ಐಎಎಸ್ ಅಧಿಕಾರಿಯಾಗಿದ್ದ ಜಿ.ಕೃಷ್ಣಯ್ಯ ಎಂಬುವರ ಹತ್ಯೆ ಕೇಸ್ನಲ್ಲಿ ಜೈಲು ಪಾಲಾಗಿದ್ದ ಮಾಜಿ ಸಂಸದ ಆನಂದ್ ಮೋಹನ್ (Anand Mohan)ನನ್ನು ಶಿಕ್ಷೆ ಅವಧಿ ಪೂರ್ಣಗೊಳ್ಳುವ ಮೊದಲೇ ಬಿಡುಗಡೆಗೊಳಿಸಿದ್ದನ್ನು ಪ್ರಶ್ನಿಸಿ ಬಿಹಾರ ಸರ್ಕಾರಕ್ಕೆ ಸುಪ್ರೀಂಕೋರ್ಟ್ (Supreme Court) ನೋಟಿಸ್ ನೀಡಿದ್ದು, ಪ್ರತಿಕ್ರಿಯೆಯನ್ನು ಕೇಳಿದೆ. ಆನಂದ್ ಮೋಹನ್ ಬಿಡುಗಡೆಯನ್ನು ಪ್ರಶ್ನಿಸಿ ಮೃತ ಐಎಎಸ್ ಅಧಿಕಾರಿ ಜಿ.ಕೃಷ್ಣಯ್ಯ ಪತ್ನಿ ಉಮಾ ಕೃಷ್ಣಯ್ಯ ಅವರು ಸುಪ್ರೀಂಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ಅರ್ಜಿ ಪರಿಶೀಲನೆ ಮಾಡಿದ ಸುಪ್ರೀಂಕೋರ್ಟ್ ಇದೀಗ ಆನಂದ್ ಮೋಹನ್ಗೆ ಕೂಡ ಅರ್ಜಿ ಸಲ್ಲಿಸಿದ್ದು, ಪೊಲೀಸ್ ಅಧೀಕ್ಷಕನ ಮೂಲಕ ಉತ್ತರ ನೀಡುವಂತೆ ಸೂಚಿಸಿದೆ.
1994ರಲ್ಲಿ ಗೋಪಾಲ್ಗಂಜ್ ಜಿಲ್ಲೆಯ ಮ್ಯಾಜಿಸ್ಟ್ರೇಟ್ ಆಗಿದ್ದ ಜಿ.ಕೃಷ್ಣಯ್ಯ ಅವರ ಹತ್ಯೆ ಪ್ರಕರಣದಲ್ಲಿ ಆನಂದ್ ಮೋಹನ್ ಅಪರಾಧ ದೃಢಪಟ್ಟ ಬಳಿಕ ವಿಚಾರಣಾ ನ್ಯಾಯಾಲಯ ಅವನಿಗೆ 2007ರಲ್ಲಿ ಮರಣದಂಡನೆ ವಿಧಿಸಿತ್ತು. ಕರ್ತವ್ಯದಲ್ಲಿದ್ದ ಸರ್ಕಾರಿ ಅಧಿಕಾರಿಯ ಹತ್ಯೆ ಮಾಡಿದ್ದ ಆರೋಪದಡಿ ಅವನಿಗೆ ಕಠಿಣ ಶಿಕ್ಷೆ ವಿಧಿಸಲಾಗಿತ್ತು. ಆದರೆ ಪಾಟ್ನಾ ಹೈಕೋರ್ಟ್ ಆ ಶಿಕ್ಷೆಯನ್ನು ಕಡಿಮೆ ಮಾಡಿ, ಜೀವಾವಧಿ ಶಿಕ್ಷೆಯನ್ನಾಗಿ ಬದಲಿಸಿತ್ತು. ಆನಂದ್ ಮೋಹನ್ ತನ್ನ ಬಿಡುಗಡೆಗಾಗಿ ಸುಪ್ರೀಂಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದ. ಆದರೆ ಆ ಅರ್ಜಿ ತಿರಸ್ಕೃತಗೊಂಡಿದ್ದರಿಂದ ಜೈಲಲ್ಲೇ ಉಳಿದಿದ್ದ.
2007ರಿಂದಲೂ ಸಹರ್ಸಾ ಜೈಲಿನಲ್ಲಿಯೇ ಇದ್ದ ಆನಂದ್ ಮೋಹನ್ನನ್ನು ಈ ವರ್ಷ ನಿತೀಶ್ ಕುಮಾರ್ ಸರ್ಕಾರ ಬಿಡುಗಡೆ ಮಾಡಿದೆ. ಬಿಹಾರ ಜೈಲು ಕೈಪಿಡಿ 2012ರ 481 (1-a) ನಿಯಮಕ್ಕೆ 2023ರ ಏಪ್ರಿಲ್ 10ರಂದು ತಿದ್ದುಪಡಿ ತಂದು 14-20ವರ್ಷ ಜೈಲಿನಲ್ಲಿ ಕಳೆದ ಕೈದಿಗಳ ಬಿಡುಗಡೆಗೆ ಸರ್ಕಾರ ಅಧಿಸೂಚನೆ ಹೊರಡಿಸಿದೆ. ಎಲ್ಲಕ್ಕಿಂತ ಮುಖ್ಯವಾಗಿ ಕೈಪಿಡಿ 2012ರಲ್ಲಿ ಇದ್ದ ‘ಕರ್ತವ್ಯದಲ್ಲಿದ್ದ ಸರ್ಕಾರಿ ಅಧಿಕಾರಿಯ ಹತ್ಯೆ’ ಎಂಬ ವಾಕ್ಯವನ್ನು ಅಳಿಸಿ ಹಾಕಿದೆ. ಈ ಮೂಲಕ ಆನಂದ್ ಮೋಹನ್ ಬಿಡುಗಡೆಗೊಳಿಸಿದೆ. ಆದರೆ ಆನಂದ್ ಮೋಹನ್ನನ್ನು ಜೈಲಿಂದ ಬಿಡುಗಡೆ ಮಾಡಿದ್ದನ್ನು ಮೃತ ಐಎಎಸ್ ಅಧಿಕಾರಿ ಜಿ. ಕೃಷ್ಣಯ್ಯನವರ ಪತ್ನಿ ತೀವ್ರವಾಗಿ ವಿರೋಧಿಸಿದ್ದಾರೆ.
ಇದನ್ನೂ ಓದಿ: ವಿಸ್ತಾರ Explainer: ಜೈಲಿನಿಂದ ಬಿಡುಗಡೆಯಾದ ಕೊಲೆ ಅಪರಾಧಿ, ಮಾಜಿ ಸಂಸದ, ʻಬಾಹುಬಲಿ’ ಯಾರಿವನು?
‘ಆನಂದ್ ಮೋಹನ್ರಿಗೆ ಮರಣದಂಡನೆ ಬದಲು ಜೀವಾವಧಿ ಶಿಕ್ಷೆ ನೀಡಲಾಗಿತ್ತು. ಆ ಶಿಕ್ಷೆಯನ್ನಾದರೂ ಸರಿಯಾಗಿ ನೀಡಬೇಕು. ಆದರೆ ರಾಜ್ಯ ಸರ್ಕಾರ ಆನಂದ್ ಮೋಹನ್ರಿಗೆ ಸಹಾಯವಾಗಲಿ, ಅವರು ಬಿಡುಗಡೆಯಾಗಲಿ ಎಂದೇ ಜೈಲು ಕೈಪಿಡಿಯಲ್ಲಿ ತಿದ್ದುಪಡಿ ಮಾಡಿದೆ. ಏಪ್ರಿಲ್ 10ರಂದು ಮಾಡಿರುವ ತಿದ್ದುಪಡಿ ಸಾರ್ವಜನಿಕ ನೀತಿಗೆ ವಿರುದ್ದವಾಗಿದೆ. ರಾಜ್ಯ ಸರ್ಕಾರದ ನಿರಂಕುಶ ಮನೋಭಾವನೆಯನ್ನು ತೋರಿಸುತ್ತದೆ ಮತ್ತು ಒಟ್ಟಾರೆ ಕಲ್ಯಾಣ ರಾಜ್ಯದ ಪರಿಕಲ್ಪನೆಗೆ ವಿರುದ್ಧವಾಗಿದೆ’ ಎಂದು ಹೇಳಿದ್ದರು. ಈ ಮೂಲಕ ಆನಂದ್ ಮೋಹನ್ ಬಿಡುಗಡೆಯನ್ನು ಮರುಪರಿಶೀಲನೆ ಮಾಡುವಂತೆ ಆಗ್ರಹಿಸಿದ್ದಾರೆ. ಹೀಗಾಗಿ ಸುಪ್ರೀಂಕೋರ್ಟ್ ರಾಜ್ಯ ಸರ್ಕಾರಕ್ಕೆ ನೋಟಿಸ್ ಕೊಟ್ಟಿದೆ.