ನವ ದೆಹಲಿ: ಬ್ರಹ್ಮಾಸ್ತ್ರ ಹಿಂದಿ ಸಿನಿಮಾದ ‘ಕೇಸರಿಯಾ ತೇರಾ’ (kesariya tera)ಹಾಡನ್ನು ಐದು ಭಾಷೆಗಳಲ್ಲಿ ಹಾಡಿದ ಗಾಯಕ ಸ್ನೇಹದೀಪ್ ಸಿಂಗ್ ಕಲ್ಸಿ (Snehdeep Singh Kalsi) ಅವರನ್ನು ಪ್ರಧಾನಿ ನರೇಂದ್ರ ಮೋದಿಯವರು ಶ್ಲಾಘಿಸಿದ್ದಾರೆ. ಕೇಸರಿಯಾ ಹಾಡನ್ನು ಸ್ನೇಹದೀಪ್ ಅವರು ಮಲೆಯಾಳಂ, ತೆಲುಗು, ಕನ್ನಡ, ತಮಿಳು ಮತ್ತು ಹಿಂದಿಯಲ್ಲಿ ಹಾಡಿದ್ದ ಚಿಕ್ಕದಾದ, ಒಂದೂವರೆ ನಿಮಿಷಗಳ ವಿಡಿಯೊವೊಂದು ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಆ ವಿಡಿಯೊವನ್ನು ಪ್ರಧಾನಿ ನರೇಂದ್ರ ಮೋದಿಯವರೂ ಶೇರ್ ಮಾಡಿಕೊಂಡು, ಗಾಯಕನನ್ನು ಮೆಚ್ಚಿ ಕ್ಯಾಪ್ಷನ್ ಬರೆದಿದ್ದಾರೆ.
ಸ್ನೇಹದೀಪ್ ಅವರು ಅದ್ಭುತವಾಗಿ ಈ ಹಾಡನ್ನು ನಿರೂಪಿಸಿದ್ದಾರೆ. ಇಂಪಾದ ಗಾಯನದೊಂದಿಗೆ, ‘ಏಕ್ ಭಾರತ್, ಶ್ರೇಷ್ಠ ಭಾರತ್’ ಎಂಬ ಅಭಿವ್ಯಕ್ತಿಯನ್ನು ಹೊರಹಾಕಿದ್ದಾರೆ. ಇದು ನಿಜಕ್ಕೂ ಸ್ಫೂರ್ತಿದಾಯಕ ಎಂದು ಪ್ರಧಾನಿ ನರೇಂದ್ರ ಮೋದಿ ಕ್ಯಾಪ್ಷನ್ ಬರೆದಿದ್ದಾರೆ. ಅಂದರೆ ಒಂದು ಹಾಡನ್ನು ಐದು ವಿವಿಧ ಭಾಷೆಯಲ್ಲಿ ಹಾಡುವ ಮೂಲಕ, ವಿವಿಧತೆಯಲ್ಲಿ ಏಕತೆಯನ್ನು ಪ್ರತಿಬಿಂಬಿಸಿದ್ದಾರೆ ಎಂದು ಮೋದಿ ಹೇಳಿದ್ದಾರೆ. ಕೇಸರಿಯಾ ಹಾಡನ್ನು ಸ್ನೇಹದೀಪ್ ಅವರು ಐದು ಭಾಷೆಗಳಲ್ಲಿ ಹಾಡುವಾಗ ಒಮ್ಮೆಯೂ ನಿಲ್ಲಿಸಲಿಲ್ಲ. ಅಡೆತಡೆಯಿಲ್ಲದೆ, ಸಾರಾಸಗಾಟವಾಗಿ ಹಾಡಿಕೊಂಡು ಹೋಗುವುದನ್ನು ನೀವು ನೋಡಬಹುದು.
ಸ್ನೇಹದೀಪ್ ಅವರು ಈ ಹಾಡನ್ನು ಮಲೆಯಾಳಂನಿಂದ ಶುರುಮಾಡುತ್ತರೆ, ಬಳಿಕ ಕ್ರಮವಾಗಿ ತೆಲುಗು, ಕನ್ನಡ, ತಮಿಳಿನಲ್ಲಿ ಹಾಡಿ, ಅಂತಿಮವಾಗಿ ಹಿಂದಿಯಲ್ಲಿ ಮುಕ್ತಾಯ ಮಾಡುತ್ತಾರೆ. ಸ್ನೇಹದೀಪ್ ಅವರು ಮುಂಬಯಿ ಮೂಲದ ಗಾಯಕ. 2022ರ ಜುಲೈನಲ್ಲಿ ಬಿಡುಗಡೆಯಾದ ಬ್ರಹ್ಮಾಸ್ತ್ರ ಸಿನಿಮಾದ ಹಾಡನ್ನು ಅತ್ಯಂತ ಸುಂದರವಾಗಿ ರೂಪಿಸಿ ಈಗ ನೆಟ್ಟಿಗರ ಮೆಚ್ಚುಗೆಗೂ ಪಾತ್ರರಾಗಿದ್ದಾರೆ. ಈ ಸಿನಿಮಾದಲ್ಲಿ ಅಲಿಯಾ ಭಟ್ ಮತ್ತು ರಣಬೀರ್ ಕಪೂರ್ ಅಭಿನಯಿಸಿದ್ದು, ಕನ್ನಡದಲ್ಲೂ ಈ ಹಾಡು ಇದೆ.
ಸ್ನೇಹದೀಪ್ ಅವರು ಪ್ರಧಾನಿ ನರೇಂದ್ರ ಮೋದಿಯವರ ಹೊಗಳಿಕೆಗೆ ಕೃತಜ್ಞತೆ ಸಲ್ಲಿಸಿದ್ದಾರೆ. ‘ನಿಮ್ಮ ಮೆಚ್ಚುಗೆಯ ಮಾತುಗಳು ನನ್ನ ಪಾಲಿಗೆ ಅತ್ಯಂತ ಅಮೂಲ್ಯ. ನನ್ನ ಹಾಡು ನಿಮ್ಮನ್ನು ತಲುಪಿ, ನೀವು ಅದನ್ನು ಖುಷಿಪಟ್ಟಿದ್ದು ನನಗೆ ಖುಷಿ’ ಎಂದು ಬರೆದುಕೊಂಡಿದ್ದಾರೆ. ಹಾಗೇ, ಈ ಟ್ವೀಟ್ನ್ನು ಅವರು ತಮ್ಮ ಟ್ವಿಟರ್ ಅಕೌಂಟ್ನಲ್ಲಿ ಪಿನ್ ಮಾಡಿಟ್ಟುಕೊಂಡಿದ್ದಾರೆ.