‘ಬಿಹಾರದಲ್ಲಿ 2025ರ ವಿಧಾನಸಭೆ ಚುನಾವಣೆ ಆರ್ಜೆಡಿ ನಾಯಕ ತೇಜಸ್ವಿ ಪ್ರಸಾದ್ ಯಾದವ್ ನೇತೃತ್ವದಲ್ಲಿ ನಡೆಯಲಿದೆ’ ಎಂದು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಮಂಗಳವಾರ ಹೇಳಿದ್ದಾರೆ. ಬಿಜೆಪಿಯ ಒಡೆದು ಆಳುವ ನೀತಿ ವಿರುದ್ಧ ಸಮರ ಸಾರಿ, ಎನ್ಡಿಎ ಒಕ್ಕೂಟದಿಂದ ಹೊರಬಿದ್ದ ಜೆಡಿಯು ನಾಯಕ ನಿತೀಶ್ ಕುಮಾರ್ ಬಳಿಕ, ಆರ್ಜೆಡಿಯೊಂದಿಗೆ ಸೇರಿ ಬಿಹಾರದಲ್ಲಿ ಮಹಾ ಘಟ್ ಬಂಧನ್ ಸರ್ಕಾರ ರಚನೆ ಮಾಡಿ ಮೂರ್ನಾಲ್ಕು ತಿಂಗಳಾಗಿದೆ. ನಿತೀಶ್ ಕುಮಾರ್ ಅವರು 2024ರ ಲೋಕಸಭೆ ಚುನಾವಣೆಯಲ್ಲಿ ಪ್ರಧಾನಿ ಹುದ್ದೆ ಆಕಾಂಕ್ಷಿ ಎಂಬ ಮಾತೂ ಇದೆ.
ಇದೇ ಹೊತ್ತಲ್ಲಿ ನಿತೀಶ್ ಕುಮಾರ್ ಅವರು ಪದೇಪದೇ ತೇಜಸ್ವಿ ಯಾದವ್ ನಾಯಕತ್ವದ ಬಗ್ಗೆ ಮಾತನಾಡುತ್ತಿದ್ದಾರೆ. ತೇಜಸ್ವಿಯೇ ಬಿಹಾರದ ಭವಿಷ್ಯದ ನಾಯಕ ಎಂದು ಒತ್ತಿ ಹೇಳುತ್ತಿದ್ದಾರೆ. ಇತ್ತೀಚೆಗೆ ನಳಂದಾ ಜಿಲ್ಲೆಯ ರಾಹುಯಿ ಎಂಬಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ನಿತೀಶ್ ಕುಮಾರ್ ಆಗಲೂ ಇದೇ ಮಾತುಗಳನ್ನಾಡಿದ್ದರು. 2025ರ ವಿಧಾನಸಭಾ ಚುನಾವಣೆಯನ್ನು ಮಹಾಘಟ್ ಬಂಧನ್ ಮೈತ್ರಿ ತೇಜಸ್ವಿ ಯಾದವ್ ನೇತೃತ್ವದಲ್ಲೇ ಎದುರಿಸಲಿದೆ ಎಂದು ಹೇಳಿದ್ದರು.
ಬಿಹಾರ ವಿಧಾನಸಭೆ ಚಳಿಗಾಲದ ಅಧಿವೇಶನ ಮಂಗಳವಾರದಿಂದ ಪ್ರಾರಂಭವಾಗಿದ್ದು, ಈ ಅಧಿವೇಶನದ ಮೊದಲ ದಿನವೇ ನಿತೀಶ್ ಕುಮಾರ್ ಹೀಗೆ ಹೇಳಿದ್ದಾರೆ. ಅಷ್ಟೇ ಅಲ್ಲ, 2024ರ ಲೋಕಸಭೆ ಚುನಾವಣೆಯಲ್ಲಿ ತಾನು ಪ್ರಧಾನಿ ಅಭ್ಯರ್ಥಿಯೂ ಅಲ್ಲ ಎಂಬ ಮಾತನ್ನು ಪುನರುಚ್ಚರಿಸಿದ್ದಾರೆ. ಹಾಗೇ, ‘2024ರ ಚುನಾವಣೆಯಲ್ಲಿ ಬಿಜೆಪಿಯನ್ನು ಸೋಲಿಸಲು ಎಲ್ಲ ವಿರೋಧ ಪಕ್ಷಗಳೂ ಒಗ್ಗಟ್ಟಾಗಬೇಕು’ ಎಂದು ಕರೆಕೊಟ್ಟಿದ್ದಾರೆ.
ಅಧಿವೇಶನ ಮುಗಿದು ನಿತೀಶ್ ಕುಮಾರ್ ಹೊರಗೆ ಬರುತ್ತಿದ್ದಂತೆ ಅವರನ್ನು ಮಾಧ್ಯಮದವರು ತಡೆದು ಪ್ರಶ್ನೆ ಮಾಡಿದರು. ‘2025ರಲ್ಲಿ ತೇಜಸ್ವಿ ಯಾದವ್ ನೇತೃತ್ವದಲ್ಲಿ ಚುನಾವಣೆ ಎನ್ನುತ್ತೀರಿ, ಇದು ನಿಜಕ್ಕೂ ಸಾಧ್ಯವಾ?’ ಎಂದು ಮಾಧ್ಯಮದವರು ಕೇಳಿದ್ದಕ್ಕೆ ಉತ್ತರಿಸಿದ ನಿತೀಶ್ ಕುಮಾರ್ ‘ಖಂಡಿತ ಸಾಧ್ಯವಿದೆ. ನಿಶ್ಚಿತವಾಗಿಯೂ ತೇಜಸ್ವಿ ನಾಯಕತ್ವ ನಿಭಾಯಿಸುತ್ತಾರೆ’ ಎಂದು ಹೇಳಿದ್ದಾರೆ.
ಸಿಎಂ ನಿತೀಶ್ ನಿರ್ಧಾರದ ಬಗ್ಗೆ ಪ್ರತಿಕ್ರಿಯೆ ನೀಡಿದ ರಾಜ್ಯ ಹಣಕಾಸು ಸಚಿವ ವಿಜಯ್ ಕುಮಾರ್ ಚೌಧರಿ ‘ನಮಗೆ ಸಿಎಂ ನಿರ್ಧಾರದ ಬಗ್ಗೆ ಯಾವುದೇ ಅಚ್ಚರಿಯೂ ಇಲ್ಲ. ತೇಜಸ್ವಿಯೇ ಬಿಹಾರದ ಮುಂದಿನ ನಾಯಕ ಎಂದು ಅವರು ತೀರ್ಮಾನಿಸಿಬಿಟ್ಟಿದ್ದಾರೆ ಎಂದು ಹೇಳಿದ್ದಾರೆ. ಹಾಗೇ ನಿತೀಶ್ ಕುಮಾರ್ ಈ ನಿರ್ಧಾರವನ್ನು ಆರ್ಜೆಡಿ ಖುಷಿಯಿಂದ ಸ್ವಾಗತಿಸಿದೆ. ‘ಬಿಹಾರದಲ್ಲಿ ಮಹಾ ಘಟ್ ಬಂಧನ್ ಮೈತ್ರಿಯ ಮುಂದಿನ ಸಿಎಂ ಅಭ್ಯರ್ಥಿ ತೇಜಸ್ವಿ ಯಾದವ್ ಎಂದು ನಿತೀಶ್ ಕುಮಾರ್ ಹೇಳಿದ್ದಾರೆ. ಹೀಗಾಗಿ ನಮ್ಮ ಮುಂದಿನ ರಾಜಕೀಯ ಚಟುವಟಿಕೆಗಳಿಗೆ ಒಂದು ಸ್ಪಷ್ಟತೆ ಸಿಕ್ಕಿದೆ ಎಂದು ಆರ್ಜೆಡಿ ಹೇಳಿದೆ.
ಇದನ್ನೂ ಓದಿ: Nitish Kumar | ಲೋಕಸಭೆ ಚುನಾವಣೆಯಲ್ಲಿ ಉ.ಪ್ರದಿಂದ ಸ್ಪರ್ಧೆ? ನಿತೀಶ್ ಕುಮಾರ್ ಕೊಟ್ಟ ಸ್ಪಷ್ಟನೆ ಏನು?