ಜೊಹಾನ್ಸ್ಬರ್ಗ್: ಅದ್ಭುತ ಫೀಲ್ಡಿಂಗ್ ಎನ್ನುವುದು ದಕ್ಷಿಣ ಆಫ್ರಿಕಾ ಕ್ರಿಕೆಟಿಗರ ರಕ್ತದಲ್ಲೇ ಬಂದಿದೆ. ಫೀಲ್ಡಿಂಗ್ನಲ್ಲಿ ಅಸಾಧ್ಯವಾದುದನ್ನು ಸಾಧ್ಯ ಎಂದು ತೋರಿಸಿಕೊಟ್ಟ ಕೀರ್ತಿ ದಕ್ಷಿಣ ಆಫ್ರಿಕಾ ಆಟಗಾರರ ವಿಶೇಷತೆ. ಅದ್ಭುತ ಕ್ಯಾಚ್ ಗಳ ಸರದಾರ ಫೀಲ್ಡಿಂಗ್ ಎಂದಾಗ ಮೊದಲು ನೆನಪಾಗುವ ಹೆಸರೇ “ಜಾಂಟಿ ರೋಡ್ಸ್” ಈ ದೇಶದ ಪರ ಆಡಿದ ಅನೇಕ ಕ್ರಿಕೆಟಿಗರು ಕೂಡ ಫೀಲ್ಡಿಂಗ್ ವಿಚಾರದಲ್ಲಿ ಇವರನ್ನು ಮೀರಿಸುವವರಿಲ್ಲ ಎನ್ನುವ ಮಟ್ಟಿಗೆ ಪ್ರದರ್ಶನ ತೋರಿದ್ದಾರೆ. ಎಬಿಡಿ ವಿಲಿಯರ್ಸ್, ಮಾರ್ಕ್ ಬೌಚರ್, ಫಾಫ್ ಡು ಪ್ಲೆಸಿಸ್(Faf du Plessis) ಹೀಗೆ ಹಲವು ಆಟಗಾರರು ನೆಪಿಗೆ ಬರುತ್ತಾರೆ. ಇದೀಗ ಫಾಫ್ ಡು ಪ್ಲೆಸಿಸ್ 39ನೇ ವಯಸ್ಸಲ್ಲೂ ಹಕ್ಕಿಯಂತೆ ಹಾರಿ ಹಿಡಿದ ಕ್ಯಾಚ್ವೊಂದರ ವಿಡಿಯೊ ವೈರಲ್ ಆಗಿದೆ.
ಜೋಹಾನ್ಸ್ಬರ್ಗ್ನ ದಿ ವಾಂಡರರ್ಸ್ ಸ್ಟೇಡಿಯಂನಲ್ಲಿ ನಡೆದ SA20 ಲೀಗ್ನ 4ನೇ ಪಂದ್ಯದಲ್ಲಿ ಜೋಬರ್ಗ್ ಸೂಪರ್ ಕಿಂಗ್ಸ್ ಹಾಗೂ ಎಂಐ ಕೇಪ್ಟೌನ್ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಲಿಝಾಡ್ ವಿಲಿಯಮ್ಸ್ ಎಸೆದ ಪಂದ್ಯದ 17ನೇ ಓವರ್ನ ನಾಲ್ಕನೇ ಎಸೆತದಲ್ಲಿ ಬ್ರೆವಿಸ್ ಹೊಡೆದ ಚೆಂಡನ್ನು ಮಿಡ್ ಆಫ್ನಲ್ಲಿ ಫಾಫ್ ಡುಪ್ಲೆಸಿಸ್ ಅದ್ಭುತ ಡೈವಿಂಗ್ ಮೂಲಕ ಒಂದೇ ಕೈಯಲ್ಲಿ ಕ್ಯಾಚ್ ಹಿಡಿದಿದ್ದಾರೆ. ಇದನ್ನು ಕಂಡು ಪ್ರೇಕ್ಷಕರು ಒಂದು ಕ್ಷಣ ದಂಗಾದರು. ಕಾಮೆಂಟ್ರಿ ಮಾಡುತ್ತಿದ್ದವರು ವಾಹ್……. ನಿಜಕ್ಕೂ ನಂಬಲಸಾಧ್ಯ… ಅದ್ಭುತ ಕ್ಯಾಚ್ ಎಂದು ವರ್ಣಿಸಿದ್ದಾರೆ.
ಇದನ್ನೂ ಓದಿ ಕ್ರಿಕೆಟ್ ಇತಿಹಾಸದ ಅತ್ಯದ್ಭುತ ಕ್ಯಾಚ್ ಕಂಡು ಸ್ಟನ್ ಆದ ಕ್ರಿಕೆಟ್ ಜಗತ್ತು!; ಇಲ್ಲಿದೆ ವಿಡಿಯೊ
Hey @Betway_za, doesn't that @faf1307 catch deserve a share of the #Betway Catch 2 Million? 🤔#SA20 #WelcomeToIncredible #JSKvMICT pic.twitter.com/bVSd7TbHUx
— Betway SA20 (@SA20_League) January 13, 2024
ಪಂದ್ಯ ಗೆದ್ದ ಕೇಪ್ಟೌನ್
ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಎಂಐ ಕೇಪ್ಟೌನ್ ತಂಡ ರಾಸ್ಸಿ ವ್ಯಾನ್ ಡರ್ ಡುಸ್ಸೆನ್ ಅವರ ವಿಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ಗೆ 243 ರನ್ ಕಲೆಹಾಕಿತು. ಬೃಹತ್ ಮೊತ್ತದ ಗುರಿ ಬೆನ್ನಟ್ಟಿದ ಜೋಬರ್ಗ್ ಸೂಪರ್ ಕಿಂಗ್ಸ್ ತಂಡ 17.5 ಓವರ್ಗಳಲ್ಲಿ 145 ರನ್ಗಳಿಗೆ ಸರ್ವಪತನ ಕಂಡು 98 ರನ್ಗಳ ಹೀನಾಯ ಸೋಲು ಕಂಡಿತು. ಕೇಪ್ಟೌನ್ ತಂಡದ ಆಟಗಾರ ಡುಸ್ಸೆನ್ ಕವಲ 50 ಎಸೆತಗಳಲ್ಲಿ 6 ಸೊಗಸಾದ ಸಿಕ್ಸರ್ ಹಾಗೂ 9 ಫೋರ್ಗಳೊಂದಿಗೆ 104 ರನ್ ಬಾರಿಸಿದರು.
ಆರ್ಸಿಬಿ ನಾಯಕತ್ವ ಕೈ ತಪ್ಪುವ ಸಾಧ್ಯತೆ
ಕಳೆದ ಎರಡು ಸೀಸನ್ನಲ್ಲಿ ಡು ಪ್ಲೆಸಿಸ್ ಆರ್ಸಿಬಿ ತಂಡವನ್ನು ಮುನ್ನಡೆಸಿದರೂ ತಂಡದ ಭವಿಷ್ಯ ಮಾತ್ರ ಬದಲಾಗಲಿಲ್ಲ. ಕಳೆದ ಬಾರಿಯಂತೂ ಲೀಗ್ನಿಂದಲೇ ಹೊರಬಿದ್ದಿತ್ತು. ಈ ಬಾರಿ ಅವರನ್ನು ನಾಯಕ್ವದಿಂದ ಕೆಳಗಿಳಿಸಲಾಗುವುದು ಎನ್ನುವ ಮಾತುಗಳು ಕೇಳಿ ಬಂದಿವೆ. ಅವರ ಸ್ಥಾನಕ್ಕೆ ಈ ಹಿಂದೆ ನಾಯಕನಾಗಿದ್ದ ವಿರಾಟ್ ಕೊಹ್ಲಿಯನ್ನು ಮತ್ತೆ ನಾಯಕನಾಗಿ ನೇಮಕ ಮಾಡಲಾಗುತ್ತದೆ ಎಂದು ಹೇಳಲಾಗಿದೆ. ಕೊಹ್ಲಿ ಭಾರತ ತಂಡದ ನಾಯಕನಾಗಿದ್ದಾಗ ಐಪಿಎಲ್ನಲ್ಲಿಯೂ ತಂಡವನ್ನು ಮುನ್ನಡೆಸುವುದು ಕಷ್ಟವಾಗುತ್ತದೆ ಕೆಲಸದ ಒತ್ತಡ ಹೆಚ್ಚಾಗಿದೆ ಎಂದು ನಾಯಕತ್ವದಿಂದ ಕೆಳಗಿಳಿದಿದ್ದರು. ಹೀಗಾಗಿ ಡು ಪ್ಲಸಿಸ್ ಅವರನ್ನು ನಾಯಕನಾಗಿ ನೇಮಕ ಮಾಡಲಾಗಿತ್ತು.