ನವ ದೆಹಲಿ: ಭಾರತೀಯ ತೈಲ ಮಾರುಕಟ್ಟೆ ಕಂಪನಿಗಳು ಹೊಸ ವರ್ಷದ ಮೊದಲನೇ ದಿನವೇ ಒಂದು ಬ್ಯಾಡ್ನ್ಯೂಸ್ ಕೊಟ್ಟಿವೆ. 19 ಕೆಜಿ, ವಾಣಿಜ್ಯ ಬಳಕೆ ಅಡುಗೆ ಅನಿಲದ ಸಿಲಿಂಡರ್ ಬೆಲೆಯನ್ನು 25 ರೂಪಾಯಿ ಏರಿಸಿವೆ. ಈ ಮಧ್ಯೆ ಸಮಾಧಾನಕರ ಸಂಗತಿಯೆಂದರೆ, 14 ಕೆಜಿಯ, ಗೃಹಬಳಕೆ ಅಡುಗೆ ಅನಿಲ ಸಿಲಿಂಡರ್ ದರದಲ್ಲಿ ಯಾವುದೇ ಏರಿಕೆ ಮಾಡದೆ ಇರುವುದು.
2022ರ ಜೂನ್ ತಿಂಗಳಿಂದ ನಿರಂತರವಾಗಿ 19 ಕೆಜಿ ಎಲ್ಪಿಜಿ ಸಿಲಿಂಡರ್ ಬೆಲೆ ಇಳಿಕೆಯಾಗುತ್ತಲೇ ಇತ್ತು. ಜೂನ್ನಲ್ಲಿ 135 ರೂಪಾಯಿ ಕಡಿಮೆಯಾಗಿತ್ತು. ಹಾಗೇ, ನವೆಂಬರ್ನಲ್ಲಿ 115.50 ರೂಪಾಯಿ ಕಡಿತಗೊಂಡಿತ್ತು. ಡಿಸೆಂಬರ್ ತಿಂಗಳಲ್ಲಿ ಯಾವುದೇ ಏರಿಳಿತ ಆಗಿರಲಿಲ್ಲ. ಈಗ 2023ರ ಮೊದಲ ದಿನವೇ ಗ್ಯಾಸ್ ಸಿಲಿಂಡರ್ ಬೆಲೆ ಏರಿಕೆ ಬಿಸಿ ತಾಗಿದೆ. ಹೀಗೆ 19 ಕೆಜಿ ಅಡುಗೆ ಅನಿಲ ಸಿಲಿಂಡರ್ ಬೆಲೆ ಹೆಚ್ಚಳವಾಗಿದ್ದು, ಹೋಟೆಲ್, ರೆಸ್ಟೊರೆಂಟ್ ಮಾಲೀಕರಿಗೆ ಹೊರೆಯಾಗಿ ಪರಿಣಮಿಸಲಿದೆ.
ಇದೀಗ 19 ಕೆಜಿ ಸಿಲಿಂಡರ್ ಬೆಲೆ ದೆಹಲಿಯಲ್ಲಿ 1768 ರೂಪಾಯಿ, ಮುಂಬಯಿಯಲ್ಲಿ 1721 ರೂ., ಕೋಲ್ಕತ್ತದಲ್ಲಿ 1870 ರೂ., ಚೆನ್ನೈನಲ್ಲಿ 1917 ರೂಪಾಯಿ ಮತ್ತು ಬೆಂಗಳೂರಿನಲ್ಲಿ 1700 ರೂಪಾಯಿ ಆಗಲಿದೆ. ಹಾಗೇ, ಗೃಹ ಬಳಕೆ ಸಿಲಿಂಡರ್ ಬೆಲೆ ದೆಹಲಿ 1053 ರೂ., ಮುಂಬಯಿಯಲ್ಲಿ 1052.5, ಕೋಲ್ಕತ್ತದಲ್ಲಿ 1079 ರೂ., ಚೆನ್ನೈನಲ್ಲಿ 1068 ರೂ. ಮತ್ತು ಬೆಂಗಳೂರಿನಲ್ಲಿ 1055.50 ರೂಪಾಯಿ ಇದೆ.
ಇದನ್ನೂ ಓದಿ: Gujarat Election | ಅಡುಗೆ ಅನಿಲ ಸಿಲಿಂಡರ್‌ನೊಂದಿಗೆ ಸೈಕಲ್ ಮೇಲೆ ಬಂದು ವೋಟ್ ಮಾಡಿದ ಕಾಂಗ್ರೆಸ್ ಶಾಸಕ