ನಾವು ರಸ್ತೆಯಲ್ಲಿ ಹೋಗುತ್ತಿದ್ದಾಗ ಯಾವನೋ ಒಬ್ಬ ಕಳ್ಳ ನಮ್ಮ ಕೈಯಲ್ಲಿದ್ದ ಮೊಬೈಲ್ನ್ನೋ, ಪರ್ಸ್ನ್ನೋ ಕಿತ್ತುಕೊಂಡು ಓಡಿದರೆ, ತಕ್ಷಣಕ್ಕೆ ನಮಗೇನೂ ಮಾಡಲಾಗುವುದಿಲ್ಲ. ಕಳ್ಳ..ಕಳ್ಳ ಎಂದು ಅವನ ಹಿಂದೆ ಓಡಿದರೂ, ಅವನಷ್ಟು ಜೋರಾಗಿ ಓಡಲಾಗದೆ, ಮತ್ತೆ ಪೊಲೀಸ್ ಸ್ಟೇಶನ್ನತ್ತ ಮುಖ ಮಾಡುತ್ತೇವೆ. ಅವರ ಬಳಿ ಇನ್ನೇನಾದರೂ ಮಾರಕ ಆಯುಧ ಇರಬಹುದು ಎಂಬ ಹೆದರಿಕೆಯಿಂದ ಬೆನ್ನಟ್ಟುವ ಸಾಹಸ ಮಾಡುವುದೂ ಇಲ್ಲ. ಆದರೆ ಈ 27ವರ್ಷದ ಹುಡುಗಿ ಅಂಥ ಸಾಹಸ ಮಾಡಿದ್ದಾಳೆ. ತನ್ನ ಕೈಯಲ್ಲಿದ್ದ ಮೊಬೈಲ್ ಕದ್ದವನನ್ನು ಜುಹುವಿನಿಂದ, ಅಂಧೇರಿವರೆಗೆ ಬೆನ್ನಟ್ಟಿ ಹಿಡಿದಿದ್ದಾಳೆ. ಹಾಗೇ, ಆತನನ್ನು ಪೊಲೀಸರಿಗೆ ಹಿಡಿದುಕೊಟ್ಟಿದ್ದಾಳೆ.
ಆಕೆಯ ಹೆಸರು ನೇಜಾಲ್ ಶುಕ್ಲಾ. ಕಾಂದಿವಿಲಿ ಪೂರ್ವದ ನಿವಾಸಿ. ಕಳ್ಳನ ಹೆಸರು ಮೊಹ್ಸಿನ್ ಮೊಹಮ್ಮದ್ ರಫೀಕ್ ಖಾನ್ (25). ಜುಹುವಿನ ಕಾಪಸ್ವಾಡಿ ಬಸ್ಸ್ಟಾಪ್ ಹತ್ತಿರ ಬುಧವಾರ ಸಂಜೆ 8ಗಂಟೆ ಹೊತ್ತಿಗೆ ನೇಜಾಲ್ ಶುಕ್ಲಾ ನಿಂತಿದ್ದಳು. ಆಫೀಸ್ ಕೆಲಸ ಮುಗಿಸಿ ಆಕೆ ಮನೆಗೆ ಹೊರಟಿದ್ದಳು. ಸಾಂತಾಕ್ರೂಜ್ ರೈಲ್ವೆ ನಿಲ್ದಾಣದತ್ತ ಹೋಗಬೇಕಾಗಿದ್ದ ಬಸ್ಗಾಗಿ ಆಕೆ ಕಾಯುತ್ತಿದ್ದಳು. ಅಷ್ಟರಲ್ಲಿ ಅಲ್ಲಿಗೆ ಬೈಕ್ನಲ್ಲಿ ಬಂದ ಮೊಹ್ಸಿನ್ ಮೊಹಮ್ಮದ್ ರಫೀಕ್ ಖಾನ್, ನೇಜಾಲ್ ಶುಕ್ಲಾ ಕೈಯಲ್ಲಿದ್ದ ಮೊಬೈಲ್ನ್ನು ಕಿತ್ತುಕೊಂಡು ಪರಾರಿಯಾಗಿದ್ದಾನೆ. ಆದರೆ ನೇಜಾಲ್ ಶುಕ್ಲಾ ಅವನನ್ನು ಬಿಡಲಿಲ್ಲ.
ಈ ಬಗ್ಗೆ ಮಾಧ್ಯಮಗಳಿಗೆ ಹೇಳಿಕೆ ನೀಡಿದ ನೇಜಾಲ್ ‘ನಾನು ಬಸ್ಸ್ಟಾಪ್ನಲ್ಲಿ ಬಸ್ಗಾಗಿ ಕಾಯುತ್ತಿದ್ದೆ. ಟೈಮ್ ಪಾಸ್ಗಾಗಿ ಕೈಯಲ್ಲಿದ್ದ ಮೊಬೈಲ್ನಲ್ಲಿ ಯೂಟ್ಯೂಬ್ ವಿಡಿಯೊಗಳನ್ನು ನೋಡುತ್ತಿದ್ದೆ. ಅಷ್ಟರಲ್ಲಿ ಬೈಕ್ನಲ್ಲಿ ಬಂದ ವ್ಯಕ್ತಿಯೊಬ್ಬ ನನ್ನ ಕೈಯಲ್ಲಿದ್ದ ಮೊಬೈಲ್ ಕಿತ್ತುಕೊಂಡು ಹೋದ. ನಾನು ತಕ್ಷಣವೇ ಅಲ್ಲಿಯೇ ಇದ್ದ ಆಟೋ ಹತ್ತಿದೆ. ಆದರೆ ಆಟೋ ವೇಗ ಸಾಕಾಗುತ್ತಿರಲಿಲ್ಲ. ಮತ್ತೆ ಆಟೋವನ್ನು ನಿಲ್ಲಿಸುವಂತೆ ಹೇಳಿ, ಅಲ್ಲಿಯೇ ಹೋಗುತ್ತಿದ್ದ ಬೈಕ್ ಸವಾರನನ್ನು ನಿಲ್ಲಿಸಿ, ಆಗಿದ್ದನ್ನೆಲ್ಲ ಹೇಳಿದೆ. ಹಾಗೇ, ಕಳ್ಳನ ಬೈಕ್ ಬೆನ್ನಟ್ಟುವಂತೆ ಹೇಳಿದೆ. ಅವರೂ ಒಪ್ಪಿಕೊಂಡರು. ನಾನು ಹಿಂದೆ ಕುಳಿತುಕೊಂಡೆ.
ಇದನ್ನೂ ಓದಿ: Suicide case : ಮೊಬೈಲ್ನಲ್ಲಿ ಸ್ಟೇಟಸ್‌ ಹಾಕಿ ಆತ್ಮಹತ್ಯೆ ಮಾಡಿಕೊಂಡ ಯುವಕ, ಆ ಮನೆಯಲ್ಲಿ ಇದು ಮೂರನೇ ಸುಸೈಡ್‌!
ಜುಹುವಿನಿಂದ ಪಶ್ಚಿಮ ಅಂಧೇರಿಗೆ ಹೋಗಲು ಏಳು ನಿಮಿಷ ಬೇಕಾಯಿತು. ಕಳ್ಳ ತಪ್ಪಿಸಿಕೊಂಡಿದ್ದ. ಅದ್ಯಾವುದೋ ಸಣ್ಣ ಮಾರ್ಗದಲ್ಲಿ ಬೈಕ್ ಓಡಿಸಿ ಕಾಣೆಯಾದ. ನಾನು ಇನ್ನೇನು ಮಾಡಲು ತೋಚದೆ, ನಾನು ಕುಳಿತಿದ್ದ ಬೈಕ್ ಸವಾರನ ಬಳಿ, ನನ್ನನ್ನು ಪೊಲೀಸ್ ಠಾಣೆಗೆ ಕರೆದುಕೊಂಡು ಹೋಗುವಂತೆ ಹೇಳಿದೆ. ಆತ ಪೊಲೀಸ್ ಸ್ಟೇಶನ್ನತ್ತ ಬೈಕ್ ತಿರುಗಿಸಿ, ಸ್ವಲ್ಪ ದೂರ ಹೋಗುತ್ತಿದ್ದಂತೆ ಮತ್ತೆ ಕಳ್ಳ ಕಾಣಿಸಿಕೊಂಡಿದ್ದ. ಒಂದು ಕಿರಿದಾದ ರಸ್ತೆಯಲ್ಲಿ ಬೈಕ್ ನಿಲ್ಲಿಸಿಕೊಂಡು, ಆತನೂ ನಿಂತಿದ್ದ. ಅವನಿಗೆ ಗೊತ್ತಾಗದಂತೆ ಹಿಂದಿನಿಂದ ಹೋಗಿ ಅವನನ್ನು ಹಿಡಿದುಕೊಂಡೆ. ನನ್ನೊಂದಿಗೆ ಬಂದಿದ್ದ ಬೈಕ್ ಸವಾರ ಅವನ ಕಾಲರ್ ಹಿಡಿದಿದ್ದ. ನಾವು ಅವನ ಜೇಬನ್ನೆಲ್ಲೆ ಚೆಕ್ ಮಾಡಿದೆವು. ಆದರೆ ಅಷ್ಟರಲ್ಲಾಗಲೇ ಅವನು ಮೊಬೈಲ್ನ್ನು ತನ್ನ ಗ್ಯಾಂಗ್ನ ಬೇರೆಯವರಿಗೆ ಕೊಟ್ಟಿದ್ದ. ಹಾಗಂತ ನಾವು ಅವನನ್ನ ಬಿಡಲಿಲ್ಲ. ಡಿಎನ್ ನಗರ ಪೊಲೀಸ್ ಠಾಣೆಗೆ ಆತನನ್ನು ಎಳೆದೊಯ್ದು, ದೂರು ಕೊಟ್ಟೆವು ಎಂದು ನೇಜಾಲ್ ಶುಕ್ಲಾ ತಿಳಿಸಿದ್ದಾರೆ.
‘ನಾನು ನನ್ನ ಮೊಬೈಲ್ ಕಳೆದುಕೊಂಡೆ. ಆದರೆ ಆರೋಪಿ ಅರೆಸ್ಟ್ ಆಗಿದ್ದು ನನಗೆ ಖುಷಿಕೊಟ್ಟಿದೆ. ಪೊಲೀಸರು ಎಫ್ಐಆರ್ ದಾಖಲು ಮಾಡಿದ್ದಾರೆ. ನನಗೆ ನನ್ನ ಮೊಬೈಲ್ ವಾಪಸ್ ಕೊಡಿಸುತ್ತಾರೆ ಎಂಬ ಭರವಸೆ ಇದೆ. ಸದ್ಯ ಹೊಸ ಮೊಬೈಲ್ನ್ನು ಖರೀದಿ ಮಾಡಿದ್ದೇನೆ ಎಂದೂ ಆಕೆ ತಿಳಿಸಿದ್ದಾಳೆ. ಇನ್ನು ಪೊಲೀಸರು ಕೂಡ ಮಾಹಿತಿ ನೀಡಿದ್ದು, ‘ಆರೋಪಿ ಮೊಹ್ಸಿನ್ ಮೊಹಮ್ಮದ್ ರಫೀಕ್ ಖಾನ್ನನ್ನು ಅರೆಸ್ಟ್ ಮಾಡಿದ್ದೇವೆ. ಅವರ ಗ್ಯಾಂಗ್ ಪತ್ತೆ ಹಚ್ಚಲಾಗುವುದು’ ಎಂದು ಹೇಳಿದ್ದಾರೆ.