ಉತ್ತರ ಪ್ರದೇಶ ಪೊಲೀಸ್ ಅಧಿಕಾರಿ (UP Police Officer)ಯೊಬ್ಬರಿಗೆ ಅವರ ಪತ್ನಿ-ಮಕ್ಕಳೇ ಸಂಕಷ್ಟ ತಂದಿಟ್ಟಿದ್ದಾರೆ. ಪತ್ನಿ ಮತ್ತು ಮಕ್ಕಳ ಸೆಲ್ಫಿ ಕ್ರೇಜ್ ಆ ಅಧಿಕಾರಿಯನ್ನು ಅನುಮಾನಿಸುವಂತೆ ಮಾಡಿದೆ. ಸದ್ಯ ಪೊಲೀಸ್ ಅಧಿಕಾರಿಯ ಮೇಲೆ ಪೊಲೀಸರೇ ಕಣ್ಗಾವಲು ಇಟ್ಟಿದ್ದಾರೆ. ಉನ್ನಾವೋದ ಬೆಹ್ತಾ ಮುಜಾವರ್ ಪೊಲೀಸ್ ಠಾಣೆಯ ಈ ಅಧಿಕಾರಿಯನ್ನು ವರ್ಗಾವಣೆ ಮಾಡಲಾಗಿದ್ದು, ತನಿಖೆ ಕೈಗೆತ್ತಿಕೊಳ್ಳಲಾಗಿದೆ.
ಪೊಲೀಸ್ ಅಧಿಕಾರಿ ರಮೇಶ್ ಚಂದ್ರ ಸಹಾನಿ ಅವರ ಪತ್ನಿ ಮತ್ತು ಇಬ್ಬರು ಮಕ್ಕಳು ಕಂತೆಕಂತೆ ಹಣದೊಂದಿಗೆ ಸೆಲ್ಫಿ ತೆಗೆದುಕೊಂಡಿದ್ದೇ ಇಷ್ಟೆಲ್ಲ ಸಮಸ್ಯೆಯಾಗಲು ಕಾರಣ. ರಮೇಶ್ ಚಂದ್ರ ಮನೆಯಲ್ಲೇ ಈ ಫೋಟೋ ತೆಗೆಯಲಾಗಿದೆ. 500 ರೂಪಾಯಿ ನೋಟುಗಳ ಸುಮಾರು 27 ಬಂಡಲ್ಗಳನ್ನು ಬೆಡ್ ಮೇಲೆ ಇಟ್ಟು, ಅದರೊಂದಿಗೆ ಅಧಿಕಾರಿಯ ಪತ್ನಿ-ಮಕ್ಕಳು ಪೋಸ್ ಕೊಟ್ಟಿದ್ದಾರೆ. ಸುಮಾರು 14 ಲಕ್ಷ ರೂಪಾಯಿ ನಗದು ಇಲ್ಲಿದ್ದು, ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ. ಇವರು ನೋಟಿನೊಂದಿಗೆ ತೆಗೆದುಕೊಂಡ ಸೆಲ್ಫಿ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿವೆ.
UP Police sub inspector Ramesh Sahni currently posted in Unnao district landed in soup after pictures of his children flaunting bundles of Rs 500 notes surface on social media. SI Sahni has been shunted to police lines. pic.twitter.com/qgX2Bw5U2d
— Piyush Rai (@Benarasiyaa) June 29, 2023
ಬೆಹ್ತಾ ಮುಜಾವರ್ ಪೊಲೀಸ್ ಠಾಣೆಯಲ್ಲಿ ಇನ್ಸ್ಪೆಕ್ಟರ್ ಆಗಿದ್ದ ರಮೇಶ್ ಚಂದ್ರ ಸಹಾನಿ ಅವರ ಪತ್ನಿ ಮತ್ತು ಮಕ್ಕಳ ಫೋಟೋ ವೈರಲ್ ಆಗುತ್ತಿದ್ದಂತೆ ಈ ಕೇಸ್ನ್ನು ಉನ್ನಾವೋ ಎಸ್ಪಿ ಸಿದ್ಧಾರ್ಥ್ ಶಂಕರ್ ಮೀನಾ ಅವರು ಸುಮೊಟೊ ದಾಖಲಿಸಿಕೊಂಡಿದ್ದಾರೆ. ಹಾಗೇ, ರಮೇಶ್ ಅವರನ್ನು ಈ ಠಾಣೆಯಿಂದ ವರ್ಗಾವಣೆ ಮಾಡಿ, ಸಾಮಾನ್ಯ ಕರ್ತವ್ಯಕ್ಕೆ ನಿಯೋಜಿಸಿದ್ದಾರೆ. ಇನ್ನು ಈ ಬಗ್ಗೆ ಸಮರ್ಥನೆ ಕೊಟ್ಟ ರಮೇಶ್ ಚಂದ್ರ ಸಹಾನಿ ಅವರು ‘ಈ ಹಣವಾಗಲಿ, ಫೋಟೋವಾಗಲಿ ಈಗಿನದಲ್ಲ. 2021ರಲ್ಲಿ ನಾನು ನನ್ನ ಕುಟುಂಬದ ಆಸ್ತಿಯನ್ನು ಮಾರಾಟ ಮಾಡಿದ್ದೆ. ಆಗ ಬಂದ ದುಡ್ಡು ಇದಾಗಿತ್ತು. 2021ರ ನವೆಂಬರ್ 14ರಂದು ಪತ್ನಿ-ಮಕ್ಕಳು ಸೇರಿ ತೆಗೆದುಕೊಂಡ ಫೋಟೋ ಇದು ಎಂದಿದ್ದಾರೆ. ಆದರೂ ತನಿಖೆ ಮುಗಿದು ವರದಿ ಬರದ ಹೊರತು, ಹಣದ ಮೂಲ ಯಾವುದೆಂದು ಗೊತ್ತಾಗದ ಹೊರತು ರಮೇಶ್ ಚಂದ್ರ ಸಹಾನಿ ವಾಪಸ್ ಠಾಣೆಗೆ ಬರುವಂತಿಲ್ಲ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ಹೇಳಿದ್ದಾರೆ.