ನವ ದೆಹಲಿ: ಪಾಕಿಸ್ತಾನದ ಸೈನಿಕರು ಇಂದು ಜಮ್ಮು-ಕಾಶ್ಮೀರದ ಅಂತಾರಾಷ್ಟ್ರೀಯ ಗಡಿಯಲ್ಲಿ ಕದನ ವಿರಾಮ ಉಲ್ಲಂಘಿಸಿದ್ದಾರೆ. ಭಾರತದ ಗಡಿ ಭದ್ರತಾ ಪಡೆ ಸಿಬ್ಬಂದಿ (BSF) ಮೇಲೆ ಅಪ್ರೋಚದಿತ ಗುಂಡಿನ ದಾಳಿ ನಡೆಸಿದ್ದಾರೆ. ಗಡಿ ಭಾಗದಲ್ಲಿ ಒಂದೋ ಉಗ್ರರ ಕಾಟ ಇಲ್ಲವೇ, ಪಾಕಿಸ್ತಾನ ಸೈನಿಕರ ಪುಂಡಾಟ ಇದ್ದೇ ಇರುತ್ತದೆ. ಜಮ್ಮು-ಕಾಶ್ಮೀರದಲ್ಲಿ ವಿಶೇಷ ಸ್ಥಾನಮಾನ ತೆಗೆದ ನಂತರ ಸ್ವಲ್ಪ ದಿನಗಳವರೆಗೆ ಪಾಕ್ನಿಂದ ಒಂದೇ ಸಮನೆ ಕದನ ವಿರಾಮ ಉಲ್ಲಂಘನೆಯಾಗುತ್ತಿತ್ತು. 2021ರ ಫೆಬ್ರವರಿಯಿಂದ ಈಚೆಗೆ ಪಾಕಿಸ್ತಾನಿ ಸೈನಿಕರು ಯುದ್ಧ ವಿರಾಮ ಉಲ್ಲಂಘಿಸುವ ವರ್ತನೆ ತೋರಿಸಿರಲಿಲ್ಲ. ಆದರೆ ಈಗ ಮತ್ತೆ ಪಾಕ್ ತನ್ನ ಚಾಳಿ ಮುಂದುವರಿಸಿದೆ.
ಬಿಎಸ್ಎಫ್ನ ಸಾರ್ವಜನಿಕ ಸಂಪರ್ಕಾಧಿಕಾರಿ ಈ ಬಗ್ಗೆ ಮಾಹಿತಿ ನೀಡಿ, ‘ಇಂದು ಬೆಳಗ್ಗೆ ಪಾಕಿಸ್ತಾನದ ಸೈನಿಕರು ಅಂತಾರಾಷ್ಟ್ರೀಯ ಗಡಿಯಲ್ಲಿ ಅಪ್ರಚೋದಿತ ದಾಳಿ ನಡೆಸಿದ್ದಾರೆ. ಅಲ್ಲಿ ಬೆಳಗ್ಗೆ ಗಸ್ತಿನಲ್ಲಿದ್ದ ಬಿಎಸ್ಎಫ್ ಸಿಬ್ಬಂದಿ ಪ್ರತ್ಯುತ್ತರ ಕೊಟ್ಟಿದ್ದಾರೆ. ಭಾರತದ ಯಾವುದೇ ಯೋಧರಿಗೂ ಗಾಯವಾಗಿಲ್ಲ’ ಎಂದು ಸ್ಪಷ್ಟಪಡಿಸಿದ್ದಾರೆ.
ಭಾರತ-ಪಾಕ್ ನಡುವೆ 2003ರಲ್ಲಿ ಕದನ ವಿರಾಮಕ್ಕೆ ಸಂಬಂಧಪಟ್ಟಂತೆ ಒಪ್ಪಂದವಾಗಿದೆ. ಹಾಗಿದ್ದಾಗ್ಯೂ ಪಾಕಿಸ್ತಾನ ಆಗಾಗ ತನ್ನ ಬುದ್ಧಿ ತೋರಿಸುತ್ತಲೇ ಇತ್ತು. ಅದರಲ್ಲೂ 2019ರಲ್ಲಿ ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದಾದ ಬಳಿಕ ಆಗಾಗ ಪಾಕ್ ಕಡೆಯಿಂದ ಭಾರತದ ಕಡೆಗೆ ಗುಂಡು ಬರುತ್ತಿತ್ತು. ಅದನ್ನು ನಿಯಂತ್ರಿಸಲು 2021ರ ಫೆಬ್ರವರಿಯಲ್ಲಿ ಈ ಒಪ್ಪಂದವನ್ನು ಮತ್ತೆ ನವೀಕರಿಸಲಾಗಿದೆ. ಆಗಿನಿಂದಲೂ ಒಂದು ಬಾರಿಯೂ ಪಾಕ್ ಕದನ ವಿರಾಮ ಉಲ್ಲಂಘ ಮಾಡಿರಲಿಲ್ಲ. ಇದರಿಂದಾಗಿ ಅಂತಾರಾಷ್ಟ್ರೀಯ ಗಡಿ ಭಾಗದ ನಿವಾಸಿಗಳು, ಕೃಷಿಕರಿಗೆ ದೊಡ್ಡ ಮಟ್ಟದ ಸಮಾಧಾನ ಉಂಟಾಗಿತ್ತು.
ಇದನ್ನೂ ಓದಿ: Viral Video | ಪಾಕಿಸ್ತಾನದ ಉಗ್ರರು ಗಡಿಯಲ್ಲಿ ಹೇಗೆ ನುಸುಳುತ್ತಾರೆ? ಇಲ್ಲಿದೆ ವಿಡಿಯೊ!