ನವ ದೆಹಲಿ: ರಾಹುಲ್ ಗಾಂಧಿ ನೇತೃತ್ವದ ಭಾರತ್ ಜೋಡೋ ಯಾತ್ರೆ ಮಂಗಳವಾರ ಮುಂಜಾನೆ ಉತ್ತರ ಪ್ರದೇಶವನ್ನು ಪ್ರವೇಶಿಸಿದೆ. ಘಾಜಿಯಾಬಾದ್ನ ಲೋನಿ ಮೂಲಕ ಉತ್ತರಪ್ರದೇಶಕ್ಕೆ ಕಾಲಿಟ್ಟ ಯಾತ್ರೆಯನ್ನು ರಾಹುಲ್ ಗಾಂಧಿ ಸೋದರಿ, ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ಸ್ವಾಗತಿಸಿದರು. ಇಲ್ಲೊಂದು ಸಣ್ಣ ಕಾರ್ಯಕ್ರಮವೂ ನಡೆಯಿತು.
ಈ ಕಾರ್ಯಕ್ರಮದ ವೇದಿಕೆ ಮೇಲೆ ರಾಹುಲ್ ಗಾಂಧಿ ತನ್ನ ತಂಗಿ ಪ್ರಿಯಾಂಕಾ ಗಾಂಧಿಯನ್ನು ಅಪ್ಪಿಕೊಂಡು ಮುದ್ದಾಡಿಬಿಟ್ಟಿದ್ದಾರೆ. ಆ ವಿಡಿಯೊ ವೈರಲ್ ಆಗಿದೆ. ರಾಹುಲ್ ಗಾಂಧಿಗಿಂತ ಪ್ರಿಯಾಂಕಾ ಗಾಂಧಿ 2 ವರ್ಷಕ್ಕೆ ಚಿಕ್ಕವರು. ಈ ಅಣ್ಣ-ತಂಗಿ ಮಧ್ಯೆ ಚೆಂದನೆಯ ಬಾಂಧವ್ಯ ಇದೆ. ಅದನ್ನು ನಾವು ಹಲವು ಬಾರಿ ನೋಡಿದ್ದೇವೆ. ಅದು ಈಗ ಭಾರತ್ ಜೋಡೋ ಯಾತ್ರೆಯ ಸ್ಟೇಜ್ ಮೇಲೆ ಇನ್ನೊಮ್ಮೆ ಗೋಚರವಾಯಿತು.
ರಾಹುಲ್ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ವಾದ್ರಾ ವೇದಿಕೆ ಮೇಲೆ ಅಕ್ಕ-ಪಕ್ಕ ಕುಳಿತಿದ್ದರು. ರಾಹುಲ್ ಗಾಂಧಿ ತನ್ನ ತಂಗಿಯ ಹೆಗಲ ಸುತ್ತ ತೋಳು ಬಳಸಿಕೊಂಡು ಕುಳಿತಿದ್ದವರು, ಪ್ರಿಯಾಂಕಾರನ್ನು ತನ್ನೆಡೆಗೆ ಎಳೆದುಕೊಂಡು ಅವರ ಕೆನ್ನೆಗೆ, ತಲೆಗೆ ಮುತ್ತುಕೊಟ್ಟಿದ್ದಾರೆ. ಪ್ರಿಯಾಂಕಾ ತಲೆಯ ಮೇಲೆ ಕೈ ಸವರಿದ್ದಾರೆ. ಈ ವೇಳೆ ಅಣ್ಣ-ತಂಗಿ ಇಬ್ಬರೂ ಬಾಯ್ತುಂಬ ನಗುತ್ತಿರುವುದನ್ನು ವೈರಲ್ ಆದ ವಿಡಿಯೊದಲ್ಲಿ ನೋಡಬಹುದು.
ರಾಹುಲ್ ಗಾಂಧಿ ತನ್ನ ತಂಗಿಯನ್ನು ಮುದ್ದು ಮಾಡಿದ ವಿಡಿಯೊವನ್ನು ಕಾಂಗ್ರೆಸ್ ಶೇರ್ ಮಾಡಿಕೊಂಡಿದ್ದು, ಕ್ಯಾಪ್ಷನ್ನಲ್ಲಿ ಎರಡು ಹೃದಯದ ಇಮೋಜಿಯನ್ನು ಕೊಟ್ಟಿದೆ. ವಿಡಿಯೊಕ್ಕೆ ಮೈ ರಹೂನ್ ನಾ ತೇರೆ ಬಿನಾ (ನನಗೆ ನಿನ್ನನ್ನು ಬಿಟ್ಟು ಇರಲು ಇಷ್ಟವಿಲ್ಲ ಎಂಬ ಹಾಡನ್ನು ಹೊಂದಿಸಲಾಗಿದೆ. ಈ ಹಾಡು ಕೂಡ ಅಣ್ಣ-ತಂಗಿಯರ ಬಾಂಧವ್ಯ ಸಾರುವ ಹಾಡೇ ಆಗಿದೆ. ಇತ್ತೀಚೆಗಷ್ಟೇ ದೆಹಲಿಯಲ್ಲಿ ರಾಹುಲ್ ಗಾಂಧಿ ತನ್ನಮ್ಮ ಸೋನಿಯಾ ಗಾಂಧಿಯವರ ಕೆನ್ನೆ ಹಿಡಿದು ಕೀಟಲೆ ಮಾಡುತ್ತಿದ್ದ ವಿಡಿಯೊ-ಫೋಟೋಗಳು ವೈರಲ್ ಆಗಿದ್ದವು.
ಇದನ್ನೂ ಓದಿ: Viral Video | ತಾಯಿಯ ಕೆನ್ನೆ ಹಿಡಿದು ಕೀಟಲೆ ಮಾಡಿದ ರಾಹುಲ್ ಗಾಂಧಿ, ಮಗನ ಚೇಷ್ಟೆಗೆ ನಕ್ಕ ಸೋನಿಯಾ, ಕ್ಯೂಟ್ ವಿಡಿಯೊ ನೋಡಿ