ನವ ದೆಹಲಿ : ಶಾರುಖ್ ಖಾನ್ ಅಭಿಯನಯದ ಪಠಾಣ್ ಸಿನಿಮಾದ (Pathan Movie) ಬೇಷರಮ್ ರಂಗ್ ಹಾಡು ಉಂಟು ಮಾಡಿದ ವಿವಾದ ಅಂತ್ಯವಾಗುತ್ತಿಲ್ಲ. ಮಂಗಳವಾರ ಅಯೋಧ್ಯೆಯಲ್ಲಿ ವಿಶ್ವ ಹಿಂದೂ ಪರಿಷತ್ ನೇತೃತ್ವದಲ್ಲಿ ಪ್ರತಿಭಟನೆ ನಡೆದಿದ್ದು, ಈ ವೇಳೆ ಸಾಧುವೊಬ್ಬರು, ಶಾರುಖ್ ಖಾನ್ ಎದುರು ಸಿಕ್ಕರೆ ಜೀವಂತ ಸುಟ್ಟುಬಿಡುವೆ ಎಂಬುದಾಗಿ ಆಘಾತಕಾರಿ ಹೇಳಿಕೆ ಕೊಟ್ಟಿದ್ದಾರೆ.
ಅಯೋಧ್ಯೆಯ ತಪಸ್ವಿ ಚಾವ್ನಿ ಮಠದ ಪರಮಹಂಸ ಆಚಾರ್ಯ ಅವರು ಈ ರೀತಿ ಹೇಳಿಕೆ ಕೊಟ್ಟವರು. ಅವರು ವಿಶ್ವ ಹಿಂದೂ ಪರಿಷತ್ ಆಯೋಜಿಸಿದ್ದ ಪ್ರತಿಭಟನೆಯಲ್ಲಿ ಪಾಲ್ಗೊಂಡ ಬಳಿಕ ಮಾಧ್ಯಮದ ಜತೆ ಮಾತನಾಡಿ ಈ ಹೇಳಿಕೆಯನ್ನು ಕೊಟ್ಟಿದ್ದಾರೆ.
“ಪಠಾಣ್ ಸಿನಿಮಾ ಸನಾತಮ ಧರ್ಮಕ್ಕೆ ಅವಮಾನ ಮಾಡಿದೆ. ಸಿನಿಮಾವನ್ನು ವಿರೋಧಿಸಿ ಹಿಂದೂಗಳು ಪ್ರತಿಭಟನೆ ನಡೆಸುತ್ತಿದ್ದಾರೆ. ಇದೀಗ ನಾವು ಶಾರುಖ್ ಖಾನ್ ಪೋಸ್ಟರ್ಗೆ ಬೆಂಕಿ ಹಚ್ಚಿದ್ದೇವೆ. ಒಂದು ವೇಳೆ ಅವರು ಎದುರಿಗೇ ಸಿಕ್ಕರೆ ಜೀವಂತ ಸುಡುವೆವು,” ಎಂಬುದಾಗಿ ಅವರು ಹೇಳಿದ್ದಾರೆ.
ಮುಂದುವರಿದ ಅವರು “ಪಠಾಣ್ ಚಲನಚಿತ್ರವನ್ನು ಬಿಡುಗಡೆಯಾಗಲು ಬಿಡಬಾರದು. ಒಂದು ವೇಳೆ ಚಲಚಿತ್ರ ಮಂದಿರಗಳಲ್ಲಿ ಪ್ರದರ್ಶಿಸಿದರೆ ಅಲ್ಲಿಗೂ ಬೆಂಕಿ ಹಚ್ಚಲಾಗುವುದು,” ಎಂದು ಅವರು ಹೇಳಿದರು.
ಬೇಷರಮ್ ರಂಗ್ ಹಾಡಿನಲ್ಲಿ ದೀಪಿಕಾ ಪಡುಕೋಣೆ ಕೇಸರಿ ಬಣ್ಣದ ಬಿಕಿನಿ ಧರಿಸಿದ್ದಾರೆ ಎಂದು ಆರೋಪಿಸಿ ವಿಶ್ವ ಹಿಂದೂ ಪರಿಷರ್ ದೇಶಾದ್ಯಂತ ಪ್ರತಿಭಟನೆ ನಡೆಸುತ್ತಿದೆ. ಮುಂಬಯಿಯಲ್ಲಿ ಶಾರುಖ್ ಖಾನ್ ವಿರುದ್ಧ ಪೊಲೀಸ್ ದೂರು ಕೂಡ ದಾಖಲಾಗಿದೆ.
ಇದನ್ನೂ ಓದಿ | Shahrukh Khan | ಬೇಷರಮ್ ಹಾಡು ಅಶ್ಲೀಲ ಅಷ್ಟೇ ಅಲ್ಲ, ಪ್ರಚೋದನಕಾರಿಯೂ ಆಗಿದೆ: ನಟ ಮುಕೇಶ್ ಖನ್ನಾ