ಮುಂಬಯಿ: ‘ಮಹಾರಾಷ್ಟ್ರ ಮಾಜಿ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಬಗ್ಗೆ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್, ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಮತ್ತು ಇಂಗ್ಲೆಂಡ್ ರಾಜ ಕಿಂಗ್ ಚಾರ್ಲ್ಸ್ ಅವರೆಲ್ಲ ಚರ್ಚೆ ಮಾಡುತ್ತಿದ್ದಾರೆ’ ಎಂದು ಶಿವಸೇನೆ ನಾಯಕ ಸಂಜಯ್ ರಾವತ್ ಹೇಳಿರುವ ವಿಡಿಯೊವೊಂದು ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗುತ್ತಿದೆ.
ಇತ್ತೀಚೆಗೆ ನಾಗ್ಪುರದಲ್ಲಿ ಭಾಷಣ ಮಾಡಿದ ಮಾಡಿದ ಸಂಜಯ್ ರಾವತ್ ‘ಪುಟಿನ್, ಬೈಡೆನ್ ಮತ್ತು ಕಿಂಗ್ ಚಾರ್ಲ್ಸ್ ಅವರು ಇತ್ತೀಚೆಗೆ ವಿಡಿಯೊ ಕಾನ್ಫರೆನ್ಸ್ ನಡೆಸಿದ್ದರು. ಈ ವೇಳೆ ಉದ್ಧವ್ ಠಾಕ್ರೆ ಬಗ್ಗೆಯೂ ಚರ್ಚೆ ನಡೆದಿದೆ ಎಂಬ ಮಾಹಿತಿ ನಮಗೆ ಬಂತು. ಉದ್ಧವ್ ಠಾಕ್ರೆಯವರು ಏಕನಾಥ್ ಶಿಂಧೆ ಸರ್ಕಾರದ ವಿರುದ್ಧ ಹೇಗೆಲ್ಲ ಫೈಟ್ ಮಾಡುತ್ತಿದ್ದಾರೆ ಎಂಬ ಬಗ್ಗೆ ಅವರೆಲ್ಲ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಹಾಗೇ, ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಕೂಡ ಉದ್ಧವ್ ಠಾಕ್ರೆ ಬಗ್ಗೆ ವಿಚಾರಿಸಿದ್ದಾರಂತೆ. ಭಾರತದಲ್ಲಿರುವ ಉದ್ಧವ್ ಠಾಕ್ರೆಯಂಥ ನಾಯಕನನ್ನು ನಮಗ್ಯಾಕೆ ಮೋದಿ ಪರಿಚಯಿಸಲಿಲ್ಲ ಎಂದು ಈ ನಾಯಕರೆಲ್ಲ ಪ್ರಶ್ನಿಸಿದ್ದಾರೆ’ ಎಂದು ಸಂಜಯ್ ರಾವತ್ ಹೇಳಿದ್ದು ವಿಡಿಯೊದಲ್ಲಿ ಕೇಳುತ್ತದೆ.
ಇತ್ತೀಚೆಗೆ ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ನಾಗ್ಪುರದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿ ‘ನನ್ನ ಬಗ್ಗೆ ಅಮರಿಕ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಈ ಹಿಂದೆ ವಿಚಾರಿಸಿದ್ದರಂತೆ ಎಂದು ಹೇಳಿಕೊಂಡಿದ್ದರು. ಬಿಲ್ ಕ್ಲಿಂಟನ್ ಅವರೊಂದಿಗೆ ಒಡನಾಟದಲ್ಲಿದ್ದ ಭಾರತೀಯನೊಬ್ಬ ನನಗೆ ಆಪ್ತನಾಗಿದ್ದ. ಅವನು ಕೆಲವು ತಿಂಗಳುಗಳ ಹಿಂದೆ ನನ್ನನ್ನು ಭೇಟಿಯಾಗಿದ್ದಾಗ ಈ ವಿಷಯ ತಿಳಿಸಿದ್ದ. ಏಕನಾಥ ಶಿಂಧೆ ಯಾರು? ಶಿಂಧೆ ದಿನದಲ್ಲಿ ಎಷ್ಟು ತಾಸು ಕೆಲಸ ಮಾಡುತ್ತಾರೆ? ಎಷ್ಟೊತ್ತಿಗೆ ಊಟ ಮಾಡುತ್ತಾರೆ? ಯಾವಾಗ ನಿದ್ದೆ ಮಾಡುತ್ತಾರೆ? ಎಂದು ಅವರ ಬಳಿ ಬಿಲ್ ಕ್ಲಿಂಟನ್ ವಿಚಾರಿಸಿದ್ದರಂತೆ’ ಎಂದು ಹೇಳಿಕೊಂಡಿದ್ದರು. ಅದರ ಬೆನ್ನಲ್ಲೇ ಸಂಜಯ್ ರಾವತ್ ಈ ಮಾತುಗಳನ್ನಾಡಿದ್ದಾರೆ.
ಸಂಜಯ್ ರಾವತ್ರನ್ನು ವ್ಯಂಗ್ಯ ಮಾಡಿದ ಬಿಜೆಪಿ
ಸಂಜಯ್ ರಾವತ್ ಅವರ ಈ ಭಾಷಣದ ವಿಡಿಯೊ ಶೇರ್ ಮಾಡಿಕೊಂಡ ಬಿಜೆಪಿ ನಾಯಕಿ ಪ್ರೀತಿ ಗಾಂಧಿ ಇದೊಂದು ಕಪಿಲ್ ಶರ್ಮಾರ ಕಾಮಿಡಿ ಶೋಕ್ಕೇ ಸ್ಪರ್ಧೆಯೊಡ್ಡುವಂತಿದೆ ಎಂದು ವ್ಯಂಗ್ಯವಾಡಿದ್ದಾರೆ. ಹಾಗೇ, ಸಮೀತ್ ಠಕ್ಕರ್ ಎಂಬುವರು ಟ್ವೀಟ್ ಮಾಡಿ ‘ಮುಂದೊಮ್ಮೆ ಉದ್ಧವ್ ಠಾಕ್ರೆ ಮತ್ತೆ ಮಹಾರಾಷ್ಟ್ರದ ಮುಖ್ಯಮಂತ್ರಿಯಾದರೆ ಅವರ ಪ್ರಮಾಣವಚನ ಸ್ವೀಕಾರಕ್ಕೆ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಬರಬಹುದು ಎನ್ನುತ್ತಿದ್ದಾರೆ ಸಂಜಯ್ ರಾವತ್. ರಾಹುಲ್ ಗಾಂಧಿ ಕಾಮಿಡಿ ಶೋ ಚೆನ್ನಾಗಿದೆಯೋ, ಸಂಜಯ ರಾವತ್ ಹಾಸ್ಯ ಚೆನ್ನಾಗಿದೆಯೋ ಎಂದು ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: Veer Savarkar | ರಾಹುಲ್ ಗಾಂಧಿ ವಿರುದ್ಧ ವೀರ ಸಾವರ್ಕರ್‌ ಮೊಮ್ಮಗ ಕೇಸ್‌, ಉದ್ಧವ್ ಠಾಕ್ರೆ ಕೂಡ ಆಕ್ಷೇಪ