ಹೈದರಾಬಾದ್: ಕ್ರಾಂತಿಕಾರಿ ಲಾವಣಿಗಾರ ಮತ್ತು ಜಾನಪದ ಹಾಗೂ ಕ್ರಾಂತಿಕಾರಿ ಗಾಯಕ ಗದ್ದರ್ (Singer Gaddar) ಅವರು ಆಗಸ್ಟ್ 6ರಂದ ನಿಧನ ಹೊಂದಿದ್ದಾರೆ. ಹೃದಯ ಸಂಬಂಧಿ ಕಾಯಿಲೆಗೆ ಚಿಕಿತ್ಸೆ ಪಡೆಯುತ್ತಿದ್ದ ಅವರು ಹೈದರಾಬಾದ್ನ ಖಾಸಗಿ ಆಸ್ಪತ್ರೆಯಲ್ಲಿ ನಿಧನಹೊಂದಿದ್ದಾರೆ..
1949ರಲ್ಲಿ ಮೇಡಕ್ ಜಿಲ್ಲೆಯ ತೂಪ್ರಾನ್ನಲ್ಲಿ ಗುಮ್ಮಡಿ ವಿಠ್ಠಲ್ ರಾವ್ ಆಗಿ ಜನಿಸಿದ ಗದ್ದರ್ ತಮ್ಮ ಕ್ರಾಂತಿಕಾರಿ ಹಾಡುಗಳಿಗೆ ಹೆಸರುವಾಸಿಯಾಗಿದ್ದಾರೆ. ನಕ್ಸಲ್ ಚಳುವಳಿಯ ಉತ್ತುಂಗದ ಸಮಯದಲ್ಲಿ ಅವಿಭಜಿತ ಆಂಧ್ರಪ್ರದೇಶದಲ್ಲಿ ಜನಾಂದೋಲನಗಳಿಗೆ ಅವರು ಹಾಡುಗಳ ಮೂಲಕವೇ ಪ್ರೇರಣೆಯಾಗಿದ್ದರು. ಅಲ್ಲದೆ ತೆಲುಗು ಮಾತನಾಡುವ ಜನರ ಪಾಲಿಗೆ ಆರಾಧನಾ ವ್ಯಕ್ತಿ ಎನಿಸಿಕೊಂಡಿದ್ದರು.
ತೆಲಂಗಾಣ ರಚನೆ ಚಳವಳಿಯಲ್ಲಿ ಅವರ ಪಾತ್ರ ಮಹತ್ವದ್ದು. ಅವರ ಅಪ್ರತಿಮ ಹಾಡು – ಪೊಡುಸ್ತುನ್ನ ಪೊಡ್ಡು ಮೀದಾ ನಾಡುಸ್ತುನ್ನ ಕಾಲಮಾ ಪೋರು ತೆಲಂಗಾಣಮಾ – ತೆಲಂಗಾಣ ಆಂದೋಲನದ ಪ್ರತಿ ಸಭೆಯಲ್ಲೂ ಅತ್ಯಗತ್ಯವಾಗಿತ್ತು. ಸೈದ್ಧಾಂತಿಕವಾಗಿಯೂ ಅವರು ತೆಲಂಗಾಣದ ಆಕಾಂಕ್ಷೆಗಳಿಗೆ ಹತ್ತಿರವಾಗಿದ್ದರು ಮತ್ತು ಜನಸಾಮಾನ್ಯರನ್ನು ತಲುಪಲು ಮತ್ತು ಈ ಪ್ರದೇಶಕ್ಕೆ ಮಾಡಿದ ಅನ್ಯಾಯವನ್ನು ಬಹಿರಂಗಪಡಿಸಲು ತಮ್ಮ ಸಂಗೀತವನ್ನು ಬಳಸಿಕೊಂಡಿದ್ದರು. ಅವರು ‘ಮಾ ಭೂಮಿ’ ಸೇರಿದಂತೆ ಕೆಲವು ಚಿತ್ರಗಳಲ್ಲಿ ನಟಿಸಿದ್ದಾರೆ. ಅಲ್ಲಿ ಅವರು ಜನಪ್ರಿಯ ಗೀತೆ ‘ಬಂದೇಂಕಾ ಬಂಡಿ ಕಟ್ಟಿ ಪದಹಾರು ಬಂಡ್ಲು ಕಟ್ಟಿ’ ಹಾಡಿದ್ದಾರೆ.
ಇದನ್ನೂ ಓದಿ : TTD Chairman: ಟಿಟಿಡಿಯ ನೂತನ ಚೇರ್ಮನ್‌ ಆಗಿ ಭೂಮನ ಕರುಣಾಕರ ರೆಡ್ಡಿ ನೇಮಕ; ಯಾರಿವರು?
ಗದ್ದರ್ ತಮ್ಮ ಯುವ ಜೀವನದ ಬಹುಭಾಗವನ್ನು 80ರ ದಶಕದಲ್ಲಿ ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾದ (ಮಾರ್ಕ್ಸ್ವಾದಿ- ಲೆನಿನಿಸ್ಟ್) ಪೀಪಲ್ಸ್ ವಾರ್ಗಾಗಿ ಕಳೆದಿದ್ದರು. ಈ ಅವಧಿಯಲ್ಲಿ ಅವರು ಭೂಗತವಾಗಿ ಕೆಲಸ ಮಾಡಿದ್ದರು. . ಆಗಿನ ಆಂಧ್ರಪ್ರದೇಶದ ಮುಖ್ಯಮಂತ್ರಿ ಮರಿ ಚೆನ್ನಾ ರೆಡ್ಡಿ ಅವರು ಪೀಪಲ್ಸ್ ವಾರ್ ಗುಂಪಿನ ಮೇಲಿನ ನಿಷೇಧ ತೆಗೆದುಹಾಕಿದಾಗ ಅವರು ಮುಖ್ಯವಾಹಿನಿಯಲ್ಲಿ ಕಾಣಿಸಿಕೊಂಡರು. ಅದೇ ರೀತಿ ಅವರು 1997ರಲ್ಲ ತಮ್ಮ ಮನೆಯಲ್ಲಿ ನಡೆದ ಕೊಲೆ ಪ್ರಯತ್ನದಿಂದ ಪಾರಾಗಿದ್ದರು.
ಗದ್ದರ್ ಅವರು ಇತ್ತೀಚೆಗೆ ಖಮ್ಮಂನಲ್ಲಿ ನಡೆದ ತೆಲಂಗಾಣ ಕಾಂಗ್ರೆಸ್ ಸಭೆಯಲ್ಲಿ ಕಾಣಿಸಿಕೊಂಡಿದ್ದರು. ಆ ಸಭೆಯಲ್ಲಿ ರಾಹುಲ್ ಗಾಂಧಿ ಭಾಗವಹಿಸಿದ್ದರು. ಅವರು ರಾಹುಲ್ ಗಾಂಧಿಯನ್ನು ತಬ್ಬಿಕೊಂಡು ಶುಭ ಹಾರೈಸಿದ್ದರು. ಕೆಲವು ತಿಂಗಳ ಹಿಂದೆ ಅವರು ಹೊಸ ಪಕ್ಷವನ್ನು ಪ್ರಾರಂಭಿಸುವುದಾಗಿ ಘೋಷಿಸಿದ್ದರು. ಆದರೆ ಅದು ಪ್ರಾರಂಭವಾಗುವ ಮೊದಲೇ ನಿಧನಹೊಂದಿದ್ದಾರೆ.
ಟಿಪಿಸಿಸಿ ಅಧ್ಯಕ್ಷ ಎ.ರೇವಂತ್ ರೆಡ್ಡಿ ಅವರು ಗದ್ದರ್ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ ಮತ್ತು ತೆಲಂಗಾಣದ ಸಾಮಾಜಿಕ ಚಳವಳಿಗಳ ಮೇಲೆ ಅವರ ಸಂಗೀತ ಮತ್ತು ಪ್ರಭಾವವನ್ನು ಯಾವಾಗಲೂ ಗೌರವಿಸಲಾಗುತ್ತದೆ ಮತ್ತು ನೆನಪಿಸಿಕೊಳ್ಳಲಾಗುತ್ತದೆ ಎಂದು ಹೇಳಿದ್ದಾರೆ.