವೃದ್ಧಿ ಕೆಲಸಗಳನ್ನು ನೋಡಿ ಹೆದರಿರುವ ಬಿಜೆಪಿ ಇಂಥ ವಿಡಿಯೊಗಳನ್ನು ಇಟ್ಟುಕೊಂಡು ಹುರುಳಿಲ್ಲದ ಆರೋಪ ಮಾಡುತ್ತಿದೆ. ನಾವು ಮಹಾನಗರ ಪಾಲಿಕೆ ಚುನಾವಣೆಯಲ್ಲಿ ಆ ಪಕ್ಷಕ್ಕೆ ತಕ್ಕ ಉತ್ತರ ಕೊಡುತ್ತೇವೆ’ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Satyendra Jain | ಜೈಲಲ್ಲಿ ಮಸಾಜ್ ಬೆನ್ನಲ್ಲೇ ವಜಾಗೊಂಡ ಜೈಲಧಿಕಾರಿ ಜತೆ ಸತ್ಯೇಂದ್ರ ಜೈನ್ ಮಾತು, ಹೊಸ ವಿಡಿಯೊ ವೈರಲ್