ನವದೆಹಲಿ: ಹರ್ಯಾಣ ಗೃಹ ಸಚಿವ ಅನಿಲ್ ವಿಜ್ ಅವರು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಂದಾಗಿ ಮುಜುಗರಕ್ಕೀಡಾಗಬೇಕಾಯಿತು. ಹರ್ಯಾಣದ ಸೂರಜ್ಕುಂಡ್ನಲ್ಲಿ ನಡೆದ ಚಿಂತನ ಶಿಬಿರದಲ್ಲಿ ದೀರ್ಘ ಭಾಷಣ ಮಾಡುತ್ತಿದ್ದ ಅವರಿಗೆ ಅಮಿತ್ ಶಾ ನಾಲ್ಕು ಬಾರಿ ಅಡ್ಡಿಪಡಿಸಿ ‘ಭಾಷಣ ನಿಲ್ಲಿಸಿ’ ಎಂದು ಹೇಳಿದ್ದೇ ಈ ಮುಜುಗರಕ್ಕೆ ಕಾರಣ. ಎರಡು ದಿನಗಳ ಕಾಲ ನಡೆಯಲಿರುವ ಚಿಂತನ ಶಿಬಿರದಲ್ಲಿ ಎಂಟು ರಾಜ್ಯಗಳ ಮುಖ್ಯಮಂತ್ರಿಗಳು, ರಾಜ್ಯಪಾಲರು ಮತ್ತು ಉಪಮುಖ್ಯಮಂತ್ರಿಗಳೆಲ್ಲ ಪಾಲ್ಗೊಂಡಿದ್ದರು. ಗೃಹ ಸಚಿವ ಅಮಿತ್ ಶಾ ಅಧ್ಯಕ್ಷತೆ ಇತ್ತು. ಆಂತರಿಕ ಭದ್ರತಾ ವಿಷಯಗಳು, ಸೈಬರ್ ಕ್ರೈಂ, ಮಹಿಳೆಯರ ಸುರಕ್ಷತೆ, ಕರಾವಳಿ ಪ್ರದೇಶಗಳ ಭದ್ರತೆ ಮತ್ತಿತರ ವಿಷಯಗಳ ಮೇಲಿನ ಚರ್ಚೆ ಈ ಚಿಂತನಾ ಶಿಬಿರದ ಮೂಲ ಆಶಯ.
ಗುರುವಾರ ಪ್ರಾರಂಭಗೊಂಡ ಚಿಂತನಾ ಶಿಬಿರದಲ್ಲಿ ಹರ್ಯಾಣ ಗೃಹ ಸಚಿವ ಅನಿಲ್ ವಿಜ್ ಸ್ವಾಗತ ಭಾಷಣ ಪ್ರಾರಂಭಿಸಿದ್ದರು. ಶಿಬಿರದ ಅಧ್ಯಕ್ಷರು, ಆಗಮಿಸಿದ ಅತಿಥಿಗಳಿಗೆ ಅವರು ಸ್ವಾಗತ ಕೋರಬೇಕಿತ್ತು ಮತ್ತು ಅದಕ್ಕಾಗಿ ಅವರಿಗೆ ಐದು ನಿಮಿಷ ಮಾತ್ರ ಸಮಯಾವಕಾಶ ನೀಡಲಾಗಿತ್ತು. ಆದರೆ ಅನಿಲ್ ವಿಜ್ ಸ್ವಾಗತ ಭಾಷಣ ಮಾಡುವುದು ಬಿಟ್ಟು, ಹರ್ಯಾಣದ ಇತಿಹಾಸ, ಹಸಿರು ಕ್ರಾಂತಿಗೆ, ಒಲಿಂಪಿಕ್ಸ್ ಕ್ರೀಡಾಕೂಟಕ್ಕೆ ರಾಜ್ಯದ ಕೊಡುಗೆ, ಹರ್ಯಾಣದಲ್ಲಿ ಕ್ರೀಡಾಭಿವೃದ್ಧಿಗೆ ಕಲ್ಪಿಸಿಕೊಡಲಾದ ಮೂಲಸೌಕರ್ಯಗಳ ಬಗ್ಗೆಯೆಲ್ಲ ಮಾತನಾಡಲು ಶುರು ಮಾಡಿದರು. ಅಷ್ಟೇ ಅಲ್ಲ, ತಾವು ಪ್ರತಿವಾರ ನಡೆಸುವ ಕುಂದುಕೊರತೆ ಸಭೆಯ ಬಗ್ಗೆಯೂ ಉಲ್ಲೇಖಿಸಿ ನಾನ್ಸ್ಟಾಪ್ ಭಾಷಣ ಮಾಡುತ್ತಲೇ ಹೋದರು.
ಅನಿಲ್ ವಿಜ್ ಕುಳಿತ ಸೀಟ್ನಿಂದ ಏಳನೇ ಸೀಟ್ನಲ್ಲಿ ಕುಳಿತಿದ್ದ ಗೃಹ ಸಚಿವ ಅಮಿತ್ ಶಾ, ವಿಜ್ ಮಾತುಗಳನ್ನು ಆಲಿಸುತ್ತಿದ್ದವರು, ಕೆಲ ನಿಮಿಷಗಳ ಬಳಿಕ ಒಂದು ಚೀಟಿಯನ್ನು ಅನಿಲ್ ವಿಜ್ಗೆ ಕಳಿಸಿದರು. ಸಮಯ ಮುಗಿಯಿತು, ಹೀಗಾಗಿ ಭಾಷಣ ನಿಲ್ಲಿಸಿ ಎಂದು ಅದರಲ್ಲಿ ಅವರು ಬರೆದಿದ್ದರು. ಆದರೆ ಅನಿಲ್ ವಿಜ್ ಸುಮ್ಮನಾಗಲಿಲ್ಲ. ಭಾಷಣ ಮುಂದುವರಿಸಿದರು. ಆಗ ಅಮಿತ್ ಶಾ, ಅನಿಲ್ ವಿಜ್ರನ್ನು ಕರೆದು, ತಮ್ಮ ಮೈಕ್ ಮೇಲೆ ತಟ್ಟಿ ಮಾತು ನಿಲ್ಲಿಸುವಂತೆ ಸನ್ನೆ ಮಾಡಿದರು. ಆದರೆ ಅನಿಲ್ ವಿಜ್ಗೆ ಈ ಸೂಕ್ಷ್ಮ ಕೂಡ ಅರ್ಥವಾಗಲಿಲ್ಲ. ಕೊನೆಗೆ ಅಮಿತ್ ಶಾ ಅನಿವಾರ್ಯವಾಗಿ ಮಾತಿನ ಮೂಲಕವೇ ಹೇಳಿದರು. ‘ಅನಿಲ್ ಜಿ, ನಿಮಗೆ ಭಾಷಣ ಮಾಡಲು ಅವಕಾಶ ಕೊಟ್ಟಿದ್ದು ಐದು ನಿಮಿಷ ಮಾತ್ರ. ಆದರೆ ನೀವು ಎಂಟೂವರೆ ನಿಮಿಷ ಮಾತನಾಡಿದಿರಿ. ದಯವಿಟ್ಟು ಮಾತು ನಿಲ್ಲಿಸಿ. ಸುದೀರ್ಘ ಭಾಷಣಕ್ಕೆ ಇದು ಸ್ಥಳವಲ್ಲ. ಚಿಕ್ಕದಾಗಿ ಭಾಷಣ ಮಾಡಬೇಕು’ ಎಂದು ನೇರವಾಗಿಯೇ ಹೇಳಿದರು.
ಅಷ್ಟಾದರೂ ಅನಿಲ್ ವಿಜ್ ಇನ್ನು ಸ್ವಲ್ಪವೇ ಇದೆ ಎಂದು ಮಾತು ಮುಂದುವರಿಸಿದಾಗ ಅಮಿತ್ ಶಾ, ‘ಮುಗಿಸಿ ಮುಗಿಸಿ ಸಾಕು. ಇಂಥ ವಿಷಯವನ್ನೆಲ್ಲ ಇಲ್ಲಿ ಹೇಳುತ್ತ ಕುಳಿತರೆ ಅದು ಮುಗಿಯುವುದಲ್ಲ. ನೀವೀಗ ಭಾಷಣ ನಿಲ್ಲಿಸಲೇಬೇಕು’ ಎಂದು ಕಠೋರವಾಗಿಯೇ ಹೇಳಿದ್ದಾರೆ. ಬಳಿಕ ಅನಿಲ್ ವಿಜ್ ಮುಜುಗರಗೊಂಡು, ಮಾತು ನಿಲ್ಲಿಸಿದ್ದಾರೆ. ಅವರ ನಂತರ ಭಾಷಣ ಮಾಡಬೇಕಿದ್ದ ಹರ್ಯಾಣ ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ನಿಗದಿಯಾಗಿದ್ದ ಸಮಯಕ್ಕಿಂತಲೂ ಕಡಿಮೆ ಸಮಯದಲ್ಲಿ ಭಾಷಣ ಮಾಡಿದರು.
ಇದನ್ನೂ ಓದಿ: Amit Shah | ದೇಶದ ಪ್ರತಿ ರಾಜ್ಯದಲ್ಲೂ 2024ರ ವೇಳೆಗೆ ಎನ್‌ಐಎ ಕಚೇರಿ, ಅಮಿತ್ ಶಾ ಘೋಷಣೆ